ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୩୦ ଅପ୍ରେଲ ୨୦୨୪
ଓହୋଃ କି ଅସମ୍ଭାଳ ତାତି
ରୌଦ୍ରତାପରୁ କେବେ ମିଳିବ ବିରତି
ଡ଼ହ ଡ଼ହ ଖରାରେ ଭିଜି
ଟକମକ ଫୁଟୁଛି ଆଜି
ରାଜଧାନୀର ସୁଶୋଭିତ କଂକ୍ରିଟଭରା ଛାତି ।। ୧ ।।
ଓହୋଃ କି ଅସମ୍ଭାଳ ତାତି
ଅଟକି ଯାଉଛି ଏଠି ଜୀବନର ଗତି
ପ୍ରଚଣ୍ଡ ଗ୍ରୀଷ୍ମ ପ୍ରବାହ ଦେଉଛି ଭାଜି
ସମଗ୍ର ଓଡ଼ିଶା ଏବେ ଯାଉଛି ସିଝି
ଅସ୍ତବ୍ୟସ୍ତ ଜୀବନ ଖୋଜୁଛି ଟିକିଏ ଆଶ୍ୱସ୍ତି ।। ୨ ।।
ଓହୋଃ କି ଅସମ୍ଭାଳ ତାତି
କାହିଁକି ଉପୁଜିଛି ଆଜି ଏଭଳି ଦୁର୍ଗତି
ବିକାଶ ନାମରେ ଆମେ ସାଜିଛୁ ପାଜି
ଜଙ୍ଗଲ ସଫା କରିଛୁ ଦେଇ ଆଖିବୁଜି
ସବୁଜିମା ହଟାଇ ଗଢୁଛୁ କଂକ୍ରିଟସ୍ତୂପ ନିତି ।। ୩ ।।
ଓହୋଃ କି ଅସମ୍ଭାଳ ତାତି
ଲୋପ ପାଉ ତଥାକଥିତ ବିକାଶର ପ୍ରୀତି
ପ୍ରକୃତିର ତାଣ୍ଡବଲୀଳାକୁ ହେଜି
ନୈସର୍ଗିକ ପରିବେଶର ପୂଜାରୀ ସାଜି
ସନ୍ତୁଳିତ ପ୍ରଗତି ଦିଗରେ କରିବା ଅଗ୍ରଗତି ।। ୪ ।।
ଓହୋଃ କି ଅସମ୍ଭାଳ ତାତି
କେମିତି ମିଳିବ ଗ୍ରୀଷ୍ମରୁ ତୁରନ୍ତ ମୁକତି
ଅଲୋଡ଼ା ଖାଲି ଜାଗାମାନ ଖୋଜି
ତହିଁରେ ଭରିଲେ ପ୍ରକୃତିର ଶୋଭାରାଜି
ମିଳିବ ଆମକୁ ଏହି ଜ୍ୱାଳାରୁ ନିସ୍କୃତି ।। ୫ ।।
