ବ୍ୟୁରୋ ରିପୋର୍ଟ, ନିର୍ଭୀକ, ୦୭ ସେପ୍ଟେମ୍ବର ୨୦୨୨
ବିହାରରେ ବିଜେପିକୁ ଚକମା ଦେଇ ନୂଆ ସରକାର ଗଠନ ପରେ ବିହାର ମୁଖ୍ୟମନ୍ତ୍ରୀ ନୀତିଶ୍ କୁମାର ଏବେ ଦିଲ୍ଲୀ ଗସ୍ତରେ ଅଛନ୍ତି । ସେପ୍ଟେମ୍ବର ୫ ତାରିଖରେ ପ୍ରଥମେ ଲାଲୁ ପ୍ରସାଦ ଯାଦବଙ୍କୁ ସାକ୍ଷାତ କରିଥିଲେ ନୀତିଶ୍ । ଏହା ପରଠାରୁ ସେ ଏବେ ଦିଲ୍ଲୀରେ ସମସ୍ତ ବିଜେପି ବିରୋଧୀ ଶକ୍ତି ମାନଙ୍କୁ ଏକଜୁଟ କରିବା ନେଇ ଯୋଜନା ଆରମ୍ଭ କରିଛନ୍ତି । କଂଗ୍ରେସ ନେତା ରାହୁଲ ଗାନ୍ଧୀଙ୍କ ସହ ଆଲୋଚନା କରିବା ପରେ ଏହା ସ୍ପଷ୍ଟ ହୋଇଯାଇଛି ଯେ, ୨୦୨୪ ପାଇଁ ବିକଳ୍ପ ନେତୃତ୍ୱ ସନ୍ଧାନରେ ନୀତିଶ୍ ରହିଛନ୍ତି । ଯଦିଓ ସେ ପ୍ରଧାନମନ୍ତ୍ରୀ ପ୍ରାର୍ଥୀ ହେବେ କି ନାହିଁ ବୋଲି କିଛି ସ୍ପଷ୍ଟ କରିନାହାନ୍ତି ମାତ୍ର ତାଙ୍କର ଉଦ୍ୟମ ହିଁ ଅନେକ ସନ୍ଦେଶ ଦେଉଛି ।
ବାମ ଦଳ ନେତା ସୀତାରାମ ୟେଚୁରୀ, ଡ଼ି. ରାଜା ଓ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲଙ୍କୁ ମଧ୍ୟ ସେ ଭେଟିଛନ୍ତି । ଏହା ପରେ ସେ ହରିୟାଣା, ମହାରାଷ୍ଟ୍ର , କର୍ଣ୍ଣାଟକ ଆଦି ରାଜ୍ୟ ଗସ୍ତ କରି ସମସ୍ତ ବିଜେପି ବିରୋଧୀ ଶକ୍ତିଙ୍କୁ ଭେଟିବାର ଲମ୍ବା କାର୍ଯ୍ୟକ୍ରମ ମଧ୍ୟ ରହିଛି ।
ପୂର୍ବରୁ ବିକଳ୍ପ ନେତୃତ୍ୱ ନେଇ ହୋଇଥିବା ଉଦ୍ୟମ ସଫଳ ହୋଇନଥିଲେ ମଧ୍ୟ, ଏବେ ପୁଣି ତାହା ଆଗକୁ ବଢ଼ିବା ପରି ଲାଗୁଛି । ବିଜେପି ନେତୃତ୍ଵାଧୀନ କେନ୍ଦ୍ର ସରକାର CBI , ED କୁ ଆୟୁଧ କରି ବିରୋଧୀ ଶିବିରରେ ଛନକା ସୃଷ୍ଟି କରୁଥିବା ବେଳେ ଧିରେ ଧିରେ ସମସ୍ତ ବିରୋଧୀ ଦଳ ମଧ୍ୟ ବିଜେପି ବିରୋଧରେ ମେଳି ବାନ୍ଧିବାକୁ ଇଚ୍ଛା ପ୍ରକାଶ କଲେଣି । ୯ଟି ରାଜ୍ୟର ସରକାର ମାନେ ମଧ୍ୟ CBI ତଦନ୍ତ ବାବଦରେ ରାଜ୍ୟର ଅନୁମତିକୁ ପ୍ରତ୍ୟାହାର କରିନେଲେଣି । ବିହାର ମଧ୍ୟ ଏ ନେଇ ଖୁବ ଶୀଘ୍ର ନିଷ୍ପତ୍ତି ନେଇପାରେ । ଅନ୍ୟ ପକ୍ଷରେ ମହାରାଷ୍ଟ୍ରରେ ଶିବସେନା, ଏନସିପି, କଂଗ୍ରେସର ମେଣ୍ଟ ସରକାର ଭାଙ୍ଗିବା ପରେ ବିଜେପି ବିରୋଧରେ ଅନ୍ୟ ଆଞ୍ଚଳିକ ରାଜନୈତିକ ଦଳ ଗୁଡିକ ଏକାଠି ହେବାପାଇଁ ସଂକେତ ଦେଲେଣି ।
ବିଜେପିର ବିସ୍ତାର ବାଦୀ ଓ ଆଞ୍ଚଳିକ ରାଜନୈତିକ ଦଳ ବିରୋଧୀ ଆଭିମୁଖ୍ୟକୁ ଆଉ ବରଦାସ୍ତ କରିବା ମୁଡ଼୍ ରେ ଛୋଟ ଛୋଟ ରାଜନୈତିକ ଦଳ ଗୁଡିକ ନାହାନ୍ତି । ପଞ୍ଜାବରେ ନିର୍ବାଚନ ଜିତିବା ପରେ ଆମ ଆଦମୀ ପାର୍ଟି ଏବେ ଗୁଜୁରାଟ ମୁହାଁ ହୋଇଛି । ଆଗକୁ ଗୁଜୁରାଟ, ହିମାଚଳ ପ୍ରଦେଶ ଓ କର୍ଣ୍ଣାଟକ ଆଦି ରାଜ୍ୟର ନିର୍ବାଚନ ରହିଛି । ଏଣୁ ଏହି ରାଜ୍ୟ ଗୁଡ଼ିକର ନିର୍ବାଚନ ପୂର୍ବରୁ ହୁଏତ କିଛି ବିକଳ୍ପ ସମୀକରଣର ସଂକେତ ମିଳିପାରେ । ରାଜନୈତିକ ଅଭିଜ୍ଞତା ଓ ନେତୃତ୍ୱ ନେବାର ଦକ୍ଷତା ଦୃଷ୍ଟିରୁ ବିହାର ମୁଖ୍ୟମନ୍ତ୍ରୀ ନୀତିଶ୍ କୁମାର ଆଗରେ ରହିଛନ୍ତି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜିରୀୱାଲଙ୍କ ଠାରୁ ମଧ୍ୟ ହିନ୍ଦୀ ଭାଷାଭାଷୀ ଅଞ୍ଚଳରେ ନୀତିଶ୍ କୁମାରଙ୍କ ପ୍ରଭାବ ପଡ଼ିବାର ସମ୍ଭାବନା ମଧ୍ୟ ରହିଛି । ପୁରୁଣା ଜନତା ଦଳର ସମସ୍ତ ନେତାଙ୍କ ସହ ନୀତିଶ୍ କୁମାରଙ୍କର ବ୍ୟକ୍ତିଗତ ସମ୍ପର୍କ ଭଲ ରହିଛି । ସେ ଚାହିଁଲେ ସମସ୍ତଙ୍କୁ ଏକାଠି କରିପାରିବେ । ଏପରିକି ଉତ୍ତରପ୍ରଦେଶରେ ମଧ୍ୟ ନୀତିଶ୍ କୁମାର ଉଭୟ ମୁଲାୟମ ସିଂ ଯାଦବ ଓ ଅଖିଲେଶ ଯାଦବଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ତାପରେ ସେ କର୍ଣ୍ଣାଟକ ଯାଇ ପୂର୍ବତନ ପ୍ରଧାନମନ୍ତ୍ରୀ ଦେବଗୌଡା ଓ ତାଙ୍କ ପୁଅ ଏଚ. ଡି. କୁମାରସ୍ବାମୀଙ୍କୁ ମଧ୍ୟ ସାକ୍ଷାତ କରିବେ । ନୀତିଶ୍ ଙ୍କର ପୁରୁଣା ଜନତା