ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୩୦ ମଇ ୨୦୨୩
ରାଜ୍ୟ ବିଜେପି ସଭାପତି ମନମୋହନ ସାମଲଙ୍କ ଅଙ୍କକଷାକୁ ନେଇ ଏବେ ଓଡ଼ିଶା ରାଜନୀତିରେ ଚର୍ଚ୍ଚା ଆରମ୍ଭ ହୋଇଯାଇଛି । ବହୁ ବିଜେଡି ବିଧାୟକ ତାଙ୍କ ସହ ସମ୍ପର୍କରେ ଥିବା କଥା ସେ ଗଣମାଧ୍ୟମ ଆଗରେ କହିଛନ୍ତି । କେବଳ ଗଂଜାମରେ ନୁହେଁ ବରଂ ରାଜ୍ୟର ବହୁ ଜିଲ୍ଲାରେ ଶାସକ ଦଳ ବିଧାୟକ ମାନେ ବେଶ୍ ଅସନ୍ତୁଷ୍ଟ ଥିବା କଥା କହିବା ସହ ଏକ ରାଜନୈତିକ ଗୋଟି ଚାଳନା କରିବାର ଉଦ୍ୟମ କରିଛନ୍ତି ରାଜ୍ୟ ବିଜେପି ସଭାପତି । କେବଳ ଯେ, ରାଜ୍ୟ ବିଜେପି ସଭାପତି ଏହି କଥା କହୁଛନ୍ତି ତାହା ନୁହେଁ ବରଂ ରାଜନୈତିକ ସମୀକ୍ଷକ ମାନେ ମଧ୍ୟ ବାରମ୍ବାର ଏକଥା କହୁଛନ୍ତି ଯେ, ବର୍ତ୍ତମାନର ସ୍ଥିତିରେ ବିଜେଡିରେ ଅସନ୍ତୁଷ୍ଟଙ୍କ ସଂଖ୍ୟା ଯଥେଷ୍ଟ ଅଧିକ । ମାତ୍ର ବିଜେଡିର ଅସନ୍ତୁଷ୍ଟଙ୍କୁ ନେଇ ବିଜେପି କରିବ କ’ଣ ? ସମସ୍ତ ଅସନ୍ତୁଷ୍ଟ ବିଜେଡି ନେତାମାନେ କ’ଣ ବିଜେପିରେ ଯୋଗ ଦେବେ ? ନା ବାହାରେ ରହି ବିଜେଡି ପ୍ରାର୍ଥୀଙ୍କୁ ହରାଇବେ ?
ଗତ ଧାମନଗର ଉପନିର୍ବାଚନରେ ଯାହା ଘଟିଲା, ତାର ପୁନରାବୃତ୍ତି ହେବ ବୋଲି ବୋଧହୁଏ ଧରି ନେଇଛନ୍ତି ରାଜ୍ୟ ବିଜେପି ସଭାପତି। ମାତ୍ର ଧାମନଗର ଉପନିର୍ବାଚନ ପରି ପଦ୍ମପୁର ଓ ଝାରସୁଗୁଡ଼ାରେ ଏହି ଟ୍ରେଣ୍ଡକୁ ଦୋହରାଇ ପାରିନାହିଁ ରାଜ୍ୟ ବିଜେପି । ଏପରିକି ଏହି ଦୁଇଟି ଉପନିର୍ବାଚନରେ ଦଳ ବୃହତ ବ୍ୟବଧାନରେ ପରାସ୍ତ ହୋଇଛି । ତଥାପି ଅସନ୍ତୁଷ୍ଟ ବିଜେଡି ନେତାଙ୍କୁ ନେଇ ବିଜେପିର ରାଜ୍ୟ ସଭାପତି ଏଭଳି ବୟାନ ଦେବା ଆଗକୁ ଆସୁଥିବା ନିର୍ବାଚନ ପୂର୍ବରୁ କିଛି ସଂକେତ ଭଳି ମନେହୁଏ । ମନ୍ତ୍ରୀମଣ୍ଡଳ ଅଦଳ ବଦଳ ପରେ ବିଜେଡି ଭିତରେ ମଧ୍ୟ ଅସନ୍ତୁଷ୍ଟ ନେତାଙ୍କ ସଂଖ୍ୟା ବଢ଼ି ଥାଇପାରେ । ଏପରିକି ଅନେକ ବିବାଦରେ ଛନ୍ଦି ହୋଇପଡ଼ିଥିବା ବିଜେଡି ନେତା ମଧ୍ୟ ଆଗାମୀ ନିର୍ବାଚନରେ ଟିକେଟ ପାଇବେ ନାହିଁ ବୋଲି ଜାଣି ସାରିଲେଣି । ଏଣୁ ସେମାନେ ଏବେଠାରୁ ବିକଳ୍ପ ସନ୍ଧାନରେ ଥାଇପାରନ୍ତି । ଯେହେତୁ ରାଜ୍ୟ କଂଗ୍ରେସର ରାଜନୈତିକ ଗତିବିଧି ସେତେଟା ଚଳ ଚଞ୍ଚଳ ହୋଇପାରୁନାହିଁ ଏଣୁ ବିଜେପି ହିଁ ସେମାନଙ୍କ ପାଇଁ ଏକମାତ୍ର ବିକଳ୍ପ । ଗଂଜାମରେ ପ୍ରଦୀପ ପାଣିଗ୍ରାହୀଙ୍କ ଠାରୁ ଆରମ୍ଭ କରି ପୁରୀରେ ସଂଜୟ ଦାସବର୍ମାଙ୍କ ସମେତ ଏକାଧିକ ଉପକୂଳ ନେତା ମଧ୍ୟ ଏବେ ବିଜେପି ମୁହାଁ ହୋଇ ପାରନ୍ତି ବୋଲି ଚର୍ଚ୍ଚା ଆରମ୍ଭ ହୋଇଗଲାଣି । ଏମାନଙ୍କ ସହ ଆଉ କିଛି ଶାସକ ଦଳ ବିଧାୟକ ଯେ ଯୋଗାଯୋଗରେ ନଥିବେ ତାହା ମଧ୍ୟ କହିହେବ ନାହିଁ ।
ତେଣୁ ଉପକୂଳ, ପଶ୍ଚିମ ଓ ଦକ୍ଷିଣ ଓଡ଼ିଶାରୁ ବିଜେଡି ଟିକେଟରୁ ବଂଚିତ ହେବେ ବୋଲି ଯେଉଁ ମାନେ ସ୍ଥିର ନିଶ୍ଚିତ ହୋଇଗଲେଣି ଓ ଯେଉଁ ମାନେ ବିଜେଡିର ଏବେକାର କ୍ଷମତାକେନ୍ଦ୍ର ଭାବେ ପରିଚିତ ୩ୟ ମହଲାର ଗୁଡ଼ ବୁକ୍ ରେ ନାହାନ୍ତି ସେମାନେ ହୁଏତ ବିଜେପି ନେତୃତ୍ୱ ସହ ଯୋଗାଯୋଗରେ ଥାଇପାରନ୍ତି । ଏହି ନେତାଙ୍କ ସଂଖ୍ୟା ରାଜ୍ୟ ବିଜେପି ସଭାପତିଙ୍କୁ ଉତ୍ସାହିତ କରିଥାଇ ପାରେ, ଯେଉଁଥିପାଇଁ ସେ ଏଭଳି ଏକ ବୟାନ ଦେଇ ରାଜନୈତିକ ହଟଚମଟ ସୃଷ୍ଟି କରିବାକୁ ଚାହିଁଛନ୍ତି ।
ମାତ୍ର ବିଗତ ନିର୍ବାଚନରେ ଯାହା ଦେଖା ଯାଇଛି, ବିଜେପିକୁ ଯାଇଥିବା ବିଜେଡି ନେତାମାନଙ୍କ ଦ୍ୱାରା ଦଳ ଭଲ ପ୍ରଦର୍ଶନ କରିପାରିନଥିଲା । ଏଣୁ ବିଜେଡି ନେତାଙ୍କୁ ନେଇ ନିର୍ବାଚନରେ ବିଜେପି ଜିତି ପାରିବ ଏହାକୁ ରାଜନୈତିକମହଲ ସେତେଟା ଗୁରୁତ୍ୱ ଦେଉନାହିଁ । ତେବେ ରାଜ୍ୟ ବିଜେପି ଯଦି ଏହି ଅସନ୍ତୁଷ୍ଟ ଶାସକ ଦଳ ନେତାଙ୍କ ସହଯୋଗ ପାଏ ହୁଏତ ତାହା ଦଳକୁ କିଛି ଆସନରେ ବିଜୟୀ କରାଇପାରେ । ମାତ୍ର ଏବେଠାରୁ ରାଜ୍ୟ ବିଜେପି ସଭାପତିଙ୍କ ଏହି ଅଙ୍କକଷା ଓଡ଼ିଶା ରାଜନୀତିକୁ ସେତେଟା ପ୍ରଭାବିତ କରିବାର ସମ୍ଭାବନା ନାହିଁ ।
