ବ୍ୟୁରୋ ରିପୋର୍ଟ, ନିର୍ଭୀକ, ୦୭ ସେପ୍ଟେମ୍ବର ୨୦୨୨
ସମସ୍ତ ସୁବିଧା ସୁଯୋଗ ପାଇବାପାଇଁ ଲୋକମାନେ ସହରାଭିମୁଖୀ ହେଉଛନ୍ତି । ମାତ୍ର ଆଜି କାଲି ସହରୀ ଜୀବନ କେତେ ଅସହାୟ ହୋଇପଡିଛି ତାହା ନଦେଖିବା ଲୋକ ବିଶ୍ୱାସ କରିପାରିବେ ନାହିଁ । ଦିଲ୍ଲୀ ଠାରୁ ଭୁବନେଶ୍ୱର ପର୍ଯ୍ୟନ୍ତ ସହରର ବାସିନ୍ଦା ମାନେ କିଭଳି କେତେବେଳେ ଆଉ କାହାଦ୍ୱାରା ଘେରାବନ୍ଦୀ ହୋଇ ଅସହାୟ ହୋଇପଡୁଛନ୍ତି ତାହା ସେମାନେ ବେଶ ଅନୁଭବ କରିପାରିଲେଣି ।
ଏହି ନିକଟରେ ବଙ୍ଗଳା ଦେଶର ପ୍ରଧାନମନ୍ତ୍ରୀ ଶେଖ ହସିନା ନୂଆଦିଲ୍ଲୀ ଗସ୍ତରେ ଆସିଛନ୍ତି । ଏହି ନେତ୍ରୀଙ୍କ କାର୍ଯ୍ୟକ୍ରମ ଅନୁଯାୟୀ ରାଜଧାନୀ ଦିଲ୍ଲୀର ସଡ଼କ ସୁରକ୍ଷାକୁ ଏଭଳି କଟକଣା କରାଯାଇଛି ଯେ ସାଧାରଣ ଲୋକଟିଏ ନିଜର ଗାଡ଼ି ଚଳାଇ ଯିବା ମୁସ୍କିଲ, ବସ, ଟ୍ରେନ ଓ ବିମାନରେ ଯିବାପାଇଁ ଘରୁ ବାହାରୁଥିବା ଯାତ୍ରୀମାନେ ମଧ୍ୟ ନାହିଁ ନଥିବା ଅସୁବିଧା ଭୋଗୁଛନ୍ତି । ସେହିପରି କିଛିଦିନ ପୂର୍ବରୁ କଂଗ୍ରେସ ଦଳ ପକ୍ଷରୁ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କୁ ED ସମନ ସମୟରେ ଦିଲ୍ଲୀର ରାସ୍ତା ଘାଟକୁ ଏପରି ସିଲ କରିଦିଆଗଲା ଯେ, ଦିଲ୍ଲୀ ବାସୀ ମଧ୍ୟ ବହୁ ସମୟ ଧରି ଘେରାବନ୍ଦୀ ହୋଇ ରହିଲେ । କେହି କେହି ନିଜର ଗନ୍ତବ୍ୟ ପଥରେ ଘଣ୍ଟା ଘଣ୍ଟା ଅଟକି ରହିବା ବେଳେ ଆଉ କାହାକୁ ମଧ୍ୟ ଟ୍ରେନ ଓ ବିମାନ ଗସ୍ତ ବାତିଲ କରିବାକୁ ପଡିଥିଲା । ଠିକ ସେହିପରି ଆମ ରାଜ୍ୟର ରାଜଧାନୀ ଭୁବନେଶ୍ୱର ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସମ୍ବର୍ଦ୍ଧନା ଦେବାପାଇଁ ସେପ୍ଟେମ୍ବର ୬ ତାରିଖରେ ବିଜେଡି ନେତାଙ୍କ ଦ୍ୱାରା ଡକରା ପାଇ ଆସିଥିବା ହଜାର ହଜାର ବିଜେଡି କର୍ମୀ ଓ ନେତା ରାଜଧାନୀ ବାସୀଙ୍କ ଜୀବନ ଯାତ୍ରାକୁ ଘଣ୍ଟା ଘଣ୍ଟା ଧରି ଅଚଳ କରିଦେଇଥିଲେ । ରୋଗୀଙ୍କୁ ନେଇ ଯାଉଥିବା ଆମ୍ବୁଲାନ୍ସ ଅଟକି ଯାଇଥିବା ବେଳେ, ହସ୍ପିଟାଲ ରୁ ଫେରୁଥିବା ରୋଗୀ ମାନେ ମଧ୍ୟ ନିଜପାଇଁ ଗାଡ଼ିଟିଏ ଯୋଗାଡ଼ କରିପାରିନଥିଲେ । ସେହିପରି ସ୍କୁଲରୁ ଫେରୁଥିବା ଛୋଟ ପିଲାମାନେ ମଧ୍ୟ ଘଣ୍ଟା ଘଣ୍ଟା ଧରି ରାସ୍ତାରେ ଅଟକି ରହିଥିବା ଦୃଶ୍ୟ ଦେଖିବାକୁ ମିଳିଥିଲା । ଏ ପରିସ୍ଥିତିକୁ ଅନୁଭବ କରିଥିବା ଲୋକ କୁହାକୁହି ହେଉଥିଲେ ରାଜନୈତିକେ ଦଳ ଓ ନେତାମାନେ ଉତ୍ସବ ପାଳନ କରିବେ ବୋଲି କ’ଣ ସାଧାରଣ ଲୋକଙ୍କୁ ଘେରାବନ୍ଦୀ କରିବେ ?
