ନିର୍ଭୀକ ବ୍ୟୁରୋ, ଭୁବନେଶ୍ୱର, ୧୪ ଅଗଷ୍ଟ ୨୦୨୫
ସହଜ ଓ ସରଳ ଭାଷାରେ ପ୍ରବନ୍ଧ, ସମାଲୋଚନା ଓ ଗଳ୍ପ ଲେଖିବା ହେଉଛି ବିଶିଷ୍ଟ ସାହିତ୍ୟିକ ଡଃ ରବି ନାରାୟଣ ସେନାପତିଙ୍କ ସ୍ୱାତନ୍ତ୍ର୍ୟ। ତାଙ୍କ ଗଳ୍ପ ଲେଖିବାର ଶୈଳୀ ଅତ୍ୟନ୍ତ ପ୍ରାଞ୍ଜଳ ଓ ପରିଚ୍ଛନ୍ନ ବୋଲି ପ୍ରଥିତଯଶା ସାହିତ୍ୟିକମାନେ ମତବ୍ୟକ୍ତ କରିଛନ୍ତି।
ରବିବାର ସନ୍ଧ୍ୟାରେ (୧୦ ଅଗଷ୍ଟ) ସ୍ଥାନୀୟ ରେଡ଼କ୍ରସ୍ ଭବନ ପ୍ରେକ୍ଷାଳୟରେ ବିଶିଷ୍ଟ ସାହିତ୍ୟିକ ତଥା ଅବସରପ୍ରାପ୍ତ ପ୍ରଶାସକ ଡଃ ରବି ନାରାୟଣ ସେନାପତି ପାଞ୍ଚୋଟି ପ୍ରବନ୍ଧ ପୁସ୍ତକକୁ ନେଇ ସଂକଳିତ “ଗଦ୍ୟସମ୍ଭାର” ପୁସ୍ତକ ଲୋକାର୍ପିତ ହୋଇଥିଲା। ଲୋକାର୍ପଣ ଉତ୍ସବରେ ପ୍ରଥିତଯଶା ସାହିତ୍ୟିକ, ପ୍ରାବନ୍ଧିକ, ସମାଲୋଚକ, ଗାଳ୍ପିକମାନେ ବିଶିଷ୍ଟ ଅତିଥିଭାବେ ଯୋଗ ଦେଇଥିଲେ। ସେମାନେ ଦର୍ଶାଇଥିଲେ ଯେ, ବହୁମୁଖୀ ପ୍ରତିଭାର ଅଧିକାରୀ ଡଃ ସେନାପତି ଓଡ଼ିଆ ସାହିତ୍ୟର ବିଭିନ୍ନ ବିଭାଗ ତଥା କବିତା, ପ୍ରବନ୍ଧ, ସମାଲୋଚନା, ଗଳ୍ପ, ଶିଶୁ ସାହିତ୍ୟ, ଅଧ୍ୟାତ୍ମିକ ରଚନା ଆଦି କ୍ଷେତ୍ରରେ ଶାଣିତ ଲେଖନୀ ଚାଳନା କରି ନିଜର ସ୍ୱତନ୍ତ୍ର ପିରଚୟ ସୃଷ୍ଟି କରି ପାରିଛନ୍ତି। ପ୍ରଶାସକ ଜୀବନର ଚର୍ମଭେଦି ଅନୁଭବକୁ ପାଥେୟ କରି ସେ ମନୋରମ ଗଳ୍ପ ରଚନା କରିଥିବାବେଳେ ଜୀବନର ଅପରାହ୍ଣରେ ତାଙ୍କର ଲେଖନୀ ଆଧ୍ୟାତ୍ମିକତାବାଦ ଅଭିମୁଖୀ ହୋଇଛି। ସେହିପରି ତାଙ୍କ ବ୍ୟକ୍ତିତ୍ୱରେ ଶିଶୁ ସୁଲଭ ଦରଦୀପଣ ଡଃ ସେନାପତିଙ୍କୁ ଜଣେ ସଫଳ ଶିଶୁ ସାହିତ୍ୟିକର ମାନ୍ୟତା ପ୍ରଦାନ କରିଛି।
ବିଶିଷ୍ଟ କଥାକାର ତଥା ଦୈନିକ “ନିତିଦିନ”ର ସମ୍ପାଦକ ମନୋଜ କୁମାର ମହାପାତ୍ରଙ୍କ ପୌରହିତ୍ୟରେ ଅନୁଷ୍ଠିତ ଏହି ସାରସ୍ୱତ ସମାବେଶରେ ଅଧ୍ୟାପକ ବିଶ୍ୱରଞ୍ଜନ ମୁଖ୍ୟ ଅତିଥି, ପ୍ରଫେସର ବିଜୟ କୁମାର ଶତପଥୀ ସମ୍ମାନିତ ଅତିଥି, ଡଃ ବାସନ୍ତୀ ମହାନ୍ତି ମୁଖ୍ୟବକ୍ତା ଭାବେ ଯୋଗ ଦେଇଥିଲେ। ସାହିତ୍ୟିକା ବିଜୟଲକ୍ଷ୍ମୀ ପଟ୍ଟନାୟକ ଏହି ଉତ୍ସବକୁ ସଂଯୋଜନା କରିଥିବାବେଳେ କଣ୍ଠଶିଳ୍ପୀ ରଶ୍ମି ଦାସ ପ୍ରାରମ୍ଭିକ ସଙ୍ଗୀତ ପରିବେଷଣ କରିଥିଲେ।
ପ୍ରାରମ୍ଭରେ ଡଃ ରବି ନାରାୟଣ ସେନାପତି ଲେଖକୀୟ ବକ୍ତବ୍ୟ ପ୍ରଦାନ କରି ଦର୍ଶାଇଥିଲେ ଯେ, ତିରିଶ ବର୍ଷ ପୂର୍ବେ ଲିଖିତ ତାଙ୍କର ପାଞ୍ଚୋଟି ପ୍ରବନ୍ଧ ପୁସ୍ତକର ସମ୍ମିଶ୍ରଣରେ ଏହି “ଗଦ୍ୟସମ୍ଭାର” ପୁସ୍ତିକା ଜନ୍ମଲାଭ କରିଛି। ଅନ୍ୟପକ୍ଷରେ ଏଥନା ବୁକ୍ସର ସତ୍ତ୍ୱାଧିକାରୀ ରାଜ କିଶୋର ଦାସ ତାଙ୍କ ପ୍ରକାଶନୀ ସଂସ୍ଥା ଏଭଳି ମୁଦ୍ରଣ କରି ଗର୍ବିତ ବୋଲି ଦର୍ଶାଇଥିଲେ। ଭ୍ରଦକ ସମ୍ମିଳନୀ ଏବଂ ସାରଳା ଦାସ ସ୍ମୃତି ସଂସଦର ମିଳିତ ଆନୁକୁଲ୍ୟରେ ଆୟୋଜିତ ଏହି ଲୋକାର୍ପଣ ଉତ୍ସବରେ ପ୍ରଥମେ ସ୍ମୃତି ସଂସଦର ସମ୍ପାଦକ ପ୍ରଦୀପ୍ତ କୁମାର ବିଶ୍ୱାଳ ସ୍ୱାଗତ ଭାଷଣ ଓ ସମ୍ମିଳନୀର ସାଧାରଣ ସମ୍ପାଦକ ନିରୋଦ କୁମାର ରାଉତ ଧନ୍ୟବାଦ ଅର୍ପଣ କରିଥିଲେ।
