ବ୍ୟୁରୋ ରିପୋର୍ଟ, ନିର୍ଭୀକ, ୯ ମଇ ୨୦୨୬
ଗତକାଲି ୨୦୨୬ ମଇ ୮ରେ ତାରିଖ ମାହାଙ୍ଗା ଅଞ୍ଚଳର ଦୁଇ ବିଶିଷ୍ଟ ବରପୁତ୍ର ଶିକ୍ଷାବିତ୍ ପଦ୍ମଶ୍ରୀ ରଜତ କୁମାର କର ଓ ତାଙ୍କ ଅନୁଜ ପ୍ରାଧ୍ୟାପକ ପ୍ରଭାତ କୁମାର କରଙ୍କ ସ୍ମୃତି ଚାରଣ ଚାରଣ ସଭା ମୂଳବସନ୍ତ ପଞ୍ଚାୟତ ଅନ୍ତର୍ଗତ ଗୁଣୁପୁର ଗ୍ରାମ ସ୍ଥିତ କୃଷକ କ୍ଷେତ୍ର ବିଦ୍ୟାଳୟ ପରିସରରେ ଅତ୍ୟନ୍ତ ଭାବ ଗମ୍ଭୀର ପରିବେଶରେ ଅନୁଷ୍ଠିତ ହୋଇଯାଇଛି। ସ୍ୱେଚ୍ଛାସେବୀ ଅନୁଷ୍ଠାନ ଶରତ କର ଓ ଅନିମା କର ଫାଉଣ୍ଡେସନ ପକ୍ଷରୁ ପୂଜ୍ୟପୂଜା କାର୍ଯ୍ୟକ୍ରମ ମାଧ୍ୟମରେ ଆୟୋଜିତ ଏହି ଭ୍ରାତା ଦ୍ବୟଙ୍କ (ଇଂରାଜୀ ତାରିଖ ଅନୁସାରେ) ସ୍ୱର୍ଗତଃ ରଜତ କୁମାର କରଙ୍କ ୪ର୍ଥ ବାର୍ଷିକୀ ଏବଂ ପ୍ରଭାତ କୁମାର କରଙ୍କ ପ୍ରଥମ ବାର୍ଷିକୀ ତିରୋଧାନ ଦିବସ ପାଳନ ଅବସରରେ ତାଙ୍କ ଫଟୋଚିତ୍ର ରେ ଧୂପ ଦୀପାଦି ସହିତ ମାଲ୍ୟାର୍ପଣ କରାଯାଇଥିଲା। ଯୁବ ସଂଗଠକ ଶୁଭେନ୍ଦୁ କୁମାର ସାମଲ ଙ୍କ ସଂଯୋଜନାରେ ଆୟୋଜିତ ସ୍ମୃତି ଚାରଣ ସଭାରେ ପଦ୍ମଶ୍ରୀ ରଜତ କରଙ୍କ ପ୍ରଚଣ୍ଡ ବାଗ୍ମିତା, ଶାସ୍ତ୍ରୀୟ ଜ୍ଞାନ, ସାହିତ୍ୟ ସଂସ୍କୃତି ସଂପନ୍ନ ବ୍ୟକ୍ତିତ୍ଵ ସମ୍ପର୍କରେ ଆଲୋକପାତ କରାଯାଇଥିବା ବେଳେ ପ୍ରାଧ୍ୟାପକ ପ୍ରଭାତ କୁମାର କରଙ୍କ ସରଳ ସ୍ଵଚ୍ଛନ୍ଦ୍ୟ ଜୀବନ ଚର୍ଯ୍ୟା, ଛାତ୍ର ବତ୍ସଳତା ଏବଂ ଆଶୁ କବିତ୍ଵ ତାଙ୍କୁ ସର୍ବସାଧାରଣରେ ଅମର କରି ରଖିବ ବୋଲି ମାହାଙ୍ଗା ଅଞ୍ଚଳର ବହୁ ବିଶିଷ୍ଟ ବ୍ୟକ୍ତି ମତବ୍ୟକ୍ତ କରିଥିଲେ।
ପ୍ରାକ୍ତନ ଶିକ୍ଷକ ଧନେଶ୍ଵର ପ୍ରଧାନ, କବି ପ୍ରଶାନ୍ତ କର, ବୟୋଜ୍ୟେଷ୍ଠ ମୂରବୀ ରାମ ଚନ୍ଦ୍ର ମହାପାତ୍ର, ତାରକେଶ୍ଵର ମହାନ୍ତି, ମୁନା ମହାନ୍ତି, ସମସେର ଅଲ୍ଲୀ, କବି ଡମ୍ବରୁ ଧର ପରିଡ଼ା, ପଞ୍ଚାନନ ଦାସ, କମଳାକାନ୍ତ ଦାସ, ଦିଗମ୍ବର ସାହୁ, ତ୍ରୈଲୋକ୍ୟ ସାହୁ, ରାମକୃଷ୍ଣ ସାହୁ, ଶଙ୍କର୍ଷଣ ଦାସ, ବିନୟ ପରିଡ଼ା, ଧନେଶ୍ଵର ଦାସ, ବିଜୟ କୁମାର ସାହୁ , ଶଚ୍ଚିନ୍ଦ୍ର ରଣା ଓ ଶୁଭେନ୍ଦୁ କୁମାର ସାମଲ ପ୍ରମୁଖ ଏହି ପୂଜ୍ୟପୂଜା କାର୍ଯ୍ୟକ୍ରମରେ ଯୋଗଦେଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।
