ଆହେ ମହାବାହୁ

ତୁମକୁ ଦେଖିବା ପାଇଁ
(ମୋର) ମନ ହୁଏ ହାଇଁପାଇଁ
ପହଞ୍ଚି ପାରୁନି ମୁଁ ଯେ ତୁମରି ଠେଇଁ ।

ମୋ ମନର ବ୍ୟାକୁଳତା
ହୃଦୟର ଅସ୍ଥିରତା
ଭାଙ୍ଗି ପାରୁନାହିଁ କିଆଁ ତୁମ ନିରବତା ?

କେମିତି ଜିଇଁବି ଜୀବନ
ନଥିଲେ ତୁମ ସ୍ପନ୍ଦନ
ସଂସାରଟା ପରା ଏଠି ଶୁଷ୍କ ମରୁଦ୍ୟାନ ।

ତୁମେ ଯଦି ନଚାହିଁବ
ଭେଳା ମୋର ବୁଡ଼ିଯିବ
ଜଗତରୁ ମୋତେ ଆଉ କିଏ ଉଦ୍ଧାରିବ ?

କେତେ ଗର୍ବ ଅହଂକାର
କ୍ଷମତାରେ ମାତବର
ମଣିଷ ପାରୁନି ବୁଝି ସେ ନିମିତ୍ତ ମାତର ।

ତୁମକୁ ଲଭିବା ପାଇଁ
ଏ ଜୀବନେ ଧାଇଁ ଧାଇଁ
ଅବଶେଷେ ଥକିଯାଇ ପଡିଵିକି ଶୋଇ ।

ତୁମ ଗୁଣ ଗାଉ ଗାଉ
ଏ ଜୀବନ ବିତିଯାଉ
ଅସ୍ତିତ୍ୱ ତୁମ ସତ୍ତାରେ ଲୀନ ହୋଇ ଯାଉ ।

ଆହେ ମହାବାହୁ ।