ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୧୬ ଜୁନ୍ ୨୦୨୩
ଆସ ବଉଳ ଲୋ ଆସ ସଙ୍ଗାତ
ଆସ ମକର ଲୋ ଆସ ମୋ ମିତ
ଗାଇ ଗାଇ ରଜ ଗୀତ,
ନାଚିବା ଗାଇବା ଦୋଳିରେ ଝୁଲିବା
କରି ମନ ପ୍ରଫୁଲ୍ଲିତ ।
ଆସ ଜେଜେ ମା ଆସ ମାଉସୀ
ଆସ ନୂଆବୋଉ ଆସ ପିଉସୀ
ଆସ ଆସ ହସି ହସି
ମସଲା ପୂରିତ ରଜ ପାନ ଖାଇ
ଥଟ୍ଟା ହେଉଥିବା ବସି ।
ଆସ ଭାଇ ଆସ ଆସ ମଉସା
ଆସ ମାମୁଁ ଆସ ଆସ ପିଉସା
ଧରି ଅଣ୍ଟାରେ ପଇସା
ରଜ ମିଠା କିଣି ବାଣ୍ଟି ଦେଉଥିଲେ
ହେବ ନାହିଁ ଲୋକ ହସା ।
ଆସ ସାଙ୍ଗ ସବୁ ସାଙ୍ଗରେ ଆସ
ଆସ ସାଙ୍ଗ ହୋଇ ଛକରେ ବସ
ଖେଳିବା ଲୁଡୁ ତାଆସ
ବାଗୁଡ଼ି ଖେଳରେ ମାତି ଯାଇ ସର୍ବେ
ରଜ କରିବା ସରସ ।
ଜାତି ଧର୍ମ ଛାଡ଼ି ସଭିଏଁ ଆସ
ଏକ ମନ ହୋଇ ମେଳରେ ବସ
ଆମେରେ ଦେବତା ଅଂଶ
ଆମର ଜୀବନ ଜାଣିଛେ ଘଡିଏ
ଛାଡ଼ିଦେବା ହିଂସା ଦ୍ୱେଷ ।
ମାଟି ମା’କୁ ଗଭୀରେ ