ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୧୪ ଫେବୃଆରୀ ୨୦୨୩
କିଛି ଦିନର ବିରତି ପରେ ଏବେ ଶାସକ ବିଜେଡି ଓ ବିରୋଧୀ ବିଜେପି ମୁହାଁମୁହିଁ ହୋଇଛନ୍ତି । ପଞ୍ଚାୟତ ସ୍ତରରୁ ଆରମ୍ଭ କରି ରାଜ୍ୟର ରାଜଧାନୀ ଭୁବନେଶ୍ୱର ପର୍ଯ୍ୟନ୍ତ ଏବେ ଦେଖିବାକୁ ମିଳିବ ୩ ଦିନିଆ ଆନ୍ଦୋଳନର ପ୍ରତିଯୋଗିତା । ୫ କେଜି ଚାଉଳ କାହିଁକି କେନ୍ଦ୍ର ସରକାର କାଟିଦେଲେ ଓ ଧାନ କିଣା ବାବଦକୁ ବଜେଟ୍ ରେ କାହିଁକି କମ୍ ପରିମାଣ ଅର୍ଥ ବ୍ୟୟ ବରାଦ କରିଛନ୍ତି ଏହି ପ୍ରଶ୍ନ ନେଇ ଏବେ ଶାସକ ବିଜେଡ଼ି ୩ ଦିନ ପାଇଁ କେନ୍ଦ୍ର ସରକାରଙ୍କ ବିରୋଧରେ ଆନ୍ଦୋଳନ କରିବ ।
ସେହିପରି ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟା ପରେ କ୍ରାଇମ୍ ବ୍ରାଞ୍ଚ ତଦନ୍ତର ଧିମା ଗତି ଓ ରାଜ୍ୟର ବିପନ୍ନ ହୋଇଥିବା ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିଜେପି ଗର୍ଜିବ ରାଜରାସ୍ତାରେ । ବିରୋଧୀ ଦଳ ଭାବରେ ଏହି ପ୍ରସଙ୍ଗକୁ ନେଇ ବିଜେପି ମଧ୍ୟ ୩ ଦିନିଆ ଆନ୍ଦୋଳନର ଡାକରା ଦେଇଛି । ପଞ୍ଚାୟତ ସ୍ତରରୁ ଭୁବନେଶ୍ୱର ପର୍ଯ୍ୟନ୍ତ ରହିଛି ଦଳୀୟ କାର୍ଯ୍ୟକ୍ରମ ଓ ପ୍ରତିବାଦ । ଏହି ଦୁଇଟି ପ୍ରସଙ୍ଗରୁ ଦୁଇ ଦଳ ରାଜନୈତିକ ଫାଇଦା ହାସଲର ଲକ୍ଷ୍ୟ ରଖିଛନ୍ତି । ମାଗଣା ଚାଉଳର ଶ୍ରେୟ ଓଡ଼ିଶାରେ ଶାସନ କ୍ଷମତାରେ ଥିବା ଶାସକ ବିଜେଡି ସବୁବେଳେ ନେଇ ଆସିଛି । ଏପରିକି ଏନେଇ ଏକ ଭଲ ଭୋଟ ବ୍ୟାଙ୍କ ମଧ୍ୟ ଦଳ ନିଜ ସପକ୍ଷରେ ତିଆରି କରିସାରିଛି । ହଠାତ୍ ଏହି ଶ୍ରେୟରେ ଭାଗ ନେବାକୁ ବିଜେପି ଉଦ୍ୟମ ଆରମ୍ଭ କରିଛି । କିଛି ଦିନ ପୂର୍ବରୁ କେନ୍ଦ୍ରସରକାର ସମସ୍ତ ଗରିବ ଲୋକଙ୍କୁ ମାଗଣାରେ ୫ କେଜି ଚାଉଳ ପ୍ରଦାନ ନିଷ୍ପତ୍ତି ନେବାପରେ, ଏହା ଓଡ଼ିଶାର ଶାସନ କ୍ଷମତାରେ ଥିବା ବିଜେଡ଼ିକୁ ଅଡୁଆରେ ପକାଇଦେଇଛି । କାରଣ ଏବେ ଏହି ଚାଉଳ ବାବଦକୁ ସମସ୍ତ ଅର୍ଥ କେନ୍ଦ୍ର ସରକାର ବହନ କରିବେ ଓ ଏ ବାବଦରେ ଏକ ରସିଦ ମଧ୍ୟ ଉପଭୋକ୍ତା ମାନଙ୍କୁ ଦିଆଯିବ । ତେଣୁ ମାଗଣା ଚାଉଳର ଶ୍ରେୟ ଏବେ କେନ୍ଦ୍ର ସରକାର ନେଇଯିବାର ଭୟ ସୃଷ୍ଟି ହୋଇଛି ଓଡ଼ିଶାର ଶାସକ ଦଳ ପାଇଁ ।
