ବ୍ୟୁରୋ ରିପୋର୍ଟ, ନିର୍ଭୀକ, ମାହାଙ୍ଗା, ୨୮ ନଭେମ୍ବର ୨୦୨୫
ବିଶିଷ୍ଟ ଶିକ୍ଷାବିତ୍ ତଥା ସ୍ୱନାମଧନ୍ୟା ବେତାର କଣ୍ଠଶିଳ୍ପୀ ପ୍ରାଧ୍ୟାପିକା ସ୍ୱର୍ଗୀୟା ଅନିମା କରଙ୍କୁ ତାଙ୍କ ୨ୟ ବାର୍ଷିକ ପୁଣ୍ୟତିଥି ଅବସରରେ ମାହାଙ୍ଗା ଅଞ୍ଚଳର ବନ୍ତଳା ଗ୍ରାମସ୍ଥିତ ଶରତ କର ଓ ଅନିମା କର ଫାଉଣ୍ଡେସନ ତରଫରୁ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି। ଏହି ଉପଲକ୍ଷେ ଆୟୋଜିତ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମରେ ମାହାଙ୍ଗା ମୈତ୍ରୀ ମଞ୍ଚର ସମ୍ପାଦକ ଶ୍ରୀ ଅବନୀ ଚନ୍ଦ୍ର ଦାସ ସଭାପତିତ୍ବ କରିଥିଲେ । ପ୍ରଥମେ ସ୍ୱର୍ଗୀୟା ଅନିମା କରଙ୍କ ପ୍ରତିଛବି ରେ ପୁଷ୍ପ ମାଲ୍ୟ, ଧୂପ ଓ ଦୀପାର୍ଘ୍ୟ ଅର୍ପଣ କରାଯାଇଥିଲା ।
ମାହାଙ୍ଗା ର ପୂର୍ବତନ ବିଧାୟକ, ଓଡ଼ିଶାର ପ୍ରାକ୍ତନ ମନ୍ତ୍ରୀ, ତଥା ବିଧାନସଭା ବାଚସ୍ପତି ଶରତ କୁମାର କରଙ୍କ ସହଧର୍ମିଣୀ କେବଳ ନୁହେଁ ବରଂ ଜଣେ ଛାତ୍ରବତ୍ସଳା ପ୍ରଧ୍ୟାପିକା ତଥା ଆକାଶବାଣୀ, କଟକ କେନ୍ଦ୍ରର ସ୍ବୀକୃତି ପ୍ରାପ୍ତ ସୁଗାୟିକା ଭାବେ ଅନିମା କର ସମଗ୍ର ରାଜ୍ୟରେ ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିଥିଲେ ବୋଲି ଅତିଥି ମାନେ ବକ୍ତବ୍ୟ ରଖିଥିଲେ । ଫାଉଣ୍ଡେସନ ଅଧ୍ୟକ୍ଷ ତଥା ପୂର୍ବତନ ଆୟକର କମିଶନର ଶ୍ରୀ ଶୋଭନ କର ନିଜ ବକ୍ତବ୍ୟରେ ମାତୃସ୍ମୃତି ଚାରଣ କରିବା ସହିତ ତାଙ୍କ ମହାର୍ଘ ଗୁଣାବଳି ବର୍ଣ୍ଣନା କରିଥିଲେ ।
ଏହି ପୂଜ୍ୟପୂଜା ଶ୍ରଦ୍ଧାଞ୍ଜଳି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସମାଜସେବୀ ଅଜିତ୍ କୁମାର ସାହୁ ଏବଂ ଶରତ କର ଓ ଅନିମା କର ଫାଉଣ୍ଡେସନ ର କର୍ମକର୍ତ୍ତା ଏବଂ ସ୍ଵେଚ୍ଛାସେବୀ ବୃନ୍ଦ ଯୋଗ ଦେଇଥିଲେ ।
