ଡକ୍ଟର ଏକାଦଶୀ ପ୍ରଧାନ, ୯ ଡିସେମ୍ବର ୨୦୨୩
ଜନ୍ମ-ମୃତ୍ୟୁର ପରିସର ହିଁ ଜୀବନ । ଜନ୍ମ ପରେ ମୃତ୍ୟୁ ସ୍ୱାଭାବିକ । ମୃତ୍ୟୁ ଅନିବାର୍ଯ୍ୟ, ଅଲଂଘନୀୟ । ତଥାପି ବ୍ୟକ୍ତି ବଂଚିବା ଧାରାରେ ସ୍ଵୀୟ କାର୍ଯ୍ୟ ଶୈଳୀର ମାଧ୍ୟମରେ ମୃତ୍ୟୁଞ୍ଜୟୀ ହୋଇ ଯାଆନ୍ତି । ସେମାନେ ଭୌତିକ ଶରୀର ତ୍ୟାଗ କଲେ ବି ଲୌକିକ ଜଗତରେ ସଦା କୀର୍ତ୍ତି ଦେହରେ ଅବସ୍ଥାନ କରିଥାନ୍ତି । ସେଥିପାଇଁ ଉଲ୍ଲେଖ ଅଛି ‘ଯଶକୀର୍ତ୍ତି ସଜୀବତି ‘ ।
ମାହାଙ୍ଗାର ପୂର୍ବତନ ବିଧାୟକ ପ୍ରାକ୍ତନ ବାଚସ୍ପତି ଶରତ କୁମାର କରଙ୍କ ଧର୍ମପତ୍ନୀ, ପ୍ରସିଦ୍ଧ କଣ୍ଠଶିଳ୍ପୀ ପ୍ରଫେସର୍ ଅନିମା କରଙ୍କ ୮୨ ବର୍ଷ ବୟସରେ ଦେହାନ୍ତ ଆମକୁ କଷ୍ଟ ଦେଇଛି । ଇଂରାଜୀ ବିଭାଗର ଅଧ୍ୟାପିକା, ପ୍ରତିଷ୍ଠିତ କଣ୍ଠଶିଳ୍ପୀ ଶ୍ରୀମତୀ କର ଜଣେ ମିଷ୍ଟଭାଷୀ, ଛାତ୍ର ବତ୍ସଳା ଅଧ୍ୟାପିକା ଥିଲେ । ପ୍ରଥମେ ଶୈଳବାଳା ମହିଳା ମହାବିଦ୍ୟାଳୟ ପରେ ରମାଦେବୀ ଓ ପୁରୀ ମହିଳା ମହାବିଦ୍ୟାଳୟରେ କାର୍ଯ୍ୟ କରି ସେ ସମସ୍ତଙ୍କର ପ୍ରିୟ ଭାଜନ ହୋଇଥିଲେ । ଆକାଶବାଣୀ, ଦୂରଦର୍ଶନର ସ୍ସ୍ଵୀକୃତିପ୍ରାପ୍ତ କଣ୍ଠ ଶିଳ୍ପୀ ଭାବରେ ତାଙ୍କ ସୁମଧୁର କଣ୍ଠ ସଙ୍ଗୀତ ତାଙ୍କୁ ଅମର କରି ରଖିବ।
ପୂର୍ବତନ ବାଚସ୍ପତି ଶରତ କରଙ୍କ ପ୍ରତି ମୋର ପିଲାଦିନୁ ସମ୍ପର୍କ । ବହୁବାର ସହିଦ ନଗର ବାସ ଭବନ ଯାଇ ତାଙ୍କ ସହ ମିଶିବାର ସମ୍ପର୍କ ସେତୁରେ ବାନ୍ଧି ହୋଇଛୁ । ମହର୍ଷି କଲେଜରେ ପ୍ରଫେସର୍ ଶତୃଘ୍ନ ନାଥଙ୍କ ଶତବାର୍ଷିକୀ ଉତ୍ସବରେ ରଜତ କର ଓ ଶରତ କରଙ୍କୁ ମୁଁ ଆମନ୍ତ୍ରଣ କରେ ମୋ ସଭାପତିତ୍ୱରେ ଏକ ପ୍ରାର୍ଥନା ସାହିତ୍ୟ ସଭା ଭୁଲିବାର ନୁହେଁ । ଶରତ ବାବୁଙ୍କ ବାର୍ଦ୍ଧକ୍ୟ ଜନିତ ରୋଗ ସମୟରେ ଶ୍ରୀମତୀ କରଙ୍କ ସହିତ ଶେଷ ଥର ପାଇଁ ସାକ୍ଷାତ ହୋଇଥିଲା । ଉଭୟଙ୍କୁ ମୋର ମାହାଙ୍ଗାର ‘ବରପୁତ୍ର’ ୨ୟ ଖଣ୍ଡ ପୁସ୍ତକରେ ସ୍ଥାନିତ କରାଇ ନିଜକୁ ଧନ୍ୟ ମନେ କରିଛି ।
ବାସ୍ତବିକ ପ୍ରଫେସର ଅନିମା କର କେବଳ ସ୍ୱାମୀ ଶରତ କରଙ୍କ ମାର୍ଗ ଦର୍ଶକ ନଥିଲେ ହଜାର ହଜାର ଛାତ୍ରୀଙ୍କ ମାର୍ଗଦର୍ଶିକା ଥିଲେ । ସତ୍ୟନଗର ସ୍ମଶାନରେ ପ୍ରଫେସର କରଙ୍କ ଅନ୍ତିମ ସଂସ୍କାର ସମାହିତ ହୋଇଛି । କେବଳ ସମ୍ବଳ ହୋଇ ରହିଲା ସ୍ମୃତି ତର୍ପଣ। ସେହି ମହିୟସୀ କଣ୍ଠଶିଳ୍ପୀ ପ୍ରଫେସର ଅନିମା କରଙ୍କ ମହାନ୍ ଆତ୍ମା ର ଦେବଲୋକ ପ୍ରାପ୍ତି ହେଉ, ଏତିକି ପରମେଶ୍ବରଙ୍କ ନିକଟରେ ଆଜିର ପ୍ରାର୍ଥନା ।