ତେଣୁ ଏହି ଭୋଟ ବ୍ୟାଙ୍କକୁ କ୍ଷତି ନପହଞ୍ଚାଇବାର ଯୋଜନାରେ ରହିଛି ବିଜେଡି। ଏଣୁ ପୂର୍ବରୁ ୧୦ କେଜି ଚାଉଳ ପାଉଥିବା ଲୋକଙ୍କ ପାଖରେ ୫ କେଜି ଚାଉଳ କେନ୍ଦ୍ର ସରକାର କାଟି ଦେଇଛନ୍ତି ବୋଲି ଏକ ବାର୍ତ୍ତା ଦେବାକୁ ଚାହୁଁଛି ଶାସକ ବିଜେଡି । ଯାହାଦ୍ୱାରା ଏହି ୧୦ କେଜି ଚାଉଳର ଉପଭୋକ୍ତା ମାନଙ୍କ ପାଖରେ କେନ୍ଦ୍ର ସରକାର ବାବଦରେ ଏକ ନକାରାତ୍ମକ ମନୋଭାବ ତିଆରି କରିବାପାଇଁ ବିଜେଡି ଉଦ୍ୟମ କରୁଥିଲା ଭଳି ମନେହୁଏ । ପଶ୍ଚିମ ଓଡ଼ିଶାର ଅଭାବୀ ଧାନ ବିକ୍ରି ପ୍ରସଙ୍ଗକୁ ମଧ୍ୟ ଏକ ପ୍ରମୁଖ ପ୍ରସଙ୍ଗ କରିବା ସହ ଏଥିପାଇଁ କେନ୍ଦ୍ର ସରକାର ହିଁ ଦାୟୀ ବୋଲି ଲୋକଙ୍କ ପାଖରେ ଏବେ ବାର୍ତ୍ତା ପହଞ୍ଚାଇବାକୁ ଚେଷ୍ଟାକରିବ ବିଜେଡି ଏହି ପ୍ରତିବାଦ ମାଧ୍ୟମରେ ।
ଅନ୍ୟପକ୍ଷରେ ବିଜେପି ମଧ୍ୟ ଏବେ ଚାଉଳ ରାଜନୀତିରୁ ପୁରା ଶ୍ରେୟ ନେବାପାଇଁ ଅଣ୍ଟା ଭିଡ଼ିଛି । ମାଗଣା ଚାଉଳ ମୋଦି ଦେଉଛନ୍ତି ବୋଲି ବିଜେପିର ନେତାମାନେ ଏବେ ଠାରୁ ପ୍ରଚାର କରିବା ଆରମ୍ଭ କରିଦେଲେଣି। ଭୋଟରଙ୍କ ପାଖରେ ଏହି ଚାଉଳ ପହଞ୍ଚିବା ପରେ ମାଗଣା ଚାଉଳ ଶ୍ରେୟ ବିଜେଡି ଠାରୁ ବିଜେପି ଛଡ଼ାଇ ପାରିବ ବୋଲି ଆଶା କରୁଛି । ଏହା ସହିତ ପୂର୍ବତନ ମନ୍ତ୍ରୀ ନବ କିଶୋର ଦାସଙ୍କ ହତ୍ୟା ପ୍ରସଙ୍ଗକୁ ନେଇ ରାଜ୍ୟ ବିଜେପି ବେଶ୍ ସୁଚିନ୍ତିତ ରଣନୀତି ନେଇ ଆଗକୁ ବଢ଼ୁଛି । ପ୍ରଥମେ ଏହି ହତ୍ୟାକାଣ୍ଡ ନେଇ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କୁ ଦଳ ବ୍ୟବହାର କଲା। ଜୟନାରାୟଣ ମିଶ୍ରଙ୍କ ମୁହଁରେ ଏହି ହତ୍ୟାକାଣ୍ଡ ପଛରେ ଏକ ଷଡ଼ଯନ୍ତ୍ର ରହିଛି ବୋଲି ସାରା ରାଜ୍ୟର ଲୋକଙ୍କୁ ବାର୍ତ୍ତା ଦେବାରେ ସଫଳ ହେଲା । ପରବର୍ତ୍ତୀ ସମୟରେ ଅନ୍ୟତମ ନେତା ତଥା ଦେବଗଡ଼ ବିଧାୟକ ସୁବାସ ପାଣିଗ୍ରାହୀଙ୍କ ମୁହଁରେ ଏହି ହତ୍ୟାକାଣ୍ଡରେ ଉପକୂଳିଆ ନେତା ସମ୍ପୃକ୍ତି ଥିବାର ଏକ ଅଭିଯୋଗ ମଧ୍ୟ କଲା ବିଜେପି । ଯାହାକି ଏହି ହତ୍ୟାକାଣ୍ଡ ପଛରେ ଏକ ରାଜନୈତିକ ଉଦ୍ଦେଶ୍ୟ ଥିବା କଥାକୁ ଲୋକଙ୍କ ପାଖରେ ପହଞ୍ଚାଇଲା । ପୁଣି ଦଳର ଅନ୍ୟତମ ନେତା ତଥା ପଦ୍ମପୁରର ପୂର୍ବତନବିଧାୟକ ପ୍ରଦୀପ ପୁରୋହିତ ଆଣିଲେ ଆହୁରି ସଙ୍ଗୀନ ଅଭିଯୋଗ । ପରବର୍ତ୍ତୀ ମୁଖ୍ୟମନ୍ତ୍ରୀ ହେବାକୁ ଚାହୁଁଥିବା ବ୍ୟକ୍ତିମାନେ ନବ ଦାସଙ୍କ ହତ୍ୟାକାଣ୍ଡରେ ସମ୍ପୃକ୍ତ ଥାଇପାରନ୍ତି ବୋଲି ଅଭିଯୋଗ କଲେ ପ୍ରଦୀପ ପୁରୋହିତ । ଯାହାକି ବିଜେଡିର ଆଭ୍ୟନ୍ତରୀଣ କନ୍ଦଳ ଯୋଗୁଁ ଏହି ହତ୍ୟାକାଣ୍ଡ ହୋଇଥାଇପାରେ ବୋଲି ଆଉ ଏକ ବାର୍ତ୍ତା ମଧ୍ୟ ଦେଲା । ଯାହାକି ଶାସକ ବିଜେଡିକୁ ବେଶ୍ ବିବ୍ରତ କରିଦେଇଛି। କିଛି ଦିନର ନୀରବତା ପରେ ଖୋଦ୍ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଘଟଣାର ସିବିଆଇ ତଦନ୍ତ ଦାବି କରିବା ବିଜେଡିକୁ ଏବେ ଆହୁରି ଅସୁବିଧାରେ ପକାଇ ଦେଇଛି । ଏସବୁ ପରେ ରାଜ୍ୟ ବିଜେପି ଏହି ଘଟଣା ନେଇ ଏବେ ରାଜ୍ୟ ବ୍ୟାପୀ ୩ ଦିନିଆ ଆନ୍ଦୋଳନ କରିବାକୁ ନିଷ୍ପତ୍ତି ନେଇଛି। ଯାହାକି ଏକ ସୁଚିନ୍ତିତ ରଣନୀତିର ଅଂଶବିଶେଷ ପରି ଜଣାପଡ଼ୁଛି ।
ଏବେ ଦେଖିବାର କଥା ଯେ, ୫ କେଜି ଚାଉଳ କାଟିବା ଓ ନବ କିଶୋର ଦାସଙ୍କ ହତ୍ୟା ପ୍ରସଙ୍ଗ କେଉଁ ଘଟଣା ଲୋକଙ୍କୁ ଅଧିକ ପ୍ରଭାବିତ କରୁଛି ? ପେଟ୍ରୋଲ, ଡିଜେଲ,ରନ୍ଧନ ଗ୍ୟାସର ଦରବୃଦ୍ଧି ବେଳେ କେନ୍ଦ୍ର ସରକାର ବିରୋଧରେ ପ୍ରତିବାଦ ନକରି ନିରବ ରହିବା ପରେ ବିଜେଡିର ଚାଉଳ କାଟିବା ପ୍ରସଙ୍ଗକୁ ଲୋକେ ଗ୍ରହଣ କରିବେ ତ ? ୨୦୧୯ ପର ଠାରୁ କେନ୍ଦ୍ର ବିରୋଧରେ ଚୁପ୍ ରହିଥିବା ବିଜେଡିର ସ୍ୱର ଲୋକଙ୍କ ପାଖରେ ପହଞ୍ଚିବ ତ ? ଅନ୍ୟପକ୍ଷରେ ବିଜେଡିର ଶୀର୍ଷ ନେତୃତ୍ୱ ବିରୋଧରେ ଏକ ରକମ ପାଟି ଖୋଲୁ ନଥିବା ରାଜ୍ୟ ବିଜେପିର ଶୀର୍ଷ ନେତୃତ୍ୱ ଏବେ ପୂର୍ବତନ ମନ୍ତ୍ରୀ ନବ କିଶୋର ଦାସଙ୍କ ହତ୍ୟା ଘଟଣା ବାବଦରେ ମୁହଁ ଖୋଲିବା ଘଟଣା ଲୋକଙ୍କୁ ପ୍ରଭାବିତ କରିପାରିବ ତ ?
