ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୨ ଜୁଲାଇ ୨୦୨୪
ସମୟ ବଦଳି ଯାଇଚି
ବିଗତ ଦିନର କ୍ଷମତାସୀନ ଦଳ
ଏବେ ବିରୋଧୀ ଆସନେ ବସିଚି,
କାଲି ଯିଏ ଥିଲା ବିରୋଧୀ ପକ୍ଷରେ
ଆଜି ସେ ଶାସନର ଡ଼ୋରି ଧରିଚି ।। ୧ ।।
ସର୍କାର ବଦଳି ଯାଇଚି
ଚବିଶ ବର୍ଷର ମୁଖ୍ୟମନ୍ତ୍ରୀ ଏବେ
ମୁଖ୍ୟ ବିରୋଧୀଦଳ ନେତା ସାଜିଚି,
ବିରୋଧୀ ଦଳର ପୂର୍ବ ସଚେତକ
ଆଜି ରାଜ୍ୟ ଶାସନ ମୁଖିଆ ହୋଇଚି ।। ୨ ।।
ଶାସନ ବଦଳି ଯାଇଚି
ଶିରିମନ୍ଦିରର ଚାରୋଟି ଦୁଆର
ଭକ୍ତମାନଙ୍କ ପାଇଁ ଖୋଲି ଯାଇଚି,
‘ମୋ ସର୍କାର’ ର ବିଲୁପ୍ତି ଘଟାଇ
ଏଣେ ‘ଲୋକଙ୍କ ସର୍କାର’ ଚାଲିଚି ।। ୩ ।।
ଯୋଜନା ବଦଳି ଯାଇଚି
‘ଓଡ଼ିଶା କନକ୍ଳେଭ’ ଲିଭି ଯାଇ ଏବେ
‘ଉତ୍କଳ ଇନଭେଷ୍ଟ ସମିଟ୍’ ବନିଚି,
‘ମିଶନ ଶକ୍ତି’ ଥାନରେ ଏଣିକି
ପ୍ରତୀକ୍ଷିତ ‘ସୁଭଦ୍ରା’ ଯୋଜନା ଆସୁଚି ।। ୪ ।।
ବ୍ୟବସ୍ଥା ବଦଳି ଯାଇଚି
ଗୁହାରି ବଢ଼ିବା ପାଇଁ ଲୋକ ଆଜି
ରାଜ୍ୟ ମୁଖିଆକୁ ଭେଟି ପାରୁଚି,
ବିଗତ ଦିନର ଓଗାଳିବା ପ୍ରଥା
ଏବେ ମୂଲ୍ୟହୀନ ହୋଇ ପଡ଼ିଚି ।। ୫ ।।
ମନଟା ଅବୁଝା ହେଉଚି
ବିରୋଧୀ ଦଳଟା ଜାଣି ପାରୁନାହିଁ
କେମିତି କ୍ଷମତା ଓହ୍ଲାଇ ଯାଇଚି,
ଶାସକ ଦଳକୁ ଅବୁଝା ହେଉଚି
ତାଙ୍କ ସର୍କାର କେମିତି ଆସିଚି ।। ୬ ।।
ଭୋଟର ମୁରୁକି ହସୁଚି
ଶାସକ ଦଳର ବିରୋଧୀ ଭୂମିକା
ତାଙ୍କ ବକ୍ତବ୍ୟରୁ ବାରି ହେଉଚି,
ବିରୋଧୀ ଦଳର ଶାସକ ଅଭ୍ୟାସ
ତା’ର ମଉନ ମୁଦ୍ରାରୁ ଦିଶୁଚି ।। ୭ ।।
