ପ୍ରଭୁକଲ୍ୟାଣ ମହାପାତ୍ର , ୨୦ ସେପ୍ଟେମ୍ବର ୨୦୨୨
ଶରତ କୁମାର କର ହେଉଛନ୍ତି ଅର୍ଦ୍ଧ ଶତାବ୍ଦୀର ଇତିହାସ । ସେ ଏହି ଧାରାରେ ଜଣେ ବିଶିଷ୍ଟ ରାଜନୀତିଜ୍ଞ, ସୁନିପୁଣ ଲେଖକ ଓ ଅପ୍ରତିଦ୍ବନ୍ଦି ବକ୍ତା ଥିଲେ । ଆଦ୍ୟ ଯୌବନ ଅର୍ଥାତ୍ ମାତ୍ର ୩୨ବର୍ଷ ବୟସରେ ସେ ରାଜ୍ୟର ଗୁରୁତ୍ୱପୂର୍ଣ ଶିକ୍ଷା, ସସ୍କୃତି ଭଳି ବିଭାଗରେ କ୍ୟାବିନେଟ ମନ୍ତ୍ରୀ ହେବାର ସୌଭାଗ୍ୟ ଅର୍ଜନ କରିଥିଲେ । ପ୍ରଖ୍ୟାତ ସାହିତ୍ୟିକ ଭାବରେ ଅନେକ ଉପାଦେୟ ପୁସ୍ତକ ରଚନା କରି ସେ ଯଥେଷ୍ଟ ସୁନାମ ଅର୍ଜନ କରିଥିଲେ । ତେଣୁ ତାଙ୍କର ବିୟୋଗ ପରିବାର ତଥା ସମସ୍ତ ରାଜ୍ୟ ପାଇଁ ଅପୂରଣୀୟ କ୍ଷତି ବୋଲି ଓଡ଼ିଶା ବିଧାନସଭାରେ ଆଗତ ଶୋକ ପ୍ରସ୍ତାବରେ କୁହାଯାଇଛି ।
ପୂର୍ବତନ ମନ୍ତ୍ରୀ, ସାଂସଦ ତଥା ବାଚସ୍ପତି ଶରତ କୁମାର କରଙ୍କ ବିୟୋଗରେ ୨୦୨୦ ନଭେମ୍ବର ୨୦ ତାରିଖ ଦିନ ଓଡ଼ିଶା ବିଧାନସଭାରେ ଏକ ଶୋକ ପ୍ରସ୍ତାବ ଆସିଥିଲା । ଗୃହର ନେତା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେହି ଶୋକ ପ୍ରସ୍ତାବଟି ଆଗତ କରି ଦର୍ଶାଇଥିଲେ ଯେ, ସ୍ବର୍ଗତ କର ୧୯୩୯ ସେପ୍ଟେମ୍ବର ୫ ତାରିଖରେ କଟକ ସହର ଅନ୍ତର୍ଗତ ଅଲିଶା ବଜାରରେ ଜନ୍ମ ଗ୍ରହଣ କରିଥିଲେ । ୧୯୭୭ ମସିହାରେ କଟକ ଆସନରୁ ଷଷ୍ଠ ଲୋକସଭାକୁ ନିର୍ବାଚିତ ହୋଇଥିବା ଶରତ ବାବୁ ୧୯୭୧, ୧୯୯୦ ଓ ୨୦୦୦ ମସିହାରେ ମାହାଙ୍ଗା ନିର୍ବାଚନ ମଣ୍ଡଳୀରୁ ମୋଟ ତିନି ଥର ଲାଗି ଓଡ଼ିଶା ବିଧାନସଭାକୁ ପ୍ରତିନିଧିତ୍ୱ କରିଥିଲେ । ସେ ଶିକ୍ଷା, ପର୍ଯ୍ୟଟନ, ସୂଚନା ଓ ଲୋକ ସମ୍ପର୍କ, କ୍ରୀଡ଼ା, ସଂସ୍କୃତି ଓ ଯୁବ ସେବା ଭଳି ଗୁରୁତ୍ୱପୂର୍ଣ୍ଣ ବିଭାଗରେ ମନ୍ତ୍ରୀ ଭାବରେ ରାଜ୍ୟ ପାଇଁ କାର୍ଯ୍ୟ କରିଥିଲେ । ଅନ୍ୟ ପକ୍ଷରେ ଅନେକ ପୁସ୍ତକର ରଚୟିତା ସ୍ବର୍ଗତ କର ୨୦୦୦ ମସିହାରେ ଓଡ଼ିଶା ବିଧାନସଭାର ମର୍ଯ୍ୟାଦାଜନକ ବାଚସ୍ପତି ପଦବୀ ଅଳଙ୍କୃତ କରିଥିଲେ ।
ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ତାଙ୍କ ବକ୍ତବ୍ୟରେ ଉଲ୍ଲେଖ କରିଥିଲେ ଯେ, ଶରତ କୁମାର କର ହେଉଛନ୍ତି ଅର୍ଦ୍ଧ ଶତାବ୍ଦୀର ଇତିହାସ । ଶିକ୍ଷା ସମାପ୍ତି ପରେ ହିଁ ତତକ୍ଷଣାତ୍ ରାଜନୀତିରେ ପ୍ରବେଶ କରିଥିବା ସ୍ବର୍ଗତ କର ୧୯୭୧ ମସିହାରେ ବିଜୁ ବାବୁଙ୍କ ଦ୍ୱାରା ପ୍ରତିଷ୍ଠିତ ଉତ୍କଳ କଂଗ୍ରେସ ଦଳରେ ଯୋଗ ଦେଇଥିଲେ । ସେହି ଦଳର ସରକାର ରେ ଦୁଇଜଣ ଯୁବ ମନ୍ତ୍ରୀଙ୍କ ମଧ୍ୟରେ ସେ ଅନ୍ୟତମ ମନ୍ତ୍ରୀ ଥିଲେ । ବହୁମୁଖୀ ପ୍ରତିଭାର ଅଧିକାରୀ ସ୍ବର୍ଗତ କର ଜଣେ ବିଶିଷ୍ଟ ରାଜନୀତିଜ୍ଞ, ସୁନିପୁଣ ଲେଖକ, ପ୍ରଥିତଯଶା ସାହିତ୍ୟିକ ଓ ସର୍ବୋପରି ଲୋକପ୍ରିୟ ରାଜନେତା ଥିଲେ । ସ୍ମୃତି ଚାରଣ କରି ବାଚସ୍ପତି ଶ୍ରୀ ପାତ୍ର କହିଲେ, ମୁଁ ତାଙ୍କ ସହିତ ମନ୍ତ୍ରୀ ଥିବାବେଳେ ସେ ଥରେ ମତେ ତାଙ୍କ ନିର୍ବାଚନମଣ୍ଡଳୀ ମାହାଙ୍ଗାକୁ ଡାକି ନେଇଥିଲେ । ସେତେବେଳେ ମାହାଙ୍ଗାର ଲୋକ କହୁଥିଲେ, “ଘରକୁ ଘର ଶରତ କର”, “ଚୁଲିକୁ ଚୁଲି – ମତଲୁବ ଅଲ୍ଲୀ” । ଏହା ଥିଲା ସେତେବେଳେ ମାହାଙ୍ଗା ଲୋକ ମାନଙ୍କର ସ୍ଲୋଗାନ୍ । ସେ ଅନେକ ଉପାଦେୟ ପୁସ୍ତକ ରଚନା କରି ବେଶ ସୁନାମ ଅର୍ଜନ କରିଥିଲେ । ବିରୋଧୀ ଦଳର ନେତା ପ୍ରଦୀପ୍ତ କୁମାର ନାୟକ ଶୋକ ପ୍ରସ୍ତାବକୁ ସମର୍ଥନ କରି ମୁଖ୍ୟମନ୍ତ୍ରୀଙ୍କ ବକ୍ତବ୍ୟ କୁ ଦୋହରାଇଥିଲେ । ଅନ୍ୟ ପକ୍ଷରେ ବହୁ ଲୋକପ୍ରିୟ ପୁସ୍ତକର ରଚୟିତା ସ୍ବର୍ଗତ କର ରାଜ୍ୟର ଜଣେ ସୁବକ୍ତା ଥିଲେ ବୋଲି କହିଥିଲେ ।
କଂଗ୍ରେସ ଦଳର ନେତା ନରସିଂହ ମିଶ୍ର ଦର୍ଶାଇଥିଲେ ଯେ, ଶରତ କୁମାର କରଙ୍କ ଦେହାନ୍ତରେ ମୁଁ ମୋର ଜଣେ ଘନିଷ୍ଠ ବନ୍ଧୁ ତଥା ସହଯୋଗୀଙ୍କୁ ହରାଇଲି । ସେ ତାଙ୍କ ନିଜସ୍ୱ କ୍ଷେତ୍ରରେ ଯଥେଷ୍ଟ ଯଶ ଓ ସୁନାମ ଅର୍ଜନ କରିଥିଲେ । ତାଙ୍କ ବିୟୋଗରେ ଜନସାଧାରଣ ସେମାନଙ୍କର ଜଣେ ଲୋକପ୍ରିୟ ନେତାଙ୍କୁ ହରାଇଲେ ବୋଲି ସେ ସ୍ପଷ୍ଟ କରିଥିଲେ ।
ସର୍ବୋପରି ବିଧାନସଭାର ଏକମାତ୍ର ସି.ପି.ଆଇ.(ଏମ୍) ବିଧାୟକ ଲକ୍ଷ୍ମଣ ମୁଣ୍ଡା ସ୍ୱର୍ଗତ କରଙ୍କ ନିଧନରେ ଗଭୀର ଦୁଃଖ ପ୍ରକଟ କରିଥିଲେ । ଅପରପକ୍ଷେ ଗୃହର ସମବେଦନା ଶୋକସନ୍ତପ୍ତ ପରିବାର ବର୍ଗଙ୍କୁ ଜଣାଇ ଦେବା ଲାଗି ସେ ବାଚସ୍ପତିଙ୍କୁ ନିବେଦନ କରିଥିଲେ ।
ଶେଷରେ ଦିବଂଗତ ଆତ୍ମାର ସଦ୍ ଗତି କାମନା କରି ବିଧାନସଭାରେ ଗୋଟିଏ ମିନିଟ୍ ନିରବ ପ୍ରାର୍ଥନା କରାଯାଇଥିଲା ।
ଅନୁରୂପ ଭାବେ ୨୦୨୧ ମସିହା ମାର୍ଚ୍ଚ ୮ ତାରିଖରେ ଲୋକସଭା ପକ୍ଷରୁ ଶରତ କୁମାର କର ଙ୍କ ତିରୋଧାମରେ ଶୋକ ପ୍ରସ୍ତାବ ଆଗତ ହୋଇଥିଲା । ଉକ୍ତ ପ୍ରସ୍ତାବ ରେ ଲୋକ ସଭାର ବାଚସ୍ପତି ଉଲ୍ଲେଖ କରିଥିଲେ, “ଶ୍ରୀ ଶରତ କୁମାର କର ଷଷ୍ଠ ଲୋକସଭାର ସଦସ୍ୟ ଥିଲେ । କଟକ ସଂସଦୀୟ ନିର୍ବାଚନ ମଣ୍ଡଳୀରୁ ଲୋକସଭାକୁ ପ୍ରତିନିଧିତ୍ବ କରିଥିବା ଏହି ନେତା ତିନି ଥର ପାଇଁ ଓଡ଼ିଶା ବିଧାନସଭା କୁ ନିର୍ବାଚିତ ହୋଇଥିଲେ ଏବଂ ବିଧାନସଭାର ବାଚସ୍ପତି ରୂପେ କାର୍ଯ୍ୟ ସମ୍ପାଦନ କରି ଗୌରବ ମଧ୍ୟ ଅର୍ଜନ କରିଥିଲେ । ଏତଦ୍ ଭିନ୍ନ ସେ ବିଭିନ୍ନ ବିଭାଗର ମନ୍ତ୍ରୀ ଭାବରେ ଓ ବିଧାନସଭା କମିଟିର ଅଧ୍ୟକ୍ଷ ରୂପେ ମଧ୍ୟ ଦକ୍ଷତାର ସହିତ ଦାୟିତ୍ୱ ନିଭାଇ ଥିଲେ । ଶ୍ରୀ ଶରତ କୁମାର କର ୨୦୨୦ ମସିହା ଅକ୍ଟୋବର ୧୨ ତାରିଖ ଦିନ ୮୨ ବର୍ଷ ବୟସରେ ଭୁବନେଶ୍ୱରରେ ପରଲୋକ ଗମନ କରିଥିଲେ ।
