ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୯ ମଇ ୨୦୨୩
ରାତି ପାହିଲେ ଝାରସୁଗୁଡ଼ା ଉପନିର୍ବାଚନ ପାଇଁ ଭୋଟ ଗ୍ରହଣ କରାଯିବ । ଏ ନେଇ ପ୍ରଶାସନିକ ସ୍ତରରେ ସମସ୍ତ ପ୍ରସ୍ତୁତି ଶେଷ ହୋଇଛି । କିଏ ଜିତିବ ଏହି ଉପନିର୍ବାଚନକୁ ନେଇ ରାଜନୈତିକ ମହଲରେ ଭିନ୍ନ ଭିନ୍ନ ଭାବେ ଅଙ୍କ କଷା ଚାଲିଛି । ୩ ଟି ପ୍ରମୁଖ ରାଜନୈତିକ ଦଳର ପ୍ରଚାରକୁ ଅନୁଧ୍ୟାନ କଲେ ଜଣାଯାଏ, ପ୍ରଥମ ପର୍ଯାୟରେ ଶାସକ ଦଳ ବିଜେଡି ଅନ୍ୟ ମାନଙ୍କ ଠାରୁ ଢେର ଆଗରେ ଥିଲା । ମାତ୍ର ପ୍ରଚାରର ଶେଷ ପର୍ଯାୟରେ ବିରୋଧୀ ବିଜେପି ମଧ୍ୟ ବେଶ ଜୋରଦାର ଲଢ଼େଇ କରିବ ବୋଲି ଲୋକଙ୍କ ମନରେ ଏକ ପ୍ରକାର ଆଶା ସଞ୍ଚାର କରିପାରିଛି । ଅନ୍ୟପକ୍ଷରେ କଂଗ୍ରେସ ମଧ୍ୟ ନିଜ ସାମର୍ଥ୍ୟ ମୁତାବକ ଏହି ପ୍ରଚାର କାର୍ଯ୍ୟରେ ଲାଗିପଡ଼ିଥିବାର ଦେଖିବାକୁ ମିଳିଛି । ପ୍ରଚାରର ଶେଷ ଭାଗରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ମାରାଥନ ପ୍ରଚାର ଝାରସୁଗୁଡ଼ାବାସୀଙ୍କୁ ଉଣାଅଧିକେ ପ୍ରଭାବିତ କରିବ ନିଶ୍ଚୟ । ବିଜେପି ପାଇଁ ପ୍ରଚାର ଶେଷ ପର୍ଯାୟରେ ମଇଦାନରେ ଓହ୍ଲାଇଥିବା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିଜେଡି ସରକାର ବିରୋଧରେ ଶାଣିତ ଆକ୍ରମଣ ବିଜେପି ଶିବିରରେ ଉତ୍ସାହ ଭରିଦେଇଥିଲା । ରାଜ୍ୟର ଆଇନ ଶୃଙ୍ଖଳା ପରିସ୍ଥିତି, କେନ୍ଦ୍ରୀୟ ଯୋଜନାରୁ ଅର୍ଥ ବାଟମାରଣା, ମହିଳାଙ୍କୁ ନ୍ୟାୟ ଦେବାରେ ବିଫଳ ସରକାର, ମୁଖ୍ୟମନ୍ତ୍ରୀ କୁମ୍ଭୀର କାନ୍ଦଣା କାନ୍ଦୁଛନ୍ତି ଆଦି କଥା କହି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଭୋଟରଙ୍କୁ ପ୍ରଭାବିତ କରିବାକୁ ଚେଷ୍ଟା କରିଥିଲେ । ଏପରିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାତରେ ଆଉ ଶାସନର ନିୟନ୍ତ୍ରଣ ନାହିଁ ବୋଲି କହି ଜୋରଦାର ହମଲା କରିଥିଲେ ଶାସକ ଦଳ ଉପରେ ।
