ଡ଼କ୍ଟର ଷ୍ଟାଲିନ ମିଶ୍ର, ଭୁବନେଶ୍ୱର, ୨୬ ଅପ୍ରେଲ ୨୦୨୪
ଜାଗ୍ରତ ହୁଅ ସୁପ୍ତ ସାଧବ ମାତୃଭୁମିର ଟେକ ପାଇଁ,
ପୂରୁବ ଗୌରବ ବୀରତ୍ବର ଗାଥା ଆଉ କଣ ତୋର ମନେନାହିଁ
ପାସୋରିଗଲୁ କି ପୂର୍ବଜ ତୋର ଗଙ୍ଗା ଗୋଦାବରୀ କରିଥିଲେ ଜୟ
ଜଗନ୍ନାଥ ତୋର ଆରାଧ୍ୟ ଦେବତା କରୁତୁ କାହିଁକି ମିଛ ଭୟ
ଧମନୀରେ ତୋର ବହୁଛି ଯାହାର ରକତ ସେଥିଲେ ସମସ୍ତେ ସୁରବୀର
ବକ୍ସି ଜଗବନ୍ଧୁ ଜୟୀରାଜଗୁରୁ ଐର ଖାରବେଳକୁ ତୁ ସୁମନ କର
କଳାରେ ଉତ୍କର୍ଷ ବୋଲି ତୋର ମାଟି ଉତ୍କଳ ରାଇଜ ବୋଲାଇଛି
ସମଗ୍ର ଜଗତେ ତୋର ମାଟି ପରି ଦେଖା ଆଉ କେଉଁ ଦେଶ ଅଛି
ରତ୍ନଗର୍ଭା ମା ମାଟି ଆଜି ତୋର ଶ୍ରୀହୀନ ଲୁଣ୍ଠିତ ନିର୍ଯାତିତ
ଦାୟାଦ ତାର ଆଜି ବିଦେଶୀ ପାଖରେ ମଥାନତ ତଥା ସମର୍ପିତ
ଗୃହବନ୍ଦୀ ତୋର ନରପତି ଆଜି ଅପଙ୍ଗ ଲାଚାର ସମ୍ମୋହିତ
କାଂଚିବିଜୟର ପ୍ରତିଶୋଧ ପାଇଁ ତୁ ଆଜି ଶୋଷିତ ଲୁଣ୍ଠିତ ପ୍ରତାରିତ
ଜାଗ୍ରତ ହୁଅ ସୁପ୍ତ ସାଧବ ସ୍ବାଭିମାନ ତୁମେ ଫେରିପାଅ
ପରପିଢ଼ି ପାଇଁ ଅସ୍ମିତା ବଞ୍ଚାଇ ନୂଆ କୀର୍ତ୍ତିରାଜି ଗଢିଯାଅ
କ୍ରୀତଦାସ ନୁହେଁ ମୋ ଜାତି ଓଡ଼ିଆ ବୀରତ୍ଵଆମର ପରିଚୟ
ପଥର ଦେହରେ ଜୀବନ୍ୟାସ ଦେଇ କରିଛୁ କଳିଙ୍ଗ କିର୍ତିମୟ
ମନ୍ଦିରମାଳିନୀ ସବୁଜ ବନାନୀ ରତ୍ନଗର୍ଭା ତାର ମହୋଦଧି
ଉତ୍କଳ ଜନନୀ ସନ୍ତାନ ଆମେରେ କିଏ ଅଛି ଆମ ପ୍ରତିବାଦୀ
ସ୍ବାର୍ଥ ଭୁଲି ତୁମେ ଗଢ଼ରେ କୋଣାର୍କ ବିଶ୍ୱରେ ଉଡ଼ିବ ବିଜୟବାନା
ପରାକ୍ରମ ଆମ ଜଗତ ଦେଖିବ ଚକିତ ନୟନେ ବ୍ୟର୍ଥ କାମନା
ଜାଗ୍ରତ ହୁଅ ସୁପ୍ତ ସାଧବ ଉଠଉଠ ଆଉ ବେଳ ନାହିଁ
ବୋଇତ ବନ୍ଦାଣ ଉଛୁର ହେଲାଣି ବାଲିଦ୍ୱୀପ ଯିବାପାଇଁ
କେତେ ଆଉ ତୁମେ ଦାଦନ ଖଟିବ ପରରାଇଜରେ ପେଟପାଇଁ
ମାଟି ମା ଆଜି ଡାକୁଛି ତୁମକୁ ସ୍ୱଦେଶକୁ ଫେରି ଆସ ଧାଇଁ
