ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୪ ଅକ୍ଟୋବର ୨୦୨୨
ବେଶ୍ କିଛି ଦିନର ନିରବତା ପରେ କେନ୍ଦ୍ରମନ୍ତ୍ରୀ ତଥା ଓଡ଼ିଶା ବିଜେପିର ପ୍ରଭାବଶାଳୀ ନେତା ଧର୍ମେନ୍ଦ୍ର ପ୍ରଧାନ ଓଡ଼ିଶା ସରକାରଙ୍କ ବିରୋଧରେ ମୁହଁ ଖୋଲିଛନ୍ତି । ଅର୍ଚ୍ଚନା ନାଗ ପ୍ରସଙ୍ଗରେ ଗଣମାଧ୍ୟମରେ ନିଜର ପ୍ରତିକ୍ରିୟା ଦେବାବେଳେ ଶାସକ ଦଳ ନେତାଙ୍କ ସମ୍ପୃକ୍ତି ନେଇ ସେ ବିଜେଡିକୁ ଟାର୍ଗେଟ କରିଛନ୍ତି । ଏପରିକି ନିମାପଡ଼ାର ଧର୍ମେନ୍ଦ୍ର ସାହୁଙ୍କ ମୃତ୍ୟୁ ଘଟଣାର ମଧ୍ୟ ରାଜ୍ୟ ସରକାର ଓ ପୋଲିସର ନିଷ୍କ୍ରିୟତା ନେଇ ସେ ନିଜର ଅସନ୍ତୋଷ ଜାହିର କରିଛନ୍ତି ।
ଠିକ୍ ଏହା ପରେ ପରେ ରାଜ୍ୟ ବିଜେପିର ମଧ୍ୟ ନିଦ ଭାଙ୍ଗିବା ଭଳି ଲାଗୁଛି । କେନ୍ଦ୍ରମନ୍ତ୍ରୀଙ୍କ ବଦଳୁଥିବା ଆଭିମୁଖ୍ୟ ବୋଧହୁଏ ରାଜ୍ୟର ବିଜେପି ନେତାଙ୍କୁ ଶାସକ ଦଳ ବିଜେଡି ବିରୋଧରେ ଆନ୍ଦୋଳନକୁ ଓହ୍ଲାଇବା ପାଇଁ ଏକରକମ ବାଧ୍ୟ କରିଛି । ନିମାପଡ଼ାର “ଧର୍ମେଦ୍ର ସାହୁ ମୃତ୍ୟୁ” ଓ “ଅର୍ଚ୍ଚନା ନାଗଙ୍କ ବ୍ଲାକ ମେଲିଂ” ପ୍ରସଙ୍ଗ ନେଇ ରାଜ୍ୟ ବିଜେପି ଏବେ ଆନ୍ଦୋଳନକୁ ଓହ୍ଲାଇଛି । ବିଜେପିର ରାଜ୍ୟ ସ୍ତରୀୟ ନେତାମାନେ ଏହି ଦୁଇଟି ଘଟଣାରେ ପୋଲିସର ଭୂମିକାକୁ ସନ୍ଦେହ ଘେରକୁ ଆଣିବା ସହ ଏହାର ବିଧିବଦ୍ଧ ତଦନ୍ତ ଦାବୀ କରି ଶାସକ ବିଜେଡିକୁ ଘେରିଛନ୍ତି ।
ଏହି ଦୁଇଟି ଗୁରୁତ୍ୱପୂର୍ଣ ପ୍ରସଙ୍ଗରୁ ଖସିବାପାଇଁ ଚେଷ୍ଟା କରୁଥିବା ଶାସକ ବିଜେଡି ଏବେ ଅଡ଼ୁଆରେ ପଡ଼ିଯାଇଛି । ଧାମନଗର ଉପନିର୍ବାଚନ ଫଳାଫଳକୁ ନିଜ ସପକ୍ଷରେ ନେବା ପାଇଁ ଦିନ ରାତି ଏକ କରିଦେଇଥିବା ଶାସକ ଦଳ ଏବେ ଏହି ପ୍ରସଙ୍ଗକୁ ନେଇ କିଭଳି ବିଜେପିର ମୁକାବିଲା କରିବ ସେ ନେଇ ଚିନ୍ତିତ ଥିବା ଭଳି ଲାଗୁଛି । ଯଦି ଏ ବାବଦରେ ଶାସକ ଦଳ ନିରବ ରହେ, ତେବେ ଏହି ପ୍ରସଙ୍ଗ ଗୁଡ଼ିକ ବିରୋଧୀ ବିଜେପି ନିର୍ବାଚନ ପ୍ରସଙ୍ଗ କରିବ ନାହିଁ ତ ? ବିରୋଧୀ ଦଳ ହିସାବରେ ବିଜେପି ଯଦି ନିଜର ସକ୍ରିୟତା ଜାହିର କରେ ତେବେ ଏହି ଦୁଇଟି ଘଟଣାର ପର୍ଦ୍ଦାଫାଶ ହେବନି ତ ? ଅର୍ଚ୍ଚନା ନାଗ ଘଟଣାରେ ସମ୍ପୃକ୍ତ ବିଜେଡି ନେତାମାନଙ୍କ ନାଁ କୁ ପୋଲିସ ଲୁଚାଇବା ସମ୍ଭବ ହେବ କି ? ନିମାପଡ଼ା ଘଟଣାରେ ମନ୍ତ୍ରୀ ସମୀର ଦାସଙ୍କ ଭୂମିକାକୁ ନେଇ ବିଜେପିର ଆନ୍ଦୋଳନ ବିଜେଡିକୁ ବିଚଳିତ କରିବ ନାହିଁ ତ ?
