ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୧୯ ଅପ୍ରେଲ ୨୦୨୩
ଓଡ଼ିଶାରେ ପୁଣି ବହୁ ଦିନର ବ୍ୟବଧାନ ପରେ ଅଶାନ୍ତ ବାତାବରଣ ସୃଷ୍ଟି ହୋଇଛି । ହନୁମାନ ଜୟନ୍ତୀ ପୂର୍ବରୁ ସମ୍ବଲପୁରରେ ଘଟିଥିବା ହିଂସାକାଣ୍ଡ ଏବେ ପୂରା ପଶ୍ଚିମ ଓଡ଼ିଶାର ସବୁ ଜିଲ୍ଲା ଉପରେ ପ୍ରଭାବ ପକାଇଛି । ହିଂସାକାଣ୍ଡ ଘଟିବା ପରେ ରାଜନୈତିକ ଗତିବିଧି ମଧ୍ୟ ଜୋର ଧରିଛି । ଏହି ହିଂସାକାଣ୍ଡକୁ ରୋକିବା କାହାର ଦାୟିତ୍ୱ ଥିଲା ? ହିଂସାକାଣ୍ଡ ନେଇ ସ୍ଥାନୀୟ ପୋଲିସ ଆଗରୁ ସତର୍କ ନହେବାର କାରଣ କ’ଣ ? ଏପରିକି ଜିଲ୍ଲା ପୋଲିସର ଗୁଇନ୍ଦା ବିଭାଗ କ’ଣ କରୁଥିଲା ? ହିଂସାକାଣ୍ଡ ପରେ ଏହାର ନିୟନ୍ତ୍ରଣ ସହଜ ହେଲାନାହିଁ କାହିଁକି ? ଏଭଳି ପ୍ରଶ୍ନ ଏବେ ସମସ୍ତଙ୍କ ମନରେ । କନ୍ଧମାଳ ଦଙ୍ଗା ପରେ ବିଜେଡି ଓ ବିଜେପି ମଧ୍ୟରେ ସମ୍ପର୍କ ତିକ୍ତ ହେଲା । ଦୁଇ ଦଳର ରାଜନୈତିକ ବୁଝାମଣା ସମାପ୍ତ ହେଲା । ଏପରିକି ବିଜେଡି ସୁପ୍ରିମୋ ନବୀନ ପଟ୍ଟନାୟକ ମଧ୍ୟ ଜାତୀୟ ସ୍ତରର ଗଣମାଧ୍ୟମକୁ ସାକ୍ଷାତକାର ଦେଇ କହିଲେ ଯେ, ତାଙ୍କ ଦଳ ସମ୍ପୂର୍ଣ୍ଣ ଭାବେ ଧର୍ମ ନିରପେକ୍ଷତାରେ ବିଶ୍ୱାସ କରେ ।
ମାତ୍ର ସମ୍ବଲପୁରରେ ଯେଉଁ ଘଟଣା ଘଟିଲା ତାହା ପୁଣିଥରେ ଓଡ଼ିଶା ଭଳି ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ଓ ଶାସକ ଦଳର ଧର୍ମ ନିରପେକ୍ଷତା ନୀତି ଉପରେ ପ୍ରଶ୍ନ ଚିହ୍ନ ଲଗାଇ ଦେଇଛି । ଏପର୍ଯ୍ୟନ୍ତ ଏହି ହିଂସାକାଣ୍ଡର କାରଣ କ’ଣ ଓ ଏଥିରେ କିଏ ସମ୍ପୃକ୍ତ ତାହା ମଧ୍ୟ ସ୍ପଷ୍ଟ ହୋଇ ପାରିନାହିଁ । କେବଳ ପୋଲିସ ଗିରଫଦାରୀ ସଂଖ୍ୟା ବଢ଼ୁଛି ବୋଲି ସୂଚନା ଦେଇ ଚାଲିଛି । ଯାହାର ଫଳ ସ୍ୱରୂପ ହିଂସାକାଣ୍ଡ ପରବର୍ତ୍ତୀ ସ୍ଥିତି ଏବେ ଜଟିଳ ହେବାରେ ଲାଗିଛି । କର୍ଫ୍ୟୁ ଜାରି କରିବାପରେ ସମ୍ବଲପୁରର ଜନସାଧାରଣ ମଧ୍ୟ ବେଶ ଅସୁବିଧାର ସମ୍ମୁଖୀନ ହୋଇଛନ୍ତି । ଏପରିକି ହିଂସାକାଣ୍ଡର ପ୍ରତିବାଦ କରି ବିଭିନ୍ନ ସଂଗଠନ ପକ୍ଷରୁ ୧୪ଟି ଜିଲ୍ଲାରେ ବନ୍ଦ ଡାକରା ଦିଆଯାଇଛି । ବିଜେପିର ନେତାମାନେ ଏହି ବନ୍ଦ ଡାକରାକୁ ସମର୍ଥନ କରିଛନ୍ତି । ଅପରପକ୍ଷେ ଶାସକ ଦଳ ମଧ୍ୟ ଶାନ୍ତି ପଦଯାତ୍ରାର ଆୟୋଜନ କରିବାର ନିଷ୍ପତ୍ତି ନେଇଛି । ଏହା ଭିତରେ ବିଜେପି ଓ ବିଜେଡିର ନେତାମାନଙ୍କ ମଧ୍ୟରେ ବୟାନବାଜି ଜୋର ଧରିଛି । କିଏ କାହାକୁ ରାଜଧର୍ମ ପାଳନ ପାଇଁ ଉପଦେଶ ଦେଉଥିବା ବେଳେ, ଆଉ କିଏ ଓଡ଼ିଶାର ସ୍ଥିତି ଉତ୍ତର ପ୍ରଦେଶ, ମଧ୍ୟପ୍ରଦେଶ, ମହାରାଷ୍ଟ୍ର ଭଳି ଅପରାଧ ପ୍ରବଣ ରାଜ୍ୟଠାରୁ ଭଲ ବୋଲି କହିବାକୁ ପଛାଉ ନାହାନ୍ତି ।
ତେବେ ସମସ୍ତେ ଥରେ ଭାବିବା ଦରକାର ଯେ, ହିଂସାକାଣ୍ଡ ଅବା ଦଙ୍ଗାର ଆବଶ୍ୟକତା ଅଛି କି ? ହିଂସାକାଣ୍ଡ ଓ ଦଙ୍ଗାହେବା କ’ଣ ସାଧାରଣ ଲୋକ ଚାହାଁନ୍ତି କି ? ଦଙ୍ଗା ପରେ ଘଣ୍ଟା ଘଣ୍ଟା ଧରି କର୍ଫ୍ୟୁ ଘୋଷଣା ହେବା, ଇଣ୍ଟରନେଟ୍ ସେବା ବନ୍ଦ ରହିବା କଣ ଲୋକଙ୍କୁ ପ୍ରଭାବିତ କରୁନାହିଁ ? ହିଂସାକାଣ୍ଡରେ ଲୋକଙ୍କ ଜୀବନ ଓ ଜୀବିକା ପ୍ରଭାବିତ ହେଉଛି ଏହା କଣ ସରକାର ଓ ସ୍ଥାନୀୟ ପ୍ରଶାସନ ବୁଝିବା ଉଚିତ ନୁହେଁ କି ? ଏପରିକି ହିଂସାକାଣ୍ଡ ପରେ କର୍ଫ୍ୟୁ ଘୋଷଣା, ବିଭିନ୍ନ ଦଳର ବନ୍ଦ ଡାକରା,ଶୋଭାଯାତ୍ରା ଓ ପ୍ରତିବାଦ ଆଦି କାହା ସ୍ୱାର୍ଥରେ କରାଯାଇଛି ? ଏସବୁ ପ୍ରଶ୍ନର ଉତ୍ତର ଜନସାଧାରଣଙ୍କୁ ନଦେଇ ପରସ୍ପରକୁ ସମାଲୋଚନା କରି ଖସିଯିବା ଓ ହିଂସାକାଣ୍ଡରେ ଜଡ଼ିତ ବ୍ୟକ୍ତି ବିଶେଷଙ୍କ ପ୍ରତି କଠୋର ନହେବା ଏକ ନିର୍ବାଚିତ ସରକାର ଓ କାର୍ଯ୍ୟରତ ପ୍ରଶାସନର ଦାୟିତ୍ୱ କି ?
ସମ୍ବଲପୁର ହିଂସାକାଣ୍ଡକୁ ନେଇ ଦୁଇ ରାଜନୈତିକି ଦଳ ବିଜେଡି ଓ ବିଜେପିର ଆଭିମୁଖ୍ୟକୁ କ’ଣ କୁହାଯାଇପାରେ ? ସମ୍ବଲପୁରର ପୋଲିସ ଏସପି ଓ ଜିଲ୍ଲାପାଳଙ୍କ ସମେତ ଗୁଇନ୍ଦା ଦାୟିତ୍ୱରେ ଥିବା ପୋଲିସ ଅଧିକାରୀଙ୍କ ଭୂମିକା ସନ୍ଦେହ ପରିସରଭୁକ୍ତ ହେବା ଉଚିତ ନୁହେଁ କି ? ସାଧାରଣ ଲୋକ ଏହି ହିଂସାକାଣ୍ଡ ଓ ପରବର୍ତ୍ତୀ ସମୟରେ ଯେଉଁ ଅଭାବନୀୟ ପରିସ୍ଥିତିର ସାମ୍ନା କଲେ ସେ ନେଇ କିଏ ଉତ୍ତର ଦାୟୀ ହେବା ଉଚିତ ? ପରିଶେଷରେ ସମ୍ବଲପୁର ହିଂସାକାଣ୍ଡ ପରେ ଓଡ଼ିଶାକୁ ଉତ୍ତର ପ୍ରଦେଶ, ବିହାର ଓ ମହାରାଷ୍ଟ୍ର ଭଳି ଅପରାଧ ଅଧିକ ଘଟୁଥିବା ରାଜ୍ୟ ମଧ୍ୟରୁ ଅଲଗା ଭାବେ ଦେଖା ଯାଇପାରିବ କି ?
