ବ୍ୟୁରୋ ରିପୋର୍ଟ, ନିର୍ଭୀକ, ମାହାଙ୍ଗା, ୬ ମାର୍ଚ୍ଚ ୨୦୨୬
ଶରତ କର ଓ ଅନିମା କର ଫାଉଣ୍ଡେସନ ପକ୍ଷରୁ ପ୍ରବାଦପୁରୁଷ ବିଜୁ ପଟ୍ଟନାୟକଙ୍କ ୧୧୧ତମ ଜୟନ୍ତୀ ପାଳିତ ହୋଇ ଯାଇଛି। ଏହି ଉପଲକ୍ଷେ ମାର୍ଚ୍ଚ ୫ ତାରିଖ ପୂର୍ବାହ୍ନ ୧୦ ଘଟିକା ସମୟରେ ମାହାଙ୍ଗା ନିର୍ବାଚନ ମଣ୍ଡଳୀ ଅନ୍ତର୍ଗତ ଜୟପୁର ଘାଟ (ଭୋଳିଦାସପୁର) ଠାରେ ଥିବା ବିଜୁ ପଟ୍ଟନାୟକ ଙ୍କ ପୂର୍ଣ୍ଣାବୟବ ପ୍ରତିମୂର୍ତ୍ତୀ ରେ ଧୂପ ଦୀପାଦି ସହିତ ମାଲ୍ୟାର୍ପଣ କରି ଫାଉଣ୍ଡେସନ ଅଧ୍ୟକ୍ଷ ତଥା ପୂର୍ବତନ ଆୟକର କମିଶନର ଶ୍ରୀଯୁକ୍ତ ଶୋଭନ କର କହିଲେ ବିଜୁ ବାବୁ ଭଳି ଜନନାୟକ ଙ୍କୁ ଜନ୍ମ ଦେଇ ଖାଲି ଓଡ଼ିଶା ନୁହେଁ ବରଂ ସାରା ଭାରତ ବର୍ଷ ଗୌରବାନ୍ଵିତ ହୋଇଛି ଏବଂ ତାଙ୍କ ଆଦର୍ଶ ଜୀବନ ର ଅନୁଗାମୀ ହୋଇ ଆମ ଅଞ୍ଚଳ ର ସାମଗ୍ରିକ ବିକାଶ ପାଇଁ ଆମେ ସଂକଳ୍ପବଦ୍ଧ ହେବା ଆଜିର ଆହ୍ବାନ।
ଏହି ବିଜୁ ଜୟନ୍ତୀ ଉତ୍ସବରେ ଅଧ୍ୟକ୍ଷତା କରି ମାହାଙ୍ଗା ମୈତ୍ରୀ ମଞ୍ଚ ସମ୍ପାଦକ, ବିଶିଷ୍ଟ ସ୍ତମ୍ଭକାର ତଥା “ନିର୍ଭୀକ” ପତ୍ରିକା ର ସମ୍ପାଦକ ଅବନୀ ଚନ୍ଦ୍ର ଦାସ ବିଜୁ ପଟ୍ଟନାୟକଙ୍କ ଶାସନ କାଳର ସାମାଜିକ ଅଙ୍ଗୀକାରବଦ୍ଧତା ସମ୍ପର୍କରେ ଆଲୋକପାତ କରିଥିଲେ । ଅନ୍ୟମାନଙ୍କ ମଧ୍ୟରେ କବି ଡମ୍ବରୁଧର ପରିଡା, ସାମାଜିକ କର୍ମୀ ରାମ ଚନ୍ଦ୍ର ମହାପାତ୍ର, ଗିରୀଶ ଚନ୍ଦ୍ର ଆଚାର୍ଯ୍ୟ, ଅରବିନ୍ଦ ଆଚାର୍ଯ୍ୟ, ଚୈତନ୍ୟ ସାମଲ, ପ୍ରାକ୍ତନ ଶିକ୍ଷକ ଧନେଶ୍ଵର ପ୍ରଧାନ ପ୍ରମୁଖ ବିଜୁ ବାବୁଙ୍କ ସ୍ମୃତିରେ ଶ୍ରଦ୍ଧାଞ୍ଜଳି ବାଢ଼ି ଥିଲେ । ଶରତ କର ଓ ଅନିମା କର ଫାଉଣ୍ଡେସନ ସଂସ୍ଥାପିତ କୃଷି ଉତ୍କର୍ଷ କେନ୍ଦ୍ରର ସଂଯୋଜକ ଶ୍ରୀ ଶୁଭେନ୍ଦୁ କୁମାର ସାମଲ ଏହି ପୂଜ୍ୟ ପୂଜା କାର୍ଯ୍ୟକ୍ରମ କୁ ସଂଯୋଜନା କରିବା ସହିତ ବକ୍ତବ୍ୟ ରଖିଥିଲେ ।
ସମସରପୁର, କୁଣ୍ଡି, ମଧୁପୁର, ସାହାପୁର, କୁହୁଣ୍ଡା, ବାସୁଦେବପୁର, କଇଥା ଓ ବାଜପୁରା ଅଞ୍ଚଳ ରୁ ବିଜୁ ପ୍ରେମୀ ସ୍ଥାନୀୟ ବହୁ ବୟୋଜ୍ୟେଷ୍ଠ ମୂରବୀ, ବରିଷ୍ଠ ନାଗରିକ, ଯୁବା ଛାତ୍ର ଗୋଷ୍ଠୀ ବିଜୁବାବୁଙ୍କ ପ୍ରତି ମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
