ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୧ ଅକ୍ଟୋବର ୨୦୨୨
ଗତ ସପ୍ତାହରେ ଓଡ଼ିଶାର ଏକ ପ୍ରତିଷ୍ଠିତ ଖବର କାଗଜର ବାର୍ଷିକ ଉତ୍ସବରେ ଯୋଗଦେଇଥିଲେ ପ୍ରତିଷ୍ଠିତ ସାମ୍ବାଦିକ ପୁଣ୍ୟ ପ୍ରସୂନ ବାଜପେୟୀ । ବର୍ତ୍ତମାନର ଗଣମାଧ୍ୟମ ଉପରେ ନିଜର ବକ୍ତବ୍ୟ ରଖିବା ବେଳେ “ସରକାର ସମ୍ପାଦକ” ବୋଲି ଏକ ଶବ୍ଦ ସେ ବ୍ୟବହାର କରିଥିଲେ । ଏହି ଶବ୍ଦଟି ଓଡ଼ିଶାର ଗଣମାଧ୍ୟମରେ କାର୍ଯ୍ୟ କରୁଥିବା ସମ୍ପାଦକ ଓ ଗଣମାଧ୍ୟମ ମାଲିକ ମାନଙ୍କୁ ଟିକିଏ ଅସହଜ ବୋଧ ହୋଇଥିଲା । କାହିଁକି ଦେଶର ଜଣେ ପ୍ରତିଷ୍ଠିତ ସାମ୍ବାଦିକ ଏହା କହିଲେ ? ଗଣମାଧ୍ୟମ ର ସମ୍ପାଦକ ଓ ମାଲିକଙ୍କ ଭୂମିକାକୁ ନେଇ କାହିଁକି ସନ୍ଦେହ କରାଯାଉଛି ?
ଯଦି ଆମେ ଗତ ସପ୍ତାହର ପ୍ରମୁଖ ୩ଟି ଖବରକୁ ନେଇ ଓଡ଼ିଆ ଖବର କାଗଜ ଓ ନ୍ୟୂଜ୍ ଚ୍ୟାନେଲ୍ ର ଉପସ୍ଥାପନାକୁ ତର୍ଜମା କରିବା ତେବେ ଆପଣ ମାନେ ବୁଝି ପାରିବେ କାହିଁକି ପୁଣ୍ୟ ପ୍ରସୂନ ବାଜପେୟୀଙ୍କ ଭଳି ଅଭିଜ୍ଞ ସାମ୍ବାଦିକ ଏ କଥାଟି କହିଲେ । ଓଡ଼ିଶା ସରକାରଙ୍କ ଦ୍ୱାରା ନିଆଯାଇଥିବା ଏକ ନିଷ୍ପତ୍ତି ଥିଲା ଆଉ ଠିକା ନିଯୁକ୍ତି ଦିଆଯିବ ନାହିଁ। “ଠିକା ନିଯୁକ୍ତିର ଯୁଗ ଶେଷ” ଶୀର୍ଷକ ରେ ଏହି ଖବରଟି ସମସ୍ତ ନ୍ୟୁଜ୍ ଚ୍ୟାନେଲ୍ ର ପ୍ରମୁଖ ଖବର ହେବା ସହ ଓଡ଼ିଆ ଖବର କାଗଜର ପ୍ରଥମ ପୃଷ୍ଠା ମଣ୍ଡନ କରିଥିଲା । ରାଜ୍ୟର ସମସ୍ତ ଆଗ ଧାଡିର ନ୍ୟୁଜ୍ ଚ୍ୟାନେଲ୍ ଏହି ଖବରଟିକୁ ପ୍ରମୁଖ ଖବର ହିସାବରେ ଦର୍ଶକ ମାନଙ୍କ ପାଖରେ ପହଂଚାଇବା ସହ ଏହାକୁ ଐତିହାସିକ ନିଷ୍ପତ୍ତି ଭାବେ ବର୍ଣ୍ଣନା କରିଥିଲେ । ରାଜ୍ୟ କ୍ୟାବିନେଟ୍ ର ଏହି ନିଷ୍ପତ୍ତିକୁ ନେଇ ଗଣମାଧ୍ୟମ ଗୁଡ଼ିକୁ ଦିଆଯାଇଥିଲା ଏକ ପ୍ରେସ୍ ନୋଟ୍ । ପ୍ରାୟ ସମସ୍ତ ନ୍ୟୁଜ୍ ଚ୍ୟାନେଲ୍ ଏହି ପ୍ରେସ୍ ନୋଟ୍ ରେ ଦିଆ ଯାଇଥିବା ବିବରଣୀ କୁ ସମ୍ପୂର୍ଣ୍ଣ ଭାବେ ଉପସ୍ଥାପିତ କରିଥିଲେ । କେବଳ ସେତିକି ନୁହେଁ ଖବର କାଗଜ ଗୁଡ଼ିକ ମଧ୍ୟ ସିଧାସଳଖ ଏହି ପ୍ରେସ୍ ନୋଟ୍ କୁ ଛାପି ଦେଇଥିଲେ । ଏହି ଖବରର କେଉଁ ଦିଗଟି ଥିଲା ଗୁରୁତ୍ୱପୂର୍ଣ୍ଣ ? ଦର୍ଶକ ନା ପାଠକ ମାନେ ଏଥିରୁ କ’ଣ ଜାଣିବା ଆବଶ୍ୟକତା ଥିଲା ? ରାଜ୍ୟର ସମସ୍ତ ଠିକା କର୍ମଚାରୀ ଏହାଦ୍ୱାରା ଉପକୃତ ହେଲେ କି ? ଏହି ପ୍ରଶ୍ନର ଉତ୍ତର ଯଦି କେହି ନ୍ୟୂଜ୍ ଚ୍ୟାନେଲ୍ ଓ ଖବର କାଗଜରୁ ଜାଣିବାକୁ ଚାହିଁଥିବେ ତାହା ହୁଏତ ସେମାନଙ୍କୁ ମିଳି ନ ଥାଇପାରେ । କାରଣ ସରକାରଙ୍କ ଦ୍ୱାରା ଜାରି ହେଇଥିବା ବିବୃତିକୁ ଛାପିବା ଓ ଦେଖାଇବା ଏବେ ଗଣମାଧ୍ୟମର କାର୍ଯ୍ୟରତ ସାମ୍ବାଦିକ ଓ ସମ୍ପାଦକ ମାନଙ୍କର ଏକମାତ୍ର କର୍ତ୍ତବ୍ୟ ପାଲଟିଛି । କୌଣସି ନ୍ୟୁଜ୍ ଚ୍ୟାନେଲ୍ ଓ ଖବର କାଗଜର ପ୍ରତିନିଧି ଏନେଇ କୌଣସି ମନ୍ତ୍ରୀ, ସଚିବ ଅବା ବିଶେଷଜ୍ଞଙ୍କ ପ୍ରତିକ୍ରିୟା ନେବାକୁ ଉଚିତ୍ ମନେକରିନାହାନ୍ତି । ରାଜ୍ୟରେ କେତେ ପ୍ରତିଶତ କର୍ମଚାରୀ ଠିକା ଭାବରେ କାମ କରନ୍ତି ? ଏହି ବ୍ୟବସ୍ଥା କାହିଁକି ଓ କେବେ ଆରମ୍ଭ କରିଥିଲେ ରାଜ୍ୟ ସରକାର ? ସେତେବେଳେ ରାଜ୍ୟର ବଜେଟ୍ ର ପରିମାଣ ଓ ଆର୍ଥିକ ସ୍ଥିତି କ’ଣ ଥିଲା ? ଏହି ନିଷ୍ପତ୍ତି ପରେ “ଆଉଟ ସୋର୍ସିଙ୍ଗ” ବ୍ୟବସ୍ଥାରେ କାମ କରୁଥିବା କର୍ମଚାରୀଙ୍କର ଭବିଷ୍ୟତ କ’ଣ ହେବ ? ଏଭଳି ପ୍ରଶ୍ନ ଉଠାଇବାକୁ କେହି ସାହସ କଲେ ନାହିଁ ।
ସେହିପରି ଧାମନଗର ଉପନିର୍ବାଚନର ଖବର ମଧ୍ୟ ଏକ ପ୍ରମୁଖ ରାଜନୈତିକ ଖବର ହିସାବରେ ନ୍ୟୁଜ୍ ଚ୍ୟାନେଲ୍ ଓ ଖବର କାଗଜରେ ସ୍ଥାନ ପାଉଛି । ବିଜେପି, ବିଜେଡି ଓ କଂଗ୍ରେସ ଏବଂ ଜଣେ ସ୍ୱାଧୀନ ପ୍ରାର୍ଥୀଙ୍କ ମଧ୍ୟରେ ଏଠାରେ ଲଢ଼େଇ ହେଉଥିବା ବେଳେ ଓଡ଼ିଶାର ୫ଟି ନ୍ୟୁଜ୍ ଚ୍ୟାନେଲ୍ ରେ କେବଳ ଶାସକ ଦଳର ପ୍ରାର୍ଥୀଙ୍କ ସମ୍ପର୍କରେ ଅଧିକ ଖବର ଓ ବିଶ୍ଳେଷଣ ସ୍ଥାନ ପାଉଛି । ଯଦିଓ ବିରୋଧୀ ବିଜେପି ଓ କଂଗ୍ରେସର ପ୍ରାର୍ଥୀ ଏବଂ ଅନ୍ୟ ଜଣେ ପ୍ରଭାବୀ ସ୍ୱାଧୀନ ପ୍ରାର୍ଥୀ ମଇଦାନରେ ରହିଛନ୍ତି, ତେବେ ସେମାନଙ୍କ ପ୍ରଚାର ଓ ଲୋକଙ୍କର ମତାମତକୁ ଗୌଣ କରିଦେଇଛନ୍ତି ଓଡ଼ିଶାର ପ୍ରମୁଖ ନ୍ୟୁଜ୍ ଚ୍ୟାନେଲ୍ ଗୁଡ଼ିକ । ଧାମନଗର ଭୋଟରଙ୍କ ସଂଖ୍ୟା, ଭୋଟରଙ୍କ ମୁଡ୍ କ’ଣ ଓ କାହା ସପକ୍ଷରେ ଭୋଟର ଙ୍କ ମତ ଯିବା ସମ୍ଭାବନା ଅଧିକ ? ସ୍ୱାଧୀନ ପ୍ରାର୍ଥୀଙ୍କ ଭୂମିକା କ’ଣ ହେବ ? ନିର୍ବାଚନରେ ନିର୍ଣ୍ଣାୟକ କିଏ ହୋଇ ପାରନ୍ତି ? ଏପରି ଅନୁଶୀଳନଧର୍ମୀ ଆଲୋଚନା ବା ବିସ୍ତୃତ ରିପୋର୍ଟ ଦେଖାଇବାରେ କାହିଁକି କୁଣ୍ଠିତ ହେଉଛନ୍ତି ନ୍ୟୁଜ୍ ଚ୍ୟାନେଲ୍ ମାନେ ?
