ବ୍ୟୁରୋ ରିପୋର୍ଟ, ନିର୍ଭୀକ, ମାହାଙ୍ଗା, ୬ ଅପ୍ରେଲ ୨୦୨୫
ସ୍ଵତନ୍ତ୍ର ଓଡ଼ିଶା ଗଠନର ଆଦ୍ୟ ପ୍ରବକ୍ତା ବ୍ରିଟିଶ୍ ଇଣ୍ଡିଆ ପ୍ରଶାସନର ତତ୍କାଳୀନ ଓଡ଼ିଆ ଜିଲ୍ଲା ମାଜିଷ୍ଟ୍ରେଟ ରାୟବାହାଦୁର ନନ୍ଦକିଶୋର ଦାସଙ୍କ ୧୩୧ ତମ ପୁଣ୍ୟ ତିଥି ଅବସରରେ ତାଙ୍କ ପ୍ରତିଛବି ରେ ପୁଷ୍ପମାଲ୍ୟ, ଧୂପ ଦୀପ ଅର୍ପଣ ସହିତ ମାହାଙ୍ଗା ମୈତ୍ରୀ ମଞ୍ଚ ଏବଂ ଶରତ କର ଓ ଅନିମା କର ଫାଉଣ୍ଡେସନର ମିଳିତ ଆନୁକୁଲ୍ୟରେ ଆୟୋଜିତ ସ୍ମୃତି ସଭାରେ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି ।
ମୁଖ୍ୟ ଅତିଥି ଭାବେ ଯୋଗ ଦେଇ ପୂର୍ବତନ ଆୟକର କମିଶନର ତଥା ବିଶିଷ୍ଟ ସମାଜସେବୀ ଶ୍ରୀ ଶୋଭନ କର ଓଡ଼ିଆ ଜାତିର ଉନ୍ନତି କଳ୍ପେ ମାହାଙ୍ଗା ଅଞ୍ଚଳର କୁମୁଡ଼ା ଜୟପୁର ପ୍ରଗଣାର ଜମିଦାର ନନ୍ଦ କିଶୋର ଦାସଙ୍କ ଅବଦାନ ଅତୁଳନୀୟ ବୋଲି କହିଥିଲେ । ଜନତାର ସେବା ପାଇଁ ତାଙ୍କ ଚାକିରି ଓ ଜମିଦାରୀ ଉଭୟ କାଳରେ ଜୀବନ ଉତ୍ସର୍ଗୀକୃତ ଥିଲା ।
ମାହାଙ୍ଗା ମୈତ୍ରୀ ମଞ୍ଚ ସମ୍ପାଦକ ତଥା ସ୍ମୃତି କମିଟି ସଭାପତି ଅବନୀ ଚନ୍ଦ୍ର ଦାସ ଓଡ଼ିଆ ପ୍ରାଣ ଜନନାୟକ ନନ୍ଦ କିଶୋର ଦାସଙ୍କ ସ୍ମୃତି ଚାରଣ କରି ଓଡ଼ିଶା ବାସୀଙ୍କ ଲାଗି ତାଙ୍କ ମହାନ୍ ଅବଦାନ ସମ୍ପର୍କରେ କହିଥିଲେ ।ଅନୁଗୁଳ ଜିଲ୍ଲା ପୁରୁଣାଗଡ ଠାରେ ମାହାଙ୍ଗା ମୈତ୍ରୀ ମଞ୍ଚ ପକ୍ଷରୁ ନନ୍ଦ କିଶୋର ଦାସଙ୍କ ବହୁ ପୁରାତନ ତଥା ଜରାଜୀର୍ଣ୍ଣ ସମାଧିର ପୁନରୁଦ୍ଧାର ଓ ପୁନଃ ପ୍ରତିଷ୍ଠା କରାଯାଇଥିବା ସତ୍ତ୍ୱେ ସରକାରୀ ସ୍ତରରେ କିମ୍ବା ଅନୁଗୁଳ ଜିଲ୍ଲା ପ୍ରଶାସନ ପକ୍ଷରୁ ଏଥିର ରକ୍ଷଣା ବେକ୍ଷଣ ପାଇଁ କୌଣସି ପଦକ୍ଷେପ ନିଆଯାଇ ନଥିବା କ୍ଷୋଭର ବିଷୟ ବୋଲି ଏହି ସ୍ମୃତି ସଭାରେ ମତ ପ୍ରକାଶ ପାଇଥିଲା ।
ଅନ୍ୟ ମାନଙ୍କ ମଧ୍ୟରେ ସର୍ବଶ୍ରୀ ଅଧ୍ୟାପକ ସୁମନ କର, ଅଜିତ୍ କୁମାର ସାହୁ, ଅମୂଲ୍ୟ କୁମାର ସ୍ବାଇଁ, ଶିବ ପ୍ରସାଦ ଦାଶ, ବିଜୟ କୁମାର ରଥ, ସୁରେନ୍ଦ୍ର ଜେନା, ବିଚିତ୍ର କୁମାର ସାହୁ ପ୍ରମୁଖ ନନ୍ଦ କିଶୋର ଦାସଙ୍କ ଅମ୍ଳାନ ସ୍ମୃତି ପ୍ରତି ଶ୍ରଦ୍ଧାଞ୍ଜଳି ବାଢ଼ିଥିଲେ।