ବିଜେଡି ନେତା ଓ କର୍ମୀ ମାନେ ସିନା ନିଜ ନେତାଙ୍କୁ ସମ୍ବର୍ଦ୍ଧିତ କରି ନିଜର ଶକ୍ତି ପ୍ରଦର୍ଶନ କଲେ ମାତ୍ର ରାଜଧାନୀରେ ବସବାସ କରୁଥିବା ସାଧାରଣ ଜନତା, ଡାକ୍ତରଖାନା ଯାଉଥିବା ରୋଗୀ ଓ ସେମାନଙ୍କ ସମ୍ପର୍କୀୟ ଓ ସ୍କୁଲରୁ ଫେରୁଥିବା ଛୋଟ ଛୋଟ ପିଲାଙ୍କୁ ଅସହାୟ କରିଦେଲେନି ତ?
ସବୁଠାରୁ କ୍ଷୋଭର ବିଷୟ ହେଉଛି ଭୁବନେଶ୍ୱରର ମେୟର କହିଲେ ଯେ, ରାଜଧାନୀ ବାସୀ ତାଙ୍କ ଦଳର ନେତାଙ୍କ ପାଇଁ ଏତିକି ଦୁର୍ଦ୍ଦଶା ସହିନେବେ ବୋଲି । ଏହା କ’ଣ ଜଣେ ନିର୍ବାଚିତ ଲୋକ ପ୍ରତିନିଧିଙ୍କ ମୁହଁ ରୁ ଆଶା କରାଯାଏ କି ? ଯଦି ନେତା ତାଙ୍କର ତେବେ ଲୋକମାନେ କାହାର ?
ରାଜଧାନୀର ପୋଲିସ କମିସନରେଟ ବ୍ୟବସ୍ଥାପ୍ରତି ମଧ୍ୟ ପ୍ରଶ୍ନବାଚୀ ସୃଷ୍ଟି ହେବ ନା ନାହିଁ ? ଆମ୍ବୁଲାନ୍ସ କୁ ନ ଛାଡ଼ିବା, ରୋଗୀଙ୍କୁ ଗାଡ଼ି ବ୍ୟବସ୍ଥା ନକରିବା ଓ ସ୍କୁଲ୍ ଗାଡ଼ି ଗୁଡିକୁ ଅଟକାଇଥିବା ରାଜନୈତିକ ଦଳର କର୍ମୀଙ୍କୁ ବିରୋଧରେ କାର୍ଯ୍ୟାନୁଷ୍ଠାନ ନେବା କ’ଣ ପୋଲିସ୍ ର ଦାୟିତ୍ୱ ନୁହେଁ କି ? କ୍ରମାଗତ ଭାବେ ଓଡ଼ିଶା ଲୋକଙ୍କର ଆସ୍ଥା ଓ ଭରସା ପାଲଟି ଥିବା ମୁଖ୍ୟମନ୍ତ୍ରୀ ଯଦି ଲୋକଙ୍କର ଏହି ଦୁର୍ଦ୍ଦଶା ବିଷୟରେ ଜାଣିଥିବେ ତାଙ୍କୁ କ’ଣ ଏହା ଖୁସି ଦେଇଥିବ ? ଶାସକ ଦଳର ନେତା ଓ କର୍ମୀମାନେ ଯେଉଁ ଅମାନବୀୟ ଆଚରଣ କଲେ ସେମାନେ କ’ଣ ଜାଣି ପାରିଲେ ନାହିଁ ଯେ, ତାଙ୍କର ସର୍ବୋଚ୍ଚ ନେତା ତଥା ମୁଖ୍ୟମନ୍ତ୍ରୀ ଲୋକଙ୍କର ଏପରି ଦୁର୍ଦ୍ଦଶାକୁ କେବେ ପସନ୍ଦ କରନ୍ତି ନାହିଁ ବୋଲି ?
ତେବେ ଯାହାବି ହେଉ ଦେଶର ରାଜଧାନୀ ଦିଲ୍ଲୀରେ ବସବାସ କରୁଥିବା ଜନସାଧାରଣ ହୁଅନ୍ତୁ ଅବା ଓଡ଼ିଶାର ରାଜଧାନୀରେ ରହୁଥିବା ଜନସାଧାରଣ ଏବେ ବୁଝିଗଲେଣି ରାଜଧାନୀରେ ରହିଲେ, କେତେବେଳେ ଜଳବନ୍ଦୀ ତ ଆଉ କେତେବେଳେ ରାଜନୈତିକ ଦଳ ଓ ଏହାର ନେତା ଙ୍କ ପାଇଁ ଏପରି ଘେରାବନ୍ଦୀ ହେବାକୁ ପଡ଼ିବ । ଜୀବନ ଓ ଜୀବିକା ପାଇଁ ରାଜଧାନୀକୁ ବାଛିଥିବା ଲୋକେ ଏବେ ପ୍ରସ୍ତୁତ ହେବା ଦରକାର ଆଗକୁ ଆହୁରି କେତେ ପ୍ରକାରର ବନ୍ଦୀ ହେବାକୁ ପଡ଼ିବ ।
