ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୩ ଜୁଲାଇ ୨୦୨୬
କିଏ ଦେଲା ତୋତେ ଜଗନ୍ନାଥ ନାମ
ମୁଁ ଛାର ଅଜ୍ଞାନ ବୁଝିବି କାହୁଁ
ତୁହି ତୋର ସ୍ରଷ୍ଟା ହେ ପୁରୁଷୋତ୍ତମ
ତୋ’ର ନାମ ଧରି ବିଭ୍ରାନ୍ତ ହେଉ।
ତୁହି ଜଗନ୍ନାଥ କହି କହି ଆମେ
ନମ୍ରତାକୁ ଛାଡି ଗର୍ବିତ ହେଉ
ତୁହି ସର୍ବ ଧର୍ମ ଉର୍ଦ୍ଧ୍ୱେ ମହାପ୍ରଭୁ
ହୀନ ମନ୍ୟତାରେ ବିସ୍ମରି ଯାଉ।
ତୁହି ବ୍ରହ୍ମାଣ୍ଡର ସୃଷ୍ଟି କର୍ତ୍ତା କହି
ବିପରୀତ ଆମ କଥା କର୍ମରେ
ଗୀତା ତୋର ନିଜ କଥା କହୁ ସିନା
ତାହାର ମର୍ମ କୁ ବୁଝୁନା ଥରେ।
ଭକ୍ତ ସାଲବେଗ ହରିଦାସ କଥା
କରୁ ଆଲୋଚନା କେଡେ ସରାଗେ
ଅନ୍ୟ ଧର୍ମ ଲୋକ ମାନଙ୍କୁ କାହିଁକି
ହୃଦୟେ କାହିଁକି ଘୃଣା ଟି ଜାଗେ।
ତୁ ଯଦି ଭାବୁଛୁ ସର୍ବେ ଏକାକାର
ସମସ୍ତ ଧର୍ମର ତୁ ପ୍ରଭୁ ଇଷ୍ଟ
କରିଦେ କରିଦେ କିଛି ଚମତ୍କାର
ସମ ଦୃଷ୍ଟି ଦିଆ ନ ଲଭୁ କଷ୍ଟ।