ଅନ୍ୟ ଏକ ପ୍ରସଙ୍ଗ ଥିଲା ପୁଣି ଚାଷୀମାନେ ରାଜଧାନୀ ମୁହାଁ ହୋଇଥିବା ଖବର । ମାତ୍ର ଏହି ଖବରକୁ ଗୋଟିଏ ଦୁଇଟି ନ୍ୟୁଜ୍ ଚ୍ୟାନେଲ୍ କୁ ଛାଡ଼ିଦେଲେ ଅନ୍ୟ ମାନେ ଏକ ଖବର ହିସାବରେ ମଧ୍ୟ ଗ୍ରହଣ କରିନଥିଲେ । କିଛି ଖବର କାଗଜ ଏହାକୁ ଭିତର ପୃଷ୍ଠାରେ ସ୍ଥାନ ଦେଇଥିବା ବେଳେ ନ୍ୟୁଜ୍ ଚ୍ୟାନେଲ୍ ର ପ୍ରମୁଖ ଖବର ହେବାରୁ ବଞ୍ଚିତ ହୋଇଥିଲେ ଆନ୍ଦୋଳନରତ ଚାଷୀମାନେ ।
ଏହି ପ୍ରମୁଖ ଖବରଗୁଡ଼ିକର ପରିବେଷଣ ଶୈଳୀ ଏବେ ଦର୍ଶକ ଓ ପାଠକଙ୍କ ମନରେ କିଛି ପ୍ରଶ୍ନ ସୃଷ୍ଟି କରୁଛି । ନ୍ୟୁଜ୍ ଚ୍ୟାନେଲ୍ ରେ ଓ ଖବର କାଗଜର ପ୍ରଥମ ପୃଷ୍ଠାର ଖବର ହେବାପାଇଁ ଖବର ଗୁଡ଼ିକର ଯୋଗ୍ୟତା କ’ଣ ହେବା ଦରକାର ? ସରକାରଙ୍କ ପ୍ରେସ ନୋଟ୍ ବିନା ଅନ୍ୟ ଖବରର ଗୁରୁତ୍ୱ ନାହିଁ କି ? ସରକାର ଓ ପ୍ରଶାସନ ପକ୍ଷରୁ ମିଳୁଥିବା ଖବରର ବିଶ୍ଳେଷଣ ଗଣମାଧ୍ୟମ କରିପାରିବ ନାହିଁ କି ? ଏପରିକି ଶାସନ କଳକୁ ଗଣମାଧ୍ୟମ ପ୍ରତିନିଧି ମାନେ ପ୍ରଶ୍ନ ପଚାରିବା ମନା କି ? କେବଳ ଶାସକ ଦଳ, ସରକାର ଓ ସରକାରୀ ସୂତ୍ରରୁ ଆସୁଥିବା ଖବରକୁ ଲୋକଙ୍କ ପାଖରେ ପହଞ୍ଚାଇବା ନ୍ୟୁଜ୍ ଚ୍ୟାନେଲ୍ ଓ ଖବର କାଗଜର ନୂଆ ସମ୍ପାଦକୀୟ ନୀତି କି ? ଯଦି ଏହି ପ୍ରଶ୍ନ ଗୁଡ଼ିକର ଉତ୍ତର ‘ହଁ’ ହୁଏ ତେବେ ଆଜିର ଦିନରେ ଗଣମାଧ୍ୟମ ଗୁଡ଼ିକର ସମ୍ପାଦକ କିଏ ? ଖବର ସମ୍ପାଦନା କାର୍ଯ୍ୟ କିଏ ତୁଲାଉଛନ୍ତି ? ଗଣମାଧ୍ୟମର ମାଲିକ, ସମ୍ପାଦକ ନା ସରକାର ? ଓଡ଼ିଶାର ନ୍ୟୁଜ୍ ଚ୍ୟାନେଲ୍ ଦର୍ଶକ ଓ ଖବରକାଗଜ ପାଠକଙ୍କ ଦ୍ୱନ୍ଦ ଦୂର କରିବାକୁ ଯାଇ ବରିଷ୍ଠ ସାମ୍ବାଦିକ ପୁଣ୍ୟ ପ୍ରସୂନ ବାଜପେୟୀ ତାଙ୍କ ବକ୍ତବ୍ୟରେ “ସରକାର ସମ୍ପାଦକ” ଶବ୍ଦଟି ବ୍ୟବହାର କରି ନାହାଁନ୍ତି ତ ?
