ବ୍ୟୁରୋ ରିପୋର୍ଟ, ନିର୍ଭୀକ, ୨୬ ମଇ ୨୦୨୬
ଶରତ କର ଓ ଅନିମା କର ଫାଉଣ୍ଡେସନ ପକ୍ଷରୁ ଗତକାଲି ୨୫ ତାରିଖ ପୂର୍ବାହ୍ନ ୯ ଘଟିକା ରେ ମାହାଙ୍ଗାର ପୂର୍ବତନ ବିଧାୟକ ତଥା ରାଜ୍ୟର ମିଳିତ ଶିକ୍ଷକ ଓ କର୍ମଚାରୀ ସଂଘ ର ପୂର୍ବତନ ସଭାପତି, କୃଷକ ନେତା ସ୍ବର୍ଗତ ବିକ୍ରମ କେଶରୀ ବର୍ମା ଙ୍କ ୮୬ ତମ ଜନ୍ମ ବାର୍ଷିକୀ ପାଳନ ଅବସରରେ ତାଙ୍କ ଦ୍ଵାରା ପ୍ରତିଷ୍ଠିତ ବଣୁଆ (କୁଆଁପାଳ ନିକଟସ୍ଥ) ଜବାହର ଲାଲ ନେହେରୁ ମହାବିଦ୍ୟାଳୟ ପରିସରରେ ଥିବା ପ୍ରତିମୂର୍ତ୍ତି ରେ ପୁଷ୍ପମାଲ୍ୟ ଅର୍ପଣ ପୂର୍ବକ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି।
ପୂଜ୍ୟ ପୂଜା ପରମ୍ପରାର ବାହକ ଶରତ କର ଓ ଅନିମା କର ଫାଉଣ୍ଡେସନର ଅଧ୍ୟକ୍ଷ ବିଶିଷ୍ଟ ସମାଜସେବୀ ଶ୍ରୀଯୁକ୍ତ ଶୋଭନ କରଙ୍କ ପରାମର୍ଶ କ୍ରମେ କେବଳ ମାହାଙ୍ଗା ନୁହେଁ, ସମଗ୍ର ରାଜ୍ୟର ବରପୁତ୍ର ମାନଙ୍କ ସ୍ମୃତିରେ ଏଭଳି ଜୟନ୍ତୀ ଉତ୍ସବ ଏବଂ ସ୍ମୃତି ଚାରଣ ର ଆୟୋଜନ କରାଯାଉଛି ବୋଲି ସ୍ଥାନୀୟ ମୂରବୀ, ବୁଦ୍ଧିଜୀବୀ ଏବଂ ସର୍ବ ସାଧାରଣ ମହଲରେ ଚର୍ଚ୍ଚା ହେଉଛି।
ଏହି କ୍ରମରେ ମାହାଙ୍ଗା ଅଞ୍ଚଳର ବିଶିଷ୍ଟ ରାଜନେତା ଏବଂ ସମଗ୍ର ଓଡ଼ିଶାର ମିଳିତ ଶିକ୍ଷକ – କର୍ମଚାରୀ ସଂଘର ଜଣେ ଅଗ୍ରଗଣ୍ୟ ନେତା ଭାବେ ସ୍ବର୍ଗତ ବିକ୍ରମ ବର୍ମା ସ୍ମରଣୀୟ ହୋଇ ରହିଛନ୍ତି ବୋଲି ଏହି ଶ୍ରଦ୍ଧାଞ୍ଜଳି ସଭାରେ ମତ ପ୍ରକାଶ ପାଇଥିଲା। ଫାଉଣ୍ଡେସନ ତରଫରୁ ଶ୍ରୀ ଶୁଭେନ୍ଦୁ କୁମାର ସାମଲଙ୍କ ସଂଯୋଜନାରେ ରାମଚନ୍ଦ୍ର ମହାପାତ୍ର, କାର୍ତ୍ତିକ ଚନ୍ଦ୍ର ବିହାରୀ, ସମ୍ ଶେର ଅଲ୍ଲୀ, ତାରକେଶ୍ୱର ମହାନ୍ତି, ସରୋଜ କୁମାର ଦାସ ପ୍ରମୁଖ ଙ୍କ ସମେତ ଶରତ ପ୍ରେମୀ ପରିବାର ର ବହୁ ସଦସ୍ୟ ଉପସ୍ଥିତ ରହି ଦିବଂଗତ ପ୍ରିୟ ନେତା ବିକ୍ରମ କେଶରୀ ବର୍ମା ଙ୍କ ସ୍ମୃତି ପ୍ରତି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।
