ଶ୍ରୀ ଦାଶରଥୀ ଶତପଥୀ, ଭୁବନେଶ୍ଵର, ୧୨ ଅକ୍ଟୋବର ୨୦୨୩
ଚାହୁଁ ଚାହୁଁ ତିନି ବର୍ଷ ହୋଇଗଲା, ବିଶ୍ୱାସ କରି ହେଉନି I ଓଡିଆ ଜାତି, ଓଡିଆ ଭାଷା, ଉତ୍କଳୀୟ ସଂସ୍କୃତି ଓ ପରଂପରାକୁ ଭଲ ପାଉଥିବା ପ୍ରଚଣ୍ଡ ପ୍ରତିଭାର ଅଧିକାରୀ ପୂର୍ବତନ ବାଚସ୍ପତି ଶ୍ରୀ ଶରତ କୁମାର କର ଆମ ଠାରୁ ଚିର ବିଦାୟ ନେଇଥିଲେ ତା. ୧୨.୧୦.୨୦୨୦ ମସିହା I ସେ ଜଣେ ଜନପ୍ରିୟ ନେତା, ପ୍ରବୀଣ ରାଜନୀତିଜ୍ଞ, ସ୍ତମ୍ଭକାର, ବାଗ୍ମୀ, ଜଗନ୍ନାଥ ସାହିତ୍ୟ ଓ ଭଞ୍ଜ ସାହିତ୍ୟର ପ୍ରବକ୍ତାଭାବେ ସମସ୍ତ ଓଡିଆମାନଙ୍କ ପାଖରେ ପରିଚିତ I ମାତୃଭୂମି, ମାତୃଭାଷାକୁ ପ୍ରାଣଭଳି ଭଲ ପାଉଥିବା ଶିକ୍ଷା, ସଂସ୍କୃତି ନୈତିକ ମୂଲ୍ୟବୋଧର ପୂଜାରୀ ଶ୍ରୀ କର ପିଲାଦିନୁ ରେଭେନସା କଲିଜିଏଟ, ରେଭେନସା କଲେଜ ଓ ପରେ ଆଲ୍ଲାହାବାଦ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ଅଧ୍ୟୟନ କଲାବେଳେ ତତକାଳୀନ ପ୍ରଧାନମନ୍ତ୍ରୀ ଲାଲବାହାଦୂର ଶାସ୍ତ୍ରୀଙ୍କ ପ୍ରେରଣାରେ ରାଜନୀତିରେ ପ୍ରବେଶ କରିଥିଲେ I ପ୍ରଥମେ କିଛି ଦିନ ଆଲ୍ଲାହାବାଦରେ ଅଧ୍ୟାପକଭାବେ ଯୋଗଦାନ ଓ ପରେ ଖୋର୍ଦ୍ଧା ପ୍ରାଣନାଥ ମହାବିଦ୍ୟାଳୟରେ ଅଧ୍ୟାପନାବେଳେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କୁ ତାଙ୍କ ରାଜନୈତିକ ଆଦର୍ଶଭାବେ ନେଇ ଓଡିଶା ରାଜନୀତିରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ I
୧୯୭୧ ମସିହାରେ ସର୍ବକନିଷ୍ଠ କ୍ୟାବିନେଟ୍ ମନ୍ତ୍ରୀଭାବେ ବିଶ୍ୱନାଥ ଦାସଙ୍କ ମନ୍ତ୍ରିମଣ୍ଡଳରେ ଶିକ୍ଷା, ସଂସ୍କୃତି, ଯୁବ କଲ୍ୟାଣ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ନେଇ ଶିକ୍ଷା ବିଭାଗରେ ଉନ୍ନତି ପାଇଁ ଅନେକ ସଂସ୍କାରମୂଳକ ପଦକ୍ଷେପ ନେଇ ଓଡିଶାରେ ଏକ ଚର୍ଚ୍ଚିତ ବ୍ୟକ୍ତିତ୍ୱ ପାଲଟି ଯାଇଥିଲେ I
