ବ୍ୟୁରୋ ରିପୋର୍ଟ, ନିର୍ଭୀକ, ୨୯ ସେପ୍ଟେମ୍ବର ୨୦୨୨
ବିଜେପିର ରାଷ୍ଟ୍ରୀୟ ସଭାପତି ଜଗତ୍ ପ୍ରକାଶ ନଡ୍ଡା ଓଡ଼ିଶା ଆସିଲେ । ଦଳ ତରଫରୁ ତାଙ୍କୁ ଜୋରଦାର ସ୍ୱାଗତ କରାଗଲା । ସଭା ମଞ୍ଚକୁ ପାଛୋଟିନେଲେ ଦଳର ବରିଷ୍ଠ ଓ ଛାମୁଆଁ ନେତା । ଆରମ୍ଭ ହେଲା ଭାଷଣ ପର୍ବ । ନଡ୍ଡାଙ୍କ ଭାଷଣ ଶୁଣିବାକୁ ଅପେକ୍ଷା କରିଥିଲେ ଦଳର ଅଗଣିତ ନେତା ଓ କର୍ମୀ ମାନେ । ରାଷ୍ଟ୍ରୀୟ ସଭାପତି କ’ଣ ସନ୍ଦେଶ ଦେବେ ? ଆଗକୁ ବିଜେପି କିପରି ଓଡ଼ିଶାରେ ବିଜେଡି ସହ ଲଢ଼ିବ ? ୨୦୨୪ରେ ରାଜ୍ୟରେ ବିଜେପି ସରକାର କରିବା ପାଇଁ ସଭାପତିଙ୍କ ମନ୍ତ୍ର କ’ଣ? ଏଭଳି ଅନେକ ପ୍ରଶ୍ନକୁ ମନ ଭିତରେ ରଖି ବହୁ କର୍ମୀ ଓ ନେତା ଛୁଟି ଆସିଥିଲେ ରାଜଧାନୀକୁ ।
ରାଷ୍ଟ୍ରୀୟ ସଭାପତି ଅଭିଭାଷଣ ଆରମ୍ଭ କଲେ । ସମ୍ପୂର୍ଣ୍ଣ ଅଭିଭାଷଣର ଅଧାରୁ ଅଧିକ ରହିଲା ଜାତୀୟ ରାଜନୀତିରେ ବିଜେପି ଭଳି ସର୍ବ ବୃହତ ପାର୍ଟିର ରାଜନୈତିକ ଜୟଯାତ୍ରା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଫଳତା, କଂଗ୍ରେସ ଦଳ ବିରୋଧରେ ବିଷେଦଗାର ଆଦି ଅନେକ କଥା । ଭାଷଣର ଶେଷ ପର୍ବରେ ସ୍ଥାନ ପାଇଲା ଓଡ଼ିଶାର କଥା । ଓଡ଼ିଶାକୁ କେନ୍ଦ୍ର ସରକାର ବହୁତ କିଛି ଦେଉଛନ୍ତି । ରାଜ୍ୟ ସରକାର ଦୁର୍ନୀତିରେ ବୁଡ଼ିକରି ଅଛନ୍ତି । ମନରେଗା ଦୁର୍ନୀତି, ଆବାସ ଦୁର୍ନୀତି, ସ୍ୱାସ୍ଥ୍ୟ ସେବା ଦୁର୍ନୀତି ଇତ୍ୟାଦି ଇତ୍ୟାଦି …. । ମାତ୍ର ସାହସ ଜୁଟାଇ ପାରିଲେନି ବିଜେଡି କିମ୍ବା ଓଡ଼ିଶାର ମୁଖ୍ୟମନ୍ତ୍ରୀଙ୍କ ନାଁ ନେବାକୁ । ଥରୁଟିଏ ମଧ୍ୟ ବିଜେଡି ସରକାର ବୋଲି କହିଲେନି ନଡ୍ଡା, ଅବା ନବୀନ ପଟ୍ଟନାୟକଙ୍କୁ ମଧ୍ୟ ସିଧା ସଳଖ ଭାବେ ସମାଲୋଚନା କରିବାକୁ ପଛଘୁଞ୍ଚା ଦେଲେ । କେବଳ କର୍ମୀଙ୍କ ମନ ରଖିବାକୁ ଯାଇ ଭାଷଣ ଶେଷ କରିବା ପୂର୍ବରୁ, ରାଜ୍ୟ ସରକାରଙ୍କୁ ହଟାଇ ଡ଼ବଲ ଇଂଜିନ ସରକାର ଆଣିବାକୁ କଥା ଛଳରେ ପରାମର୍ଶ ଦେଇଗଲେ । ଜେ.