ଏହି ଦୁଇଟି ପ୍ରସଙ୍ଗକୁ ଛାଡ଼ିଦେଲେ ଏବେ ସମସ୍ତଙ୍କ ନଜର ରହିଛି ଧାମନଗର ଉପନିର୍ବାଚନ ଉପରେ । ପ୍ରଥମରୁ ବିରୋଧୀ ବିଜେପିର ପଲ୍ଲା ଭାରୀ ଥିଲା ଏହି ନିର୍ବାଚନ ମଣ୍ଡଳୀ ରେ । ମାତ୍ର ଏବେ ଶାସକ ବିଜେଡିର ମାଳ ମାଳ ନେତା ଓ ମନ୍ତ୍ରୀ ଏଠାରେ ପହଞ୍ଚି ପ୍ରଭାବ ବିସ୍ତାର କରିବା ଆରମ୍ଭ କରିଛନ୍ତି । ଏଭଳି ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକା ଉପରେ ବିଜେପିର ହାର ଜିତ୍ ନିର୍ଭର କରୁଛି । କେନ୍ଦ୍ରମନ୍ତ୍ରୀ ପ୍ରଚାରକୁ ଆସିବା ପୂର୍ବରୁ ଏହି ଆସନ ବିଜେପି ଜିତିବ କହିବା ପରେ ବିଜେପିର ପ୍ରଚାର ଉପରେ ଏହାର ସିଧା ପ୍ରଭାବ ପଡ଼ିଛି । ୨୦୧୯ ପରଠାରୁ ଶାସକ ବିଜେଡି ବିରୋଧରେ ପାଟି ଫିଟାଉନଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯଦି ପୁଣି ଆକ୍ରମଣାତ୍ମକ ଆଭିମୁଖ୍ୟ ପୋଷଣ କରନ୍ତି, ତେବେ ବିଜେପିର ରଣନୀତିରେ ପରିବର୍ତ୍ତନ ହେବାର ସମ୍ଭାବନା ରହିଛି । ଉପନିର୍ବାଚର ଫଳାଫଳ ହାତରୁ ଖସିଗଲେ ଶାସକ ବିଜେଡି ପାଖରେ ୨୦୨୪ ସାଧାରଣ ନିର୍ବାଚନ ପୂର୍ବରୁ ରାଜ୍ୟ ବିଜେପିର ଏକ ପ୍ରକାର ଆତ୍ମସମର୍ପଣ ବୋଲି ଧରିନିଆଯିବ ।
ପୂର୍ବରୁ ବିଜେପିର ରାଷ୍ଟ୍ରୀୟ ଅଧକ୍ଷ ଜେ. ପି. ନଡ୍ଡାଙ୍କ ଓଡ଼ିଶା ଗସ୍ତପରେ କିଛି ମାତ୍ରାରେ ଉତ୍ସାହିତ ହୋଇପଡ଼ିଥିଲେ ବିଜେପିର କର୍ମୀମାନେ । ଏବେ ପୁନର୍ବାର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଆଭିମୁଖ୍ୟରେ ପରିବର୍ତ୍ତନ ସୂଚନା ପାଇବା ପରେ କର୍ମୀମାନେ ଧାମନଗର ଉପନିର୍ବାଚନରେ ଲଢ଼ିବା ଏକ ପ୍ରକାର ନିଶ୍ଚିତ । ସେହିପରି ରାଜ୍ୟର ଦୁଇ ଦୁଇଟି ଚର୍ଚ୍ଚିତ ପ୍ରସଙ୍ଗକୁ ନେଇ ବିଜେପିର ହଲ୍ଲା ବୋଲ ଆରମ୍ଭ ହୋଇଯାଇଛି । ଏହି ଆଭିମୁଖ୍ୟକୁ ପ୍ରମୁଖ ବିରୋଧୀ ଦଳ ଭାବେ ବିଜେପି କେତେଦିନ ପର୍ଯ୍ୟନ୍ତ ଜାରିରଖି ପାରିବ ? ବିଜେଡି ସହ ଅଘୋଷିତ ବୁଝାମଣା କରିଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜ ଆଭିମୁଖ୍ୟକୁ ବଦଳାଇବେ ତ ? ଦୁଇଟି ପ୍ରମୁଖ ଘଟଣାର ଦୋଷୀଙ୍କୁ ଖୋଜି ଉପଯୁକ୍ତ ଦଣ୍ଡବିଧାନ କରିବାକୁ ରାଜ୍ୟ ସରକାର ଉପରେ ଚାପ ପକାଇବାରେ ସକ୍ଷମ ହେବେ ତ ? ଏବଂ ଧାମନଗରରେ ନିଜେ ମଇଦାନକୁ ଓହ୍ଲାଇବା ସହ ବିଜେଡିର ନିର୍ବାଚନ ଜିତିବାର ରଣକୌଶଳକୁ ଅଟକାଇ ପାରିବେ ତ ?
