ନବରାତ୍ରୀ (ମହାଗୌରୀ)

ସସ୍ମିତା ପଣ୍ଡା, ୩ ଅକ୍ଟୋବର ୨୦୨୨

ତୁମେ ଶ୍ବେତାମ୍ବରୀ ସ୍ବର୍ଗୀୟ ବିଭାବ
ସୌନ୍ଦର୍ଯ୍ୟର ମହାଶକ୍ତି ।
ନିୟତି ଚକ୍ରରେ ଘୁରିବୁଲୁଥିବା
ମୁଁ ଜୀବନର ଅଭିବ୍ୟକ୍ତି ।।

ତୁମେ ଆଶୁତୋଷ ସ୍ପର୍ଶରେ ଶୋଭିତା
ସ୍ନାନେ ଜାହ୍ନବୀର ଜଳ ।
ଏ ଭବସାଗରେ ଦଦରା ନାଆ ମୁଁ
ପାଏନାହିଁ ଥଳକୁଳ ।

ତୁମେ ସାଧନାର ପୂର୍ଣ୍ଣତମା ସିଦ୍ଧି
ଅମୋଘ ଶକ୍ତିର ଉତ୍ସ ।
ତୁମ ଭରସାର ଛନ୍ଦମୟ ଧାରା
ଏହି ଲଗ୍ନେ ଭାବାଶ୍ରିତ ।।

ମହାଗୌରୀ ତୁମେ ତ୍ରୀଶୁଳ ଆୟୂଧେ
ବୃଷାଋଢା ଶିବପ୍ରିୟା ।
ମୁଁ କଳ୍ପନାର ଅସ୍ତରାଗ ଟିଏ
ମାନସ ମନ୍ଥନ ମାୟା ।।

ତୁମେ ଦୀର୍ଘତନୁ ସୁଦୀର୍ଘିକା ମାଗୋ
ନବ ଉନ୍ମେଷର ବେଶ ।
ମୁଁ ଭିଜା ମାଟିର ଅଣୁ ଅଣିମାରେ
ଶବ୍ଦ ଟିଏ ନିର୍ବିଶେଷ ।।

ତୁମେ ଅସୀଣର ଅଷ୍ଟମ ବିଭାବ
ସ୍ବର୍ଗଭୂମି ଜୟ ଧ୍ବଜା ।
ମୁଁ ଆନନ୍ଦର ଭକ୍ତି ଅର୍ଘ୍ୟ ଟିଏ
କ୍ଷମା ଯାଚଜ୍ଞାର ପୂଜା ।।