ସେହିପରି ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର ମଇଦାନକୁ ଓହ୍ଲାଇଥିବା ମୁଖ୍ୟମନ୍ତ୍ରୀ ନିଜ ଭାଷଣ ଆରମ୍ଭରେ ପୂର୍ବତନ ମନ୍ତ୍ରୀ ନବ କିଶୋର ଦାସଙ୍କ ଲୋକପ୍ରିୟତା କଥା ମନେପକାଇଥିଲେ । ପ୍ରଚାର ସମୟରେ ଶାଳୀନତା ରକ୍ଷା କରିବାକୁ ବିରୋଧୀଙ୍କୁ ପରାମର୍ଶ ଦେଇଥିଲେ । ବିଜେଡି ମା” ମାନଙ୍କର ବିକାଶରେ ବିଶ୍ୱାସ କରେ ବୋଲି କହିବା ସହ ପ୍ରାର୍ଥୀ ଦୀପାଳି ଦାସଙ୍କୁ ଭୋଟ ଦେଇ ଜିତାଇବା ପାଇଁ ଅନୁରୋଧ କରିଥିଲେ । ପୂର୍ବପରି ମୁଖ୍ୟମନ୍ତ୍ରୀ ମହିଳାଙ୍କ ବିକାଶ ପ୍ରସଙ୍ଗକୁ ଦୋହରାଇବା ସହ ପୂର୍ବତନ ମନ୍ତ୍ରୀଙ୍କ ବିୟୋଗ ଜନିତ ଅନୁକଂପା ଭୋଟ ହାତେଇବାର ଭରପୁର ପ୍ରୟାସ କରିଥିଲେ ।
କଂଗ୍ରେସ ପକ୍ଷରୁ ପିସିସି ସଭାପତି ଶରତ ପଟ୍ଟନାୟକ ନିଜ ଦଳର ତୁଙ୍ଗ ନେତାମାନଙ୍କୁ ନେଇ ଶେଷ ପର୍ଯ୍ୟନ୍ତ ପ୍ରଚାର ମଇଦାନରେ ରହିଥିଲେ । ପଶ୍ଚିମ ଓଡ଼ିଶାର ସମସ୍ତ କଂଗ୍ରେସ ନେତାଙ୍କୁ ଧରି ଲଢ଼େଇରେ କଂଗ୍ରେସ ଅଛି ବୋଲି ଏକ ବିଶ୍ୱାସ ଜନ୍ମାଇବାକୁ ଚେଷ୍ଟା କରିଥିଲେ କଂଗ୍ରେସ ସଭାପତି।
ତେବେ ୩ଟି ରାଜନୈତିକ ଦଳ ନିଜର ସାମର୍ଥ୍ୟ ମୁତାବକ ପ୍ରଚାର କରିଛନ୍ତି । ଭୋଟରଙ୍କୁ ପ୍ରଭାବିତ କରିବାକୁ ଯଥା ସମ୍ଭବ ଚେଷ୍ଟା କରିଛନ୍ତି । ବିଜେଡି, ବିଜେପି ଓ କଂଗ୍ରେସର ଶୀର୍ଷ ନେତୃତ୍ୱ ଏହି ପ୍ରଚାର ମଇଦାନରେ ସ୍ଥାନୀୟ ନେତାମାନଙ୍କୁ ଅଧିକ ଗୁରୁତ୍ୱ ଦେଇଥିବାର ଦେଖିବାକୁ ମିଳିଛି । ଏପରିକି ପ୍ରଚାରର ଶେଷ ଭାଗରେ ବିଜେପି ଓ ବିଜେଡି ଭିତରେ ବାକ୍ ଯୁଦ୍ଧ ଜୋର ହୋଇଛି ଓ ଦୁଇ ଦଳ ପକ୍ଷରୁ ମଧ୍ୟ ନିର୍ବାଚନ ଆଚରଣ ବିଧି ଉଲ୍ଲଂଘନ ନେଇ ପରସ୍ପର ବିରୋଧରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହୋଇଥିବାର ଦେଖିବାକୁ ମିଳିଛି । ଯାହାକି ପ୍ରଚାର ପରେ ମଧ୍ୟ ଝାରସୁଗୁଡ଼ା ବାତାବରଣକୁ ସରଗରମ କରି ରଖିଛି । ତେବେ ପ୍ରଚାର ଶେଷ ହେବା ପରେ ବାକି ସମୟରେ ମଧ୍ୟ ଶାସକ ଦଳ ନେତାମାନେ ଭୋଟରଙ୍କୁ ମନେଇବାର ଜୋରଦାର ପ୍ରୟାସ କରିଥିବା ଶୁଣିବାକୁ ମିଳିଛି । ତେବେ ପୂର୍ବତନ ମନ୍ତ୍ରୀ ନବ କିଶୋର ଦାସଙ୍କ ହତ୍ୟା ପ୍ରସଙ୍ଗକୁ ଶାସକଦଳ ବିରୋଧରେ ବିଜେପି ପ୍ରମୁଖ ଅସ୍ତ୍ର କରିଥିବା ବେଳେ ତାଙ୍କ ଝିଅଙ୍କୁ ଟିକେଟ ଦେଇ ବିଜେଡି ଅନୁକମ୍ପା ଭୋଟ ହାତେଇବା ଲକ୍ଷ୍ୟରେ ରହିଛି।