ପି. ନଡ୍ଡାଙ୍କର ଗସ୍ତ ପୂର୍ବରୁ ରାଜନୈତିକ ପର୍ଯ୍ୟବେକ୍ଷକଙ୍କ ଆକଳନ ଯାହା ଥିଲା ତାହାହିଁ ହେଲା । ଓଡ଼ିଶାରେ ବିଜେପି ଲଢ଼ିବ ବିଜେଡି ସହ, କଂଗ୍ରେସ ସହିତ ନୁହେଁ ମାତ୍ର ବିଜେଡି ଅପେକ୍ଷା ଅଧିକ ସମାଲୋଚନା କଂଗ୍ରେସକୁ କାହିଁକି କଲେ ବିଜେପିର ରାଷ୍ଟ୍ରୀୟ ଅଧକ୍ଷ ? ତାହା ଠିକ୍ ଭାବେ ବୁଝିପାରି ଥିବେ ଦଳୀୟ ନେତା ଓ ପଦାଧିକାରୀ ମାନେ । ନବୀନ ପଟ୍ଟନାୟକ କିମ୍ବା ବିଜେଡିକୁ ସିଧାସଳଖ କାହିଁକି ଟାର୍ଗେଟ କଲେନାହିଁ ବିଜେପିର ଅଧକ୍ଷ ? ବିଜେପିର ପୁରୁଣା ପାଠକୁ ଦୋହରାଇଲେ କି ନଡ୍ଡା ? ପ୍ରଧାନମନ୍ତ୍ରୀ ମୋଦି ଓ ଗୃହ ମନ୍ତ୍ରୀ ଅମିତ ଶାହାଙ୍କ ଦ୍ୱାରା ନିର୍ଦ୍ଦେଶିତ ରାସ୍ତାରେ ଗଲେକି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ? ଆଗାମୀ ନିର୍ବାଚନ ପାଇଁ ରାଜ୍ୟର ବିଜେପି ନେତା ଓ କର୍ମୀ ମାନେ ଅପେକ୍ଷା କରିଥିଲେ କେନ୍ଦ୍ରୀୟ ନେତାଙ୍କ ମାର୍ଗଦର୍ଶନକୁ ମାତ୍ର ପାଇଲେ କଣ ? ସେହିପରି ରାଜ୍ୟର ପ୍ରଭାବଶାଳୀ ନେତା ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ପ୍ରଧାନମନ୍ତ୍ରୀଙ୍କ ସଫଳତା ଘରେ ଘରେ ପହଞ୍ଚାଇବାକୁ ଅନୁରୋଧ କଲେ କର୍ମୀ ମାନଙ୍କୁ । କଥା ଛଳରେ ପଦେ ଦୁଇପଦ ସମାଲୋଚନା କଲେ ରାଜ୍ୟ ସରକାରଙ୍କୁ । ସେ ମଧ୍ୟ ପୂର୍ବ ନିର୍ଦ୍ଧାରିତ ଯୋଜନା ଅନୁଯାୟୀ ରାଷ୍ଟ୍ରୀୟ ସଭାପତିଙ୍କ ରାସ୍ତାରେ ଯିବାକୁ ଶ୍ରେୟ ମଣିଲେ । ରାଜ୍ୟ ସରକାରଙ୍କୁ ସମାଲୋଚନା କଲେ ମାତ୍ର ବିଜେଡି ସରକାର ଅବା ମୁଖ୍ୟମନ୍ତ୍ରୀ ନବୀନ ପଟ୍ଟାନାୟକଙ୍କ ନାଁ ନେବାପାଇଁ ପସନ୍ଦ କଲେନାହିଁ । ଅର୍ଥାତ ୨୦୧୯ ସାଧାରଣ ନିର୍ବାଚନ ପରେ ଯେଉଁ ସମ୍ପର୍କ ସେ ବିଜେଡି ନେତୃତ୍ୱ ସହ ମଜବୁତ କରିଛନ୍ତି ତାହା ନଷ୍ଟ କରିବାକୁ ଚାହିଁଲେ ନାହିଁ ।
