ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୯ ଜୁଲାଇ ୨୦୨୪
ବିଜେଡ଼ି କରିଚି ନବକଳେବର
ଲୋକଙ୍କ ହୃଦୟ ଜିତିବା ପାଇଁ,
ଅଣ-ଓଡ଼ିଆ ଛିଟା ଦୂରେଇବା ଲାଗି
(ସାମ୍ନାରେ) ବରିଷ୍ଠ ନେତାଙ୍କୁ ଦେଇଛି ଥୋଇ ।। ୧ ।।
ନବୀନ ଦେଖିଲେ ଅସ୍ମିତା, ଦୁର୍ନୀତି
ପ୍ରସଙ୍ଗ ଲୋକଙ୍କୁ କରିଚି ବଡ଼ ଅଥୟ,
ତେଣୁ ରାଜ୍ୟ କମିଟି ସଭ୍ୟମାନଙ୍କୁ
ସେ ସଂପୂର୍ଣ୍ଣ ଭାବରେ ଦେଲେ ବିଦାୟ ।। ୨ ।।
ବିଧାନସଭାରେ ଟାଣ ବିରୋଧୀ ଭୂମିକା
ନିଭାଇବା ପାଇଁ ଦଳ ସଜ ହେଉଚି,
ଦୁର୍ନୀତି ଆରୋପ କେମିତି ଟାଳିବ
ସେଥିନେଇ ଅଙ୍କ କଷା ଚାଲିଚି ।। ୩ ।।
ନବୀନ ଚାହାଁନ୍ତି ଝାଡ଼ିଝୁଡ଼ି ହୋଇ
ତାଙ୍କ ସ୍ୱଚ୍ଛ ମୂର୍ତ୍ତି ଦେବେ ସଜାଡ଼ି,
ତେବେ ନୂଆ ସର୍କାର ଉପାୟ ଖୋଜୁଚି
ଦୁର୍ନୀତିରେ ଦେବ ଛବି ବିଗାଡ଼ି ।। ୪ ।।
ବିଜେଡ଼ି ଭାବୁଚି କେନ୍ଦ୍ରକୁ ପ୍ରସଙ୍ଗ-
ଭିତ୍ତିକ ସମର୍ଥନ ଦେବା ଠିକ ଥିଲା,
ମୋଦିଙ୍କ ନିକଟେ ଆତ୍ମସମର୍ପଣ
ନିର୍ବାଚନରେ ବେଶ୍ ଭାରି ପଡ଼ିଲା ।। ୫ ।।
ତେଣୁ ନୀତି ବଦଳାଇ ବିଜେଡ଼ି
ଏଥର କେଦ୍ରକୁ ଘୋର ବିରୋଧ କଲା,
ରାଜ୍ୟ ପ୍ରସଙ୍ଗରେ ସର୍କାରକୁ ଘେରି
ଗୃହ ମଧ୍ୟଭାଗେ ହୋ-ହଲ୍ଲା ରଚିଲା ।। ୬ ।।
ବିଜେପି ଜାଣିଚି ନବୀନ ଛବିରେ
ବିଜେଡ଼ି ଜଳୁଚି ଦିକ୍ ଦିକ୍ ହୋଇ,
ତାଙ୍କ ଭାବ ମୂର୍ତ୍ତି ନଷ୍ଟ କରିଦେଲେ
ସେହି ଦଳର ଅସ୍ତିତ୍ୱ ଯିବରେ ଧୋଇ ।। ୭ ।।
ନବୀନଙ୍କ ପୁଞ୍ଜି ସ୍ଵଚ୍ଛ ଛବିରେ
କଳଙ୍କ କାଳିମା ବୋଳିବା ପାଇଁ,
ମୋହନ ସର୍କାର ତିଆରି କରୁଚି
ନୂଆ ରଣନୀତି ବୁଦ୍ଧି ଖଟାଇ ।। ୮ ।।
ଏହି ରୋଚକ ନାଟକ ଦେଖିବା ପାଇଁ
ବିଧାନସଭା ଗୃହ ରହିଛି ଚାହିଁ,
ଶାସକ-ବିରୋଧୀ ମୁହାଁମୁହିଁ ହୋଇ
(ଦର୍ଶକଙ୍କୁ) ରାଜନୀତି ରଙ୍ଗେ ଦେବେ ଭିଜାଇ ।। ୯ ।।