ଦଳ ନେତାଙ୍କ ସହ ଥିବା ସମ୍ପର୍କ ଯଦି ପୁନର୍ବାର ଆଗକୁ ବଢ଼େ ତେବେ ଜାତୀୟ ରାଜନୀତିରେ ନୀତିଶ୍ କୁମାର ହିଁ ବିକଳ୍ପ ନେତୃତ୍ୱ ନେବାରେ ଅସୁବିଧା ହେବନାହିଁ ବୋଲି ବହୁ ରାଜନୈତିକ ପର୍ଯ୍ୟବେକ୍ଷକଙ୍କର ମତ । ମାତ୍ର ଜାତୀୟ ସ୍ତରରେ କଂଗ୍ରେସର ସମର୍ଥନ ନିହାତି ଜରୁରୀ । ଯେହେତୁ କଂଗ୍ରେସ ମିଳିତ ଭାବେ ବିହାରରେ ସରକାରରେ ରହିଛି ତେଣୁ ରାହୁଲ ଗାନ୍ଧୀଙ୍କ ସମର୍ଥନ ମଧ୍ୟ ନୀତିଶ୍ ଙ୍କୁ ମିଳିବା ସହଜ ହୋଇଯାଇ ପାରେ ।
ବର୍ତ୍ତମାନର ବିଭିନ୍ନ ଗଣମାଧ୍ୟମ ଓ ସର୍ଭେ ସଂସ୍ଥା ର ଆକଳନ ମୁତାବକ ଯଦି ବିଜେପି ଆସନ ସଂଖ୍ୟା ହ୍ରାସ ପାଉଛି ତେବେ ଆଗକୁ ଏହା ବିଜେପି ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିବ । ବିହାର, ଉତ୍ତରପ୍ରଦେଶ ଓ ପଶ୍ଚିମବଙ୍ଗ ଭଳି ରାଜ୍ୟରେ ବିଜେପି ପୂର୍ବ ସ୍ଥିତି ବଜାୟ ନ ରଖେ, ତେବେ ବିକଳ୍ପ ରାଜନୀତିର ସମ୍ଭାବନା ଉଜ୍ଜ୍ୱଳ । ପୂର୍ବ ଜନତା ଦଳର ନେତାମାନଙ୍କ ସହ କଂଗ୍ରେସ, ଏନ୍ସିପି, ଶିବସେନା, ଅକାଳି ଦଳ, ଟି ଆର୍ ଏସ୍, ତୃଣମୂଳ କଂଗ୍ରେସ ଆଦି ଯଦି ନୀତିଶ୍ କୁମାରଙ୍କ ଜେଡିୟୁ ଓ ଆର୍ ଜେ ଡି ସହ ଯୋଡ଼ି ହୁଅନ୍ତି ତେବେ ଏକ ସଶକ୍ତ ବିକଳ୍ପ ଦେଶକୁ ମିଳିବାରେ ଅସୁବିଧା ହୋଇ ନ ପାରେ । ଏହାର ନେତୃତ୍ୱ ପ୍ରସଙ୍ଗ ଉଠିଲେ ନୀତିଶ୍ ଙ୍କ ପ୍ରଭାବ ହିଁ ଅନ୍ୟମାନଙ୍କ ଠାରୁ ଆଗରେ ରହିବ ଏଥିରେ ଦ୍ୱିମତ ହେବାର ନାହିଁ ।
ତେବେ ବିଜେପିର ବିକଳ୍ପ ତିଆରି କରିବାରେ ନୀତିଶ୍ ଙ୍କ ଦିଲ୍ଲୀ ଗସ୍ତ କେତେଦୂର ସହାୟକ ହେବ ? ଟିଏମ୍ ସି , ଆପ୍, ଟି ଆର୍ ଏସ୍, କଂଗ୍ରେସ ଏବଂ ବାମଦଳ ଗୋଟିଏ ନେତୃତ୍ୱ ତଳେ ରହିବାକୁ ପ୍ରସ୍ତୁତ ହେବେ ତ? ଯଦି ଏହା ସମ୍ଭବ ହୁଏ ତେବେ ବିକଳ୍ପ ରାଜନୀତି ର ଶ୍ରେୟ ନୀତିଶ୍ କୁମାର ହିଁ ନେବେ ।
