ଜୟନ୍ତ କୁମାର ଦାସ, ୨୦ ସେପ୍ଟେମ୍ବର ୨୦୨୨
ଏହି ପ୍ରଥିତ ଯଶା ସାହିତ୍ୟିକ, ସଂସ୍କୃତି ଅନୁରାଗୀ ଓ ଜନମାନସର ନେତା ଶରତ କରଙ୍କ ଜନ୍ମ ମାହାଙ୍ଗା ବ୍ଲକ ସ୍ଥିତ ଚାଇଁଆ ପାଳ ଗାଁରେ ୧୯୩୯ ମସିହା ସେପ୍ଟେମ୍ବର ୫ ତାରିଖ ଦିନ ଏକ ମାହେନ୍ଦ୍ର ବେଳାରେ I ଏହି ବହୁମୁଖୀ ବ୍ୟକ୍ତିତ୍ୱ ଥିଲେ ସମସ୍ତଙ୍କ ଶ୍ରଦ୍ଧାଶୀଳ ଉଚ୍ଚାରଣ ତଥା ଦରଦୀ ବନ୍ଧୁ I ପ୍ରସିଦ୍ଧ ଆହ୍ଲାବାଦ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ସ୍ନାତକତ୍ତୋର ପରୀକ୍ଷାରେ ପ୍ରଥମ ଶ୍ରେଣୀରେ ପ୍ରଥମ ସ୍ଥାନ ଅଧିକାର କରି ଏହି ପ୍ରତିଭାବାନ ଛାତ୍ର ସମସ୍ତଙ୍କର ଶ୍ରଦ୍ଧା ଭାଜନ ହୋଇପାରିଥିଲେ I ରାଜନୀତି ବିଜ୍ଞାନ ଅଧ୍ୟାପକ ଭାବେ ନିଜର କର୍ମମୟ ଜୀବନ ଆରମ୍ଭ କରି ଯେତେବେଳେ ସର୍ବ ଭାରତୀୟ ପ୍ରଶାସନିକ ସେବାରେ ଯୋଗ ଦେବାପାଇଁ ମନ ବଳାଇଲେ ଠିକ୍ ସେତିକିବେଳେ ବିଜୁବାବୁଙ୍କ ପରାମର୍ଶରେ ଏଥିରେ ପୁର୍ଣ୍ଣଛେଦ ପକାଇ ସେ ପ୍ରତ୍ୟକ୍ଷ ରାଜନୀତିରେ ପାଦ ଥାପିଲେ I ସଫଳ ରାଜନୈତିକ ଜୀବନ ଭିତରେ ଅନେକ ଥର ବିଧାୟକ, ମନ୍ତ୍ରୀ, ସାଂସଦ ଓ ବାଚସ୍ପତି ପରି ମର୍ଯ୍ୟାଦା ଜନକ ପଦବୀରେ ଅଧିଷ୍ଠିତ ହୋଇପାରିଥିଲେ ନିଜର ପ୍ରଚଣ୍ଡ ଵାଗ୍ମୀତା ଓ ଧୀଶକ୍ତି ପାଇଁ I ଜନ ସାଧାରଣଙ୍କ ସେବା ଥିଲା ତାଙ୍କ ଜୀବନର ମୂଳ ମନ୍ତ୍ର I ଓଜସ୍ୱିନୀ ଭାଷଣ ପାଇଁ କେବଳ ଆମ ରାଜ୍ୟ କାହିଁକି ସାରା ଦେଶରେ ତାଙ୍କର ସ୍ୱତନ୍ତ୍ର ପରିଚୟ ଥିଲା I ମା’, ମାଟିର ସୁରକ୍ଷା ପାଇଁ ସେ ସର୍ବଦା ସଂଗ୍ରାମରତ ଥିଲେ I
ସେ ଅନେକ ପ୍ରବନ୍ଧ, ଗଳ୍ପ ଓ କବିତା ରଚନା କରି ସାରସ୍ୱତ ସାଧକ ଭାବେ ନିଜର ପରିଚୟ ସୃଷ୍ଟି କରିଥିଲେ । ତାଙ୍କ ରଚିତ ଦ୍ରୁତ ବିଳସ୍ଵିତ, ମନ୍ଥନ, ରୋମନ୍ଥନ ଓ ଅନନ୍ୟ ସାରା ରାଜ୍ୟରେ ପାଠକୀୟ ସ୍ୱୀକୃତି ଲାଭ କରିଥିଲା । ଓଡ଼ିଶା ସାହିତ୍ୟ ଏକାଡେମୀ ଓ ଓଡ଼ିଶା ସଂଗୀତ ନାଟକ ଏକାଡେମୀର ସଭାପତି ଭାବେ ତାଙ୍କର ଭୂମିକା ଉଲ୍ଲେଖନୀୟ । ଅତିବଡ଼ି ସମ୍ମାନ, ଧର୍ମପଦ ପୁରସ୍କାର, ଉପେନ୍ଦ୍ରଭଞ୍ଜ ପୁରସ୍କାର ର ପରିକଳ୍ପନା କରିଥିଲେ ଏହି ମହାନ ସାଧକ । ୧୯୫୮ ମସିହାରେ ଏହି ବାଗ୍ମୀ ପୁରୁଷଙ୍କ ସମ୍ପାଦନାରେ ପ୍ରକାଶ ଲାଭ କରିଥିଲା ନିର୍ଭୀକ ପତ୍ରିକା । ଏହି ଯୁଗ ପୁରୁଷ କେବଳ ମାହାଙ୍ଗା କାହିଁକି ସାରା ଓଡ଼ିଶାର ଥିଲେ ଗର୍ବ ଓ ଗୌରବ । ମନ୍ତ୍ରୀପଦ ବହନ କରିଥିବା ବେଳେ ନିଜ ନିର୍ବାଚନ ମଣ୍ଡଳୀ ମାହାଙ୍ଗା ପାଇଁ ଅନେକ ଦୃଷ୍ଟାନ୍ତ ମୂଳକ କାର୍ଯ୍ୟ କରିଥିଲେ ସେ ଶିକ୍ଷା କ୍ଷେତ୍ରରେ ହେଉ, ସ୍ୱାସ୍ଥ୍ୟସେବା ହେଉ ଅବା ଗମନା ଗମନ କ୍ଷେତ୍ର ହେଉ । ଜନସାଧାରଣ ଙ୍କ ହିତ ପାଇଁ ସେ ସଦା ସର୍ବଦା ଜାଗ୍ରତ ପ୍ରହରୀ ଭାବେ କାର୍ଯ୍ୟ କରୁଥିଲେ । ପୂଜ୍ୟ ପୂଜା ପ୍ରତି ସେ ଅତ୍ୟନ୍ତ ଯତ୍ନଶୀଳ ଥିଲେ । ବୈଷ୍ଣବ ପାଣି ଜୟନ୍ତୀ ସମୟ ପାଖେଇ ଆସିଲେ ମନେ ପଡିଯାଏ ଏହି ଉତ୍ତୁଙ୍ଗ ବ୍ୟକ୍ତିତ୍ୱଙ୍କ ଦ୍ୱାରା ପ୍ରତିଷ୍ଠିତ ‘ଗଣକବି ସ୍ମୃତି ସଂସଦ’ କଥା । ପାଣି ସାହିତ୍ୟର ପ୍ରଚାର ଓ ପ୍ରସାର କ୍ଷେତ୍ରରେ ତାଙ୍କର ଭୂମିକା ଥିଲା ଅଗ୍ରଗଣ୍ୟ । ‘ବନ୍ଦେ ଉତ୍କଳ ଜନନୀ’ ସଂଗୀତ କୁ ରାଜ୍ୟ ସଂଗୀତ ମାନ୍ୟତା ଦେବାପାଇଁ ତାଙ୍କ ଅବଦାନ ଅନସ୍ୱୀକାର୍ଯୀ ।
ସୁଲେଖକ, ବାଗ୍ମୀ, ଗାଳ୍ପିକ, କବି, ବରିଷ୍ଠ ରାଜନୀତିଜ୍ଞ ଓ ଜଗନ୍ନାଥ ସଂସ୍କୃତିର ଉପାସକ ଓ ବାର୍ତ୍ତାବହ ଥିଲେ ଚିରସ୍ମରଣୀୟ ଶରତ କର । ତାଙ୍କ ଅବର୍ତ୍ତମାନର ଦୁଇ ବର୍ଷ ପରେ ମଧ୍ୟ ତାଙ୍କ ପ୍ରିୟ ଜନ୍ମମାଟି ଆଜି ବି ଖୋଜୁଛି ତାର ସୁଯୋଗ୍ୟ ସନ୍ତାନକୁ । ଦୀର୍ଘ ପାଞ୍ଚ ଦଶନ୍ଧି ଧରି ରାଜନୈତିକ, ସାଂସ୍କୃତିକ, ସାହିତ୍ୟ ଓ ସମାଜସେବା କ୍ଷେତ୍ରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ ଏହି ପ୍ରଚଣ୍ଡ ସ୍ୱାଭିମାନୀ ସଂସ୍କୁତିପ୍ରାଣ ଜନସେବକ ଶରତ କର । ଆଜି ଯଦିଓ ସେ ଆମ ଗହଣରେ ସଶରୀରେ ନାହାନ୍ତି କିନ୍ତୁ ତାଙ୍କ ଅନବଦ୍ୟ କୃତି ତାଙ୍କୁ ସବୁଦିନ ପାଇଁ ଉଜ୍ଜୀବିତ କରି ରଖିଥିବ ମାନସପଟରେ । ସେ ଚିରକାଳ ଅବିସ୍ମରଣୀୟ ।
