ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୫ ଅକ୍ଟୋବର ୨୦୨୨
ଧାମନଗର ଉପନିର୍ବାଚନ ପାଇଁ ପ୍ରଚାର ଚାଲିଥିବା ବେଳେ ବିଜେପି ଓ ବିଜେଡି ଉଭୟ ଅଭିଯୋଗ କରିଛନ୍ତି ପରସ୍ପର ବିରୋଧରେ । ଭୋଟର ମାନଙ୍କୁ ଟଙ୍କାର ଲୋଭ ଦେଖାଇ ବିଜେଡି ପ୍ରଲୋଭିତ କରୁଛି ବୋଲି ଅଭିଯୋଗ ଆଣିଛି ବିଜେପି । ଅପରପକ୍ଷରେ ବିଜେପି ମିଛ ଅଭିଯୋଗ ଆଣିଥିବାରୁ ତା ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବୀ କରିଛି ବିଜେଡି । ଏପରିକି ଦୁଇ ଦଳର ନେତାମାନେ ଯାଇ ଭେଟିଛନ୍ତି ନିର୍ବାଚନ କମିଶନଙ୍କୁ । ବିଜେପି ରାଜ୍ୟ ସଭାପତିସମୀର ମହାନ୍ତିଙ୍କ ଅଭିଯୋଗ ଯେ, ବିଜେଡି ନେତାମାନେ ପ୍ରତିଶ୍ରୁତି ଦେଉଛନ୍ତି ଯେଉଁ ପଞ୍ଚାୟତରୁ ଅଧିକ ଭୋଟ ବିଜେଡିକୁ ଆସିବ ସେହି ପଞ୍ଚାୟତକୁ ୧ କୋଟି ଟଙ୍କା ଦିଆଯିବ । ଅନ୍ୟପକ୍ଷରେ ଶାସକ ବିଜେଡି ର ଅଭିଯୋଗ ହେଉଛି ବିଜେପି ମିଛ କହୁଛି, ତେଣୁ ଦଳର ଏହି ବିବୃତି ବିରୋଧରେ ନିର୍ବାଚନ କମିଶନ କାର୍ଯ୍ୟାନୁଷ୍ଠାନ ନିଅନ୍ତୁ ।
ଏ ଦୁଇ ଦଳର ଅଭିଯୋଗରୁ କ’ଣ ସୂଚନା ମିଳୁଛି ? ସତରେ କ’ଣ ବିଜେଡି ର ନେତା ମାନେ ଖୋଲାଖୋଲି ଟଙ୍କା ବାଣ୍ଟିବାର ବ୍ୟବସ୍ଥା କରିଛନ୍ତି କି ? ଭୋଟରଙ୍କ ମତକୁ ଟଙ୍କା ମାଧ୍ୟମରେ କିଣିବାକୁ ଚେଷ୍ଟା କରାଯାଉଛି କି ? ଯଦି ବିଜେଡି ଟଙ୍କା ବାଣ୍ଟି ପାରୁଛି ତେବେ ବିଜେପି ପାଖରେ ଟଙ୍କା ବାଣ୍ଟିବାର ସାମର୍ଥ୍ୟ ନାହିଁ କି ?
ଗତ କିଛି ମାସ ପୂର୍ବରୁ ଶେଷ ହୋଇଥିବା ଉତ୍ତର ପ୍ରଦେଶ, ଗୋଆ, ପଞ୍ଜାବ, ମଣିପୁର ଓ ଉତ୍ତରାଖଣ୍ତ ନିର୍ବାଚନରେ ସର୍ବାଧିକ ଅର୍ଥ ବ୍ୟୟ କରିଥିବା ଦଳ ଥିଲା ଭାରତୀୟ ଜନତା ପାର୍ଟି । ଏହି ୫ଟି ରାଜ୍ୟ ପାଇଁ ହୋଇଥିବା ନିର୍ବାଚନରେ ୩୪୪.୨୭ କୋଟି ଟଙ୍କା ଖର୍ଚ୍ଚ କରିଥିଲା ବିଜେପି, ଯାହାକି ପୂର୍ବ ନିର୍ବାଚନ ଅପେକ୍ଷା ୫୮ ପ୍ରତିଶତ ଅଧିକ । ଭାରତର ସବୁଠାରୁ ଚାନ୍ଦା ସଂଗ୍ରହକାରୀ ରାଜନୈତିକ ଦଳ ହିସାବରେ ୧ ନମ୍ବର ସ୍ଥାନରେ ରହିଛି ବିଜେପି । କେବଳ “Electoral Bond Scheme” ରୁ ADR ରିପୋର୍ଟ ଅନୁଯାୟୀ ଗତବର୍ଷରେ ବିଜେପି ସଂଗ୍ରହ କରିଛି ୪୨୧୫ କୋଟି ଟଙ୍କା ଓ ପାଲଟିଛି ଦେଶର ଧନୀ ରାଜନୈତିକ ଦଳ । ସମସ୍ତ ୪୦୪୭ ଟି ନିର୍ବାଚନ ମଣ୍ଡଳୀ ପିଛା ଏହି ଅର୍ଥକୁ ଭାଗ କଲେ ତାର ପରିମାଣ ହେଉଛି ୧ କୋଟି ୪ ଲକ୍ଷ ଟଙ୍କା । ଏବେ ଭାବନ୍ତୁ ଦେଶର ସବୁଠାରୁ ଧନୀ ରାଜନୈତିକ ଦଳ ବିଜେପି ପାଖରେ ଟଙ୍କା ବାଣ୍ଟିବା ପାଇଁ ଅର୍ଥର ଅଭାବ ରହିଛି କି ?
