ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୧୧ ନଭେମ୍ବର ୨୦୨୫
କିଛି କଥା ମନଖୋଲି କହିଦେଇ ହୁଏ
ଆଉ କିଛି ଅଧାରୁ ଅଟକି ରହିଯାଏ
ବାକି କିଛି କଥା ମନେ ଦୋଳି ଖେଳୁଥାଏ
ନରମ ଛାତିକୁ ତାହା ଦୋହଲାଇ ଦିଏ ।।୧।।
କିଛି କଥା କହିଦେଲେ ମନ ଭରିଯାଏ
କିଛି ଅଧା କଥା ଚିତ୍ତ ଚହଲାଇ ଦିଏ
ଅକୁହା କିଛି କଥା ବୁକୁ ବିଦାରୁ ଥାଏ
ଶାନ୍ତ ହୃଦୟରେ ତାହା ବେପଥୁ ଜଗାଏ ।।୨।।
କିଛି କଥା ସଂକେତରେ ଜଣା ଯାଇଥାଏ
ବଚନବାଧିତ ଦୁଃଖ ତାହା ଫେଇ ଦିଏ
ଆଖିରେ ନିରବ କଥା ଭରି ରହିଥାଏ
ଶବ୍ଦଶୂନ୍ୟ ସେଇ କଥା ମନ ମୋହିନିଏ ।।୩।।
