ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୬ ଜୁନ୍ ୨୦୨୩
ବହୁ ପ୍ରତୀକ୍ଷିତ ବିରୋଧୀ ମେଳି ବିହାରର ପାଟନାରେ ଶେଷ ହୋଇଛି। ୧୭ଟି ଦଳ ଏହି ବିରୋଧୀ ମେଳିରେ ସାମିଲ ହୋଇଥିଲେ । ବିରୋଧୀ ଦଳର ନେତାମାନଙ୍କ ଏହି ବୈଠକ ୪ ଘଣ୍ଟାରୁ ଅଧିକ ସମୟ ଧରି ଚାଲିଥିଲା । ଏହି ବୈଠକରେ ୨୦୨୪ ସାଧାରଣ ନିର୍ବାଚନରେ ବିଜେପି ବିରୋଧରେ ଲଢ଼ିବା ପାଇଁ ସହମତି ପ୍ରକାଶ ପାଇଛି । ପାଟନା ବୈଠକର ମୁଖ୍ୟ ଆୟୋଜକ ଥିବା ବିହାର ମୁଖ୍ୟମନ୍ତ୍ରୀ ନୀତିଶ କୁମାର କହିଛନ୍ତି ଯଦି ସମସ୍ତେ ଏକାଠି ରହିବେ ତେବେ ମିଳିତ ଭାବେ ବିଜେପିକୁ ୧୦୦ଟି ଆସନରେ ହରେଇଦେବେ । ଯାହାଦ୍ୱାରା ବିଜେପି କେନ୍ଦ୍ରରେ ସରକାର ଗଠନ କରିବା ଆଉ ସମ୍ଭବପର ହେବନାହିଁ । ସେହିପରି ଏନସିପି ମୁଖ୍ୟ ଶରଦ ପାୱାର କହିଛନ୍ତି ଯଦି ମହାରାଷ୍ଟ୍ରରେ ଏନସିପି ଓ ଶିବସେନା (ଉଦ୍ଧବ ଠାକରେ ଗୋଷ୍ଠୀ) ଏକାଠି ରହି ପାରିଲେ ତେବେ ଅନ୍ୟ ମାନେ କାହିଁକି ଏକାଠି ରହିପାରିବେନି । କଂଗ୍ରେସ ନେତା ରାହୁଲ ଗାନ୍ଧୀ କହିଲେ ଦେଶର ସମ୍ବିଧାନ ଓ ଗଣତନ୍ତ୍ରକୁ ବଞ୍ଚାଇବା ପାଇଁ କଂଗ୍ରେସ ସମସ୍ତ ପ୍ରକାର ବଳିଦାନ ଦେବାକୁ ପ୍ରସ୍ତୁତ ଅଛି, ମାତ୍ର ବଡ଼ କଥା ହେଉଛି ସମସ୍ତେ ଏକାଠି ହୋଇ ରହିବାର ନିଷ୍ପତ୍ତି ନିଅନ୍ତୁ ।
ଏହି ବୈଠକରେ ଯୋଗଦେଇଥିବା ଅନ୍ୟ ଦଳର ନେତାମାନେ ମଧ୍ୟ ନୀତିଶ କୁମାର, ଶରଦ ପାୱାର ଓ ରାହୁଲ ଗାନ୍ଧୀଙ୍କ ସହ ଏକମତ ହୋଇଥିଲେ । ମାତ୍ର ଆପ୍ ନେତା ଅରବିନ୍ଦ କେଜ୍ରିୱାଲ କଂଗ୍ରେସ ସହ ରହିବା ନିଷ୍ପତ୍ତିକୁ ନେଇ ସହମତି ପ୍ରକାଶ କରିପାରି ନାହାଁନ୍ତି । ଦିଲ୍ଲୀ ସରକାର ବିରୋଧରେ କେନ୍ଦ୍ର ସରକାର ଆଣିଥିବା ଅଧ୍ୟାଦେଶକୁ ଯଦି କଂଗ୍ରେସ ବିରୋଧ କରେ, ତେବେ ଏହି ମେଣ୍ଟରେ ରହିବା ପାଇଁ ଆପ୍ ନିଷ୍ପତ୍ତି ନେଇପାରେ ବୋଲି ଦର୍ଶାଇଛନ୍ତି । ଅନ୍ୟପକ୍ଷରେ ରାହୁଲ ଓ କେଜ୍ରିୱାଲଙ୍କୁ ମନାଇବା ପାଇଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଅନେକ ଉଦ୍ୟମ କରିଛନ୍ତି । ଏହି ବୈଠକ ଶେଷରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ସମସ୍ତ ବିରୋଧୀ ଏକାଠି ରହିବେ ବୋଲି ସୂଚନା ଦେବା ସହ ଆଗାମୀ ଜୁଲାଇ ମାସରେ ସମସ୍ତ ବିରୋଧୀ ଦଳର ନେତାମାନେ ଶିମଲାରେ ପୁଣି ଏକାଠି ହେବେ ବୋଲି ସୂଚନା ଦେଇଥିଲେ । ଏପରିକି ବିରୋଧୀ ମେଣ୍ଟର ନାମକରଣ ହେବା ସହ ଏକ ସର୍ବନିମ୍ନ ସହମତି ଆଧାରରେ କାର୍ଯ୍ୟସୂଚୀ ପ୍ରସ୍ତୁତ ହେବ । ଯାହାକୁ ନେଇ ପରସ୍ପର ବିରୋଧରେ ଏବେ ବି ଲଢ଼ୁଥିବା ଏହି ଦଳମାନେ ଏକଜୁଟ ହୋଇ ବିଜେପି ବିରୋଧରେ ଆଗାମୀ ସାଧାରଣ ନିର୍ବାଚନ ଲଢ଼ିବେ ।
ଅପରପକ୍ଷେ ବିରୋଧୀଦଳ ମାନଙ୍କ ଏହି ବୈଠକକୁ ବିଜେପି ପକ୍ଷରୁ ଏକ “ଫଟୋ ସେସନ” ବୋଲି ସମାଲୋଚନା କରାଯାଇଛି । ଏମାନେ ଏକାଠି ରହି ପାରିବେ ନାହିଁ ଅବା ମୋଦୀଙ୍କ ବିରୋଧରେ ଲଢ଼ିପାରିବେ ନାହିଁ ବୋଲି ବିଜେପି କହିଛି । ମାତ୍ର ରାଜନୈତିକ ପର୍ଯ୍ୟବେକ୍ଷକଙ୍କ ଅନୁଯାୟୀ ଯଦି କଂଗ୍ରେସ ସହ ଆପ୍ ଓ ଟିଏମସି ଏକାଠି ରହିବେ ତେବେ ବିରୋଧୀ ମେଣ୍ଟ ଶକ୍ତିଶାଳୀ ହୋଇ ପାରିବ ନହେଲେ ଏହି ମେଣ୍ଟ ବିଜେପି ସହ ମୁକାବିଲା କରିବା ସମ୍ଭବପର ହୋଇନପାରେ ।
ତେବେ ଅରବିନ୍ଦ କେଜ୍ରିୱାଲଙ୍କ ଭଳି ଉଚ୍ଚଭିଳାଷୀ ନେତା କଂଗ୍ରେସ ସହ ରହିବା ସମ୍ଭବପର ହେବ ନାହିଁ ଅବା କଂଗ୍ରେସକୁ ଛାଡ଼ି ଅନ୍ୟମାନେ ବିଜେପି ସହିତ ମୁକାବିଲା କରିବାରେ ସମର୍ଥ ହୋଇପାରିବେ ନାହିଁ ବୋଲି ବହୁ ରାଜନୈତିକ ପର୍ଯ୍ୟବେକ୍ଷକ ମତ ଦେଇଛନ୍ତି । ଆପ୍, ଟିଏମସି ଆଦିକୁ ସାଙ୍ଗରେ ଧରି କଂଗ୍ରେସ, ଜେଡିୟୁ ଓ ଆରଜେଡି, ଡ଼ିଏମକେ ଆଦି ଆସନ୍ତା ଜୁଲାଇ ମାସରେ ଶିମଲାରେ କିପରି ଏକ ସର୍ବନିମ୍ନ ସହମତି ଭିତ୍ତିକ କାର୍ଯ୍ୟ ସୂଚୀ ପ୍ରସ୍ତୁତ କରିବେ ତାହାକୁ ସମସ୍ତଙ୍କ ଅପେକ୍ଷା ରହିଛି । ଶିମଲାରେ ହେବାକୁ ଥିବା ବିରୋଧୀଙ୍କ ୨ୟ ବୈଠକ ହିଁ ସ୍ପଷ୍ଟ କରିବ ବିରୋଧୀ ମେଳିର ଭବିଷ୍ୟତ।
