ଭାଇଚାରା ର ରଙ୍ଗ

ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୪ ମାର୍ଚ୍ଚ ୨୦୨୬

ସ୍ନେହରେ ପ୍ରେମରେ ଜୀବନ ଭିଜିଲେ
କଷ୍ଟ ଦିଏ ନାହିଁ ଭବ ବନ୍ଧନ
ମନିଷୀ ଚିନ୍ତକ ସେଥିପାଇଁ ସିନା
ଉତ୍ସବ ପାଳନେ ଦିଅନ୍ତି ଧ୍ୟାନ।
ରଜ ଦଶହରା ଶ୍ରୀଗୁଣ୍ଡିଚା ଯାତ
ଆଣେ ଭାଇଚାରା ସମତା ଭାବ
ଜୀବନ ରେ ଭରେ ଆନନ୍ଦ ଉଲ୍ଲାସ
ସବୁଠୁ ନିଆରା ହୋଲି ପରବ।
ବିଶ୍ୱ ନିଅନ୍ତାଙ୍କୁ ବିମାନ ବସାଇ
ତାଙ୍କ ଦେହେ ବୋଳି ରଙ୍ଗ ଅବିର
ହୋଲି ସଙ୍ଗୀତରେ ନାଚି ଗାଇ ସର୍ବେ
ହୁଅନ୍ତି ମାନବ ଧର୍ମେ ବିଭୋର।
ସଦଭାବନା ଭାଇଚାରା ଚୀର ସ୍ରୋତ
ସଦା ପ୍ରବାହିତ ହେଉ ସଂସାରେ
ରଙ୍ଗର ପରବ ହୋଲି ଉତ୍ସବରେ
ଜଗା ନିକଟରେ ପ୍ରାର୍ଥନା କରେ।