ମାନସ ରଞ୍ଜନ ମହାପାତ୍ର, ପୁରୀ, ୮ ଜୁଲାଇ ୨୦୨୩
କାହିଁକି ସବୁ ଘଟଣା ଘଟିସାରିଥାଏ
ମୁଁ ପହଁଞ୍ଚିବା ଆଗରୁ ?
ସରିଯାଇଥାଏ ସଭା
ଭାଷଣ ଦେଇସାରିଥାନ୍ତି ସଭାପତି
ଗାଡ଼ି ପରବର୍ତ୍ତୀ ଷ୍ଟେସନ ବି ଡେଇଁ ସାରିଥାଏ
ସବୁ ନିଯୁକ୍ତି ପତ୍ର ଜାରି ହୋଇସାରିଥାଏ ଓ ମୁଁ
ଚିରକାଳ ଥାଏ ପ୍ରତୀକ୍ଷା ସୂଚୀରେ
ଘରମାନେ ବିକ୍ରି ସରିଥାନ୍ତି ଓ ମୁଁ
ଥାଏ ଗୃହହୀନ
ସରିଯାଇଥାଏ ନିର୍ବାଚନ
ବଢ଼ି ଯାଇଥାଏ ଦରଦାମ୍
ଗଢ଼ା ହୋଇସାରିଥାଏ ମନ୍ତ୍ରୀମଣ୍ଡଳ
ମୁଁ ପହଁଞ୍ଚିବା ଆଗରୁ
ଶପଥ ନେଇ ସାରିଥାନ୍ତି ମୁଖ୍ୟମନ୍ତ୍ରୀ
କାହିଁକି ଘଟିସାରିଥାଏ ସବୁ ଘଟଣା
ମୁଁ ପହଁଞ୍ଚିବା ଆଗରୁ
କାହିଁକି? କାହିଁକି?
କେହି ଦେଉନଥାନ୍ତି ଉତ୍ତର ଓ
ଗଡ଼ି ଚାଲିଥାଏ ଅସରନ୍ତି ସମୟ ।।