ତେବେ ଦଳର ଅନ୍ୟ କିଛି ନେତା ଜାତୀୟ ସଭାପତି ଓ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ରାସ୍ତାରୁ ଟିକିଏ ଅଲଗା ଯିବାକୁ ଚେଷ୍ଠା କଲେ । ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡା କଥା ଛଳରେ ତୃତୀୟ ମହଲାକୁ ସମାଲୋଚନା କଲେ । ତାଙ୍କ ଠାରୁ ଆହୁରି ଦୁଇପାଦ ଆଗେଇଯାଇ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିବାକୁ ପଛାଇଲେ ନାହିଁ । ବିରୋଧୀଦଳ ନେତା ଜୟନାରାୟଣ ମିଶ୍ର ତାଙ୍କ ପୁରୁଣା ଅନ୍ଦାଜ୍ ରେ ବିଜେଡି ସରକାର ଓ ମୁଖ୍ୟମନ୍ତ୍ରୀଙ୍କୁ ଜୋରଦାର ସମାଲୋଚନା କଲେ । ଅନ୍ୟ ନେତାମାନେ ମଧ୍ୟ ବେଶ୍ ସୁରକ୍ଷିତ ରାସ୍ତାରେ ଯିବାକୁ ଉଚିତ ମଣିଲେ ।
ତେବେ କାହିଁକି ବିଜେପି ର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା ହୁଅନ୍ତୁ ଅବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ସିଧା ସଳଖ ଭାବେ ବିଜେଡି ବା ନବୀନ ପଟ୍ଟନାୟକ ଙ୍କୁ ଟାର୍ଗେଟ କଲେ ନାହିଁ ? ଏପରିକି ଭାଷଣରେ ମଧ୍ୟ ବିଜେଡି ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କ ନାଁ ନେଲେ ନାହିଁ ? ସୌଜନ୍ୟ, ସମ୍ମାନ ନା ଭୟ …? କେନ୍ଦ୍ରୀୟ ନେତାଙ୍କ ଗ୍ରୀନ୍ ସିଗନାଲ୍ ବିନା ବିଜେପି ର ବୁଥ ଓଡ଼ିଶା ରେ ମଜବୁତ୍ ହେବ କିପରି ? ପ୍ରଧାନମନ୍ତ୍ରୀ ମୋଦିଙ୍କ ବାର୍ତ୍ତା ପ୍ରଚାର ଦ୍ୱାରା ୨୦୨୪ ବିଧାନସଭା ନିର୍ବାଚନ ରେ ଓଡ଼ିଶାରେ ବିଜେପି କୁ ସଫଳତା ମିଳିପାରିବ କି ? କିଛି ଲୋକସଭା ଆସନ ବ୍ୟତୀତ ଆଗାମୀ ନିର୍ବାଚନରେ ଓଡ଼ିଶାରେ ବିଜେପି ବିଧାନସଭା ଆସନ ପାଇଁ ଫୋକସ୍ କରିବ ନାହିଁ ଏହା ତାହାର ଆଗୁଆ ସଂକେତ ନୁହେଁ ତ ?
ନଡ୍ଡାଙ୍କ ଅଭିଭାଷଣ ଓ ହାବ ଭାବ ଏକଥା ସ୍ପଷ୍ଟ କରିଦେଇଗଲା କି ୨୦୧୯ ପରେ ବିଜେଡି ସହ ବିଜେପିର ଗଢ଼ି ଉଠିଥିବା ସମ୍ପର୍କରେ ଏଯାଏଁ କୌଣସି ପରିବର୍ତ୍ତନ ହୋଇନାହିଁ ?