ସେହିପରି ଭାରତର ସମସ୍ତ ରାଜନୈତିକ ଦଳ ମଧ୍ୟରେ ନିର୍ବାଚନୀ ଚାନ୍ଦା ସଂଗ୍ରହ କରିବାରେ ବିଜେଡ଼ି ୩ ନମ୍ବର ସ୍ଥାନରେ । ଅର୍ଥାତ୍ ଦେଶର ୩ୟ ଧନୀ ଆଞ୍ଚଳିକ ରାଜନୈତିକ ଦଳ ହେଉଛି ବିଜେଡି । ଏହି ଦଳ ପାଇଥିବା ଚାନ୍ଦା ପରିମାଣକୁ ଯଦି ୧୪୭ ଟି ବିଧାନସଭା ନିର୍ବାଚନ ମଣ୍ଡଳୀ ହିସାବରେ ବାଣ୍ଟି ଦିଆଯାଏ, ତେବେ ଏହାର ପରିମାଣ ହେବ ନିର୍ବାଚନ ମଣ୍ଡଳୀ ପିଛା ୧ କୋଟି ୮୦ ଲକ୍ଷ ଟଙ୍କା । ଅର୍ଥାତ୍ ଦେଶର ଧନୀ ରାଜନୈତିକ ଦଳ ବିଜେପି ଠାରୁ ଅଧିକ ଅର୍ଥ ସଂଗ୍ରହ କରିବା ଓ ଖର୍ଚ୍ଚ କରିବାର କ୍ଷମତା ରଖିଛି ବିଜେଡି।
ଗତ ୨୨ ବର୍ଷ ଧରି ଓଡ଼ିଶା କୁ ଶାସନ କରୁଛି ଏହି ଦଳ । ସାଙ୍ଗଠନିକ ଦୃଷ୍ଟି କୋଣରୁ ବିଜେଡିର ଆଖପାଖରେ କେହି ନାହାନ୍ତି । ନିର୍ବାଚନ ଜିତିବାର ରଣକୌଶଳରେ ବିଜେଡି ସମସ୍ତଙ୍କଠାରୁ ଆଗରେ । ଲୋକଙ୍କ ପାଖରେ ପହଂଚିବା ଓ ପହଂଚାଇବା ଦକ୍ଷତା ରଖୁଥିବା ଦେଶର ୩ୟ ଧନୀ ଆଞ୍ଚଳିକ ରାଜନୈତିକ ଦଳ ମଧ୍ୟ ବିଜେଡି । ତେବେ ଆପଣମାନେ ଭାବନ୍ତୁ ତ ଯଦି ଲୋକଙ୍କୁ ଟଙ୍କା ବାଣ୍ଟିବାର ଅଭିଯୋଗ ଏହି ଦଳ ବିରୋଧରେ ଆସେ, ତାହାକୁ ଗ୍ରହଣ କରାଯାଇ ପାରିବ କି ନାହିଁ ? ଯଦି ଟଙ୍କା ବାଣ୍ଟିବାକୁ ଏହି ଦଳ ଚାହେଁ ତେବେ ଅର୍ଥର ଅଭାବ ରହିଛି କି ଏହି ଦଳ ପାଖରେ ?
ଏବେ ଏହି ଦୁଇ ଦଳର ସ୍ଥିତି ଓ ସାମର୍ଥ୍ୟକୁ ଲୋକ ମାନେ ବୁଝି ପାରିଥିବେ । ନିଜର ସ୍ଥିତି ଓ ସାମର୍ଥ୍ୟ ମୁତାବକ ଏହି ଦୁଇଦଳ ଯେଉଁ ଅଭିଯୋଗ ଆଣିଛନ୍ତି ପରସ୍ପର ବିରୋଧରେ ତାହାକୁ କିପରି ଗ୍ରହଣ କରାଯିବ? ଦେଶର ଦୁଇଟି ଧନୀ ଓ କ୍ଷମତାଶାଳୀ ରାଜନୈତିକ ଦଳ ଯଦି ପରସ୍ପର ବିରୋଧରେ ଟଙ୍କା ବାଣ୍ଟିବା ଓ ନିର୍ବାଚନକୁ ପ୍ରଭାବିତ କରିବାର ଅଭିଯୋଗ ଆଣନ୍ତି, ତେବେ ଏଠି କିଏ କାହାକୁ ରୋକି ପାରିବ ? କାହା ବିରୋଧରେ କାହାର ଅଭିଯୋଗକୁ ସତ ବୋଲି ଭୋଟର ଭାବିବେ ? ଯଦି ଭୋଟର ମାନଙ୍କୁ ଟଙ୍କା ଦେଇ ଭୋଟ୍ କିଣା ଯାଇ ପାରୁଛି ବୋଲି ଏକ ଧାରଣା ସୃଷ୍ଟି କରିବାକୁ ଚେଷ୍ଟା କରାଯାଏ, ତେବେ ଏଥିପାଇଁ କାହାକୁ ଦାୟୀ କରାଯିବ ? ବିଜେଡିକୁ ନା ବିଜେପିକୁ ? ଦେଶର ଦୁଇଟି ଧନୀ ଓ କ୍ଷମତାଶାଳୀ ରାଜନୈତିକ ଦଳ ଯଦି ଏଭଳି ଅଭିଯୋଗ ଆଣନ୍ତି ପରସ୍ପର ବିରୋଧରେ ତାହେଲେ ନିର୍ଵାଚନ କମିଶନ କ’ଣ ଏମାନଙ୍କୁ ଅଟକାଇ ପାରିବେ ?