୧୯୭୭ ମସିହାରେ ଜରୁରୀକାଳୀନ ପରିସ୍ଥିତିବେଳେ ସର୍ବଭାରତୀୟ ଜନତା ଦଳର ଅନ୍ୟତମ ପ୍ରତିଷ୍ଠାତା ସଦସ୍ୟ ଥିଲେ ଏବଂ କଟକ ଲୋକସଭା ନିର୍ବାଚନମଣ୍ଡଳୀରୁ ବିପୁଳ ସଂଖ୍ୟାରେ ବିଜୟୀ ହୋଇ ମୋରାରଜୀ ଦେଶାଇ ସରକାରରେ ଜଣେ ଦକ୍ଷ ସାଂସଦଭାବେ ନିଜକୁ ପ୍ରତିଷ୍ଠିତ କରିପାରିଥିଲେ ଏବଂ ବିଭିନ୍ନ ବିଭାଗର ଖର୍ଚ୍ଚଦାବୀ ଉପରେ ଆଲୋଚନାରେ ଭାଗନେଇ ତାଙ୍କ ବାଗ୍ମୀତାର ପରିଚୟ ଦେଇଥିଲେ I ବିଧାନସଭାରେ ମନ୍ତ୍ରୀ ଓ ବିଧାୟକଥିବାବେଳେ ଗୃହରେ ତାଙ୍କର ବିବରଣୀ ଅତି ଉଚ୍ଚଧରଣର ଥିଲା I ବିଜୁବାବୁ ମନ୍ତ୍ରିମଣ୍ଡଳରେ ସୂଚନା ଓ ଲୋକସଂପର୍କ, କ୍ରୀଡ଼ା, ଯୁବସେବା ଓ ପର୍ଯ୍ୟଟନ ବିଭାଗ ମନ୍ତ୍ରୀଭାବେ ରହି ସ୍ୱଳ୍ପ ସମୟ ଭିତରେ ବିଭାଗଗୁଡିକର କାର୍ଯ୍ୟକୁ ତ୍ୱରାନ୍ୱିତ କରିଥିଲେ I
ଚଳିତ ଶତାଦ୍ଦୀର ପ୍ରଥମ ଭାଗରେ ବିଧାନସଭାର ବାଚସ୍ପତିଭାବେ ଯୋଗଦେଇ ବିଧାନସଭାକୁ ସଂସ୍କାରିତ କରିବା ପାଇଁ ଶତତଚେଷ୍ଟିତ ଥିଲେ ଓ ସେଥିରେ ସଫଳ ହୋଇଥିଲେI ସରକାରୀ ଦଳ ହେଉ ବା ବିରୋଧି ଦଳ ହେଉ ତାଙ୍କର ନିରପେକ୍ଷତା ପାଇଁ ସେ ଭୁରି ଭୁରି ପ୍ରଶଂସା ପାଇଛନ୍ତି I ବାଚସ୍ପତିସମୟରେ ବିଭିନ୍ନ ରାଜ୍ୟଗୋଷ୍ଠୀ ସଂସଦୀୟ ସମ୍ମିଳନୀରେ ଭାଗନେଇ ନିଜର ବାଗ୍ମିତାର ପରିଚୟ ଦେଇ ରାଜ୍ୟକୁ ଗୌରବାନ୍ୱିତ କରିଛନ୍ତିI ତାଙ୍କ ବାଚସ୍ପତି ସମୟରୁ ତାଙ୍କ ଉଦ୍ୟମରେ ବିଧାୟକମାନଙ୍କୁ ଉତ୍ସାହିତ କରିବା ସଙ୍ଗେ ସଙ୍ଗେ ପୂଜ୍ୟପୂଜାର ସମ୍ମାନାର୍ଥେ ପ୍ରତିବର୍ଷ ଉତ୍କଳ ଗୌରବ ମଧୁସୂଦନ, ଉତ୍କଳମଣୀ ଗୋପବନ୍ଧୁ, ପୂର୍ବତନ ବାଚସ୍ପତି ପଣ୍ଡିତ ନୀଳକଣ୍ଠଙ୍କ ନାମରେ ଶ୍ରେଷ୍ଠ ବିଧାୟକ ପୁରସ୍କାର ଦିଆଯାଇ ସମ୍ମାନିତ କରାଯାଉଅଛି I
ଅନେକ ଭାଷାରେ ପାଣ୍ଡିତ୍ୟ ଲାଭ କରିଥିବା ଶ୍ରୀ କର କେବଳ ରାଜ୍ୟରେ ନୁହେଁ ରାଜ୍ୟବାହାରେ ଦେଶ ବିଦେଶରେ ଜଗନ୍ନାଥ ସଂସ୍କୃତିର ପ୍ରଚାର କରିଆସିଛନ୍ତିI ଶ୍ରୀ ଜଗନ୍ନାଥଙ୍କ ରଥଯାତ୍ରା ସମୟରେ ଆକାଶବାଣୀ ଓ ଦୂରଦର୍ଶନରେ ତାଙ୍କର ଧାରା ବିବରଣୀ ଅତି ଉଚ୍ଚକୋଟୀର I ଏହାବ୍ୟତୀତ ଭଞ୍ଜସାହିତ୍ୟ, ଗଣକବି ସାହିତ୍ୟକୁ ସେ ଓଡ଼ିଶାର ଘରେ ଘରେ ପରିଚିତ କରିବା ପାଇଁ ଆପ୍ରାଣ ଚେଷ୍ଟା କରିଥିଲେ I
ଅସାମାନ୍ୟ ସାରସ୍ୱତ ପ୍ରତିଭାର ଅଧିକାରୀ ଶ୍ରୀ କର ଅଜସ୍ର କବିତା ରଚନା କରି ତାକୁ ପୁସ୍ତକ ଆକାରରେ ସଙ୍କଳନ କରିଛନ୍ତି I ତାଙ୍କ ରଚନାରେ ସାମ୍ପ୍ରତିକ ଘଟଣା, ପ୍ରାଚୀନ ପରମ୍ପରା ପ୍ରତି ଅନୁରାଗର ଛାପ ରହିଛି I ଏଠାରେ ଏକ କବିତାର ପଂକ୍ତିକୁ ସ୍ମରଣ କରାଗଲେ ତାଙ୍କ ସୃଜନ ପ୍ରତିଭାକୁ ସହଜରେ ଅନୁମାନ କରିହେବ:-
“ଏ ମୋର ଲେଖନୀ ଦଧିଚିର ହାଡ଼,
ଶକୁନିର ଦୀର୍ଘଶ୍ୱାସ I
କାଳିଛାଡ଼ି ମୁହିଁ ରକ୍ତରେ ଲେଖୁଛି,
ଅନ୍ତଃଥରା ଇତିହାସ ”I
ଗଣତନ୍ତ୍ର, ଧର୍ମନିରପେକ୍ଷତା ପ୍ରତି ଥିଲା ତାଙ୍କର ବଳିଷ୍ଠ ଅଙ୍ଗୀକାରବଦ୍ଧତା I ବ୍ୟକ୍ତି ସ୍ୱାଧୀନତା ବିନା ଗଣତନ୍ତ୍ର ନାହିଁ, ଏହାଥିଲା ତାଙ୍କ ଜୀବନର ମୂଳମନ୍ତ୍ର, ଯାହା ସେ ତାଙ୍କ କବିତା “ସହିଦ ଶେଷୋକ୍ତି” ରେ ପ୍ରକାଶ କରିଛନ୍ତିI
ଦାରିଦ୍ର୍ୟ ଓ ଅସହାୟତା ପ୍ରତି ସେ ଥିଲେ ଅତ୍ୟନ୍ତ ସମ୍ୱେଦନଶୀଳ I ନିଜପାଇଁ ସେ ଯେତେ ଚିନ୍ତିତ ନଥିଲେ, ସାଧାରଣ ଲୋକଙ୍କପାଇଁ ସେ ବଞ୍ଚିଥିଲେ I ରାଜନୀତିର ଗତି ଓ ଦୁର୍ଗତିକୁ ସେ ସ୍ପଷ୍ଟଭାବେ ଅନୁଭବକରି ଗରିବ ଓ କ୍ଷୁଧାର୍ଥଙ୍କ ପାଇଁ ସେ ଦରୀଦ୍ରରବନ୍ଧୁ ପାଲଟି ଯାଇଥିଲେ ଯାହା ତାଙ୍କ କବିତାରୁ ଜଣାପଡ଼େ…
“ ‘ଗଣ’ର ଜୀବନ
‘ଜଣ’ର ବଞ୍ଚନା
ବିଦ୍ଧକରେ ଏ ମୋ ପ୍ରାଣେI
ଗଣର ବଞ୍ଚିବା
ସାର୍ଥକ ନ ଦେଖି,
ବଞ୍ଚିବିନି ହୋଇ ‘ଜଣେ’ “
(କବିତା ପୁସ୍ତକ – ଦ୍ରୁତ ବିଳମ୍ୱିତ – ଶରତ କର)
ସେ ଥିଲେ ଜଣେ ଆଦର୍ଶ ମଣିଷ I ତାଙ୍କ ସାଧାରଣ ମଣିଷ ଭିତରେ ଥିଲା ଅସାଧାରଣ ପ୍ରତିଭା I ଗରିବ ଅସହାୟ, ସାଧାରଣ ମଣିଷଠାରୁ ଆରମ୍ଭକରି ପ୍ରଧାନମନ୍ତ୍ରୀଙ୍କ ପର୍ଯ୍ୟନ୍ତ ମିଶିପାରିବାର ଦକ୍ଷତା ଥିଲା ତାଙ୍କର I ସାମ୍ପ୍ରତିକ ସ୍ଥିତିକୁ ଦେଖି ଭବିଷ୍ୟତର ମାର୍ଗ ପ୍ରସ୍ତୁତ କରି ପାରୁଥିବା ଅନନ୍ୟ ବ୍ୟକ୍ତିତ୍ୱର ଅଧିକାରୀ ଥିଲେ ଏବଂ ଜୀବନବ୍ୟାପୀ ଆଦର୍ଶ ଓ ସାଲିସ ବିହୀନ ମୂଲ୍ୟବୋଧରେ ବିଶ୍ୱାସ ରଖିଥିଲେ ଓ ସାଧାରଣ ଜନତାକୁ ଦିଗଦର୍ଶନ ଦେବାରେ ସେ ଅନ୍ୟତମ ରାଜନେତା ଥିଲେ I ସେ ତାଙ୍କର ଛାଡ଼ିଯାଇଥିବା ବିଚାରଧାରା ଓ ପରମ୍ପରା ସାମ୍ପ୍ରତିକ ସମୟରେ ପ୍ରାସଙ୍ଗିକ ହୋଇଉଠିଛି I ତାଙ୍କର ଆଦର୍ଶ ଓ ସଂସ୍କାରକୁ ନେଇ ଆମେ ସମସ୍ତେ ଆଗକୁ ବଢ଼ିବା ପାଇଁ ପ୍ରତିବଦ୍ଧ ହେବା ଦରକାର I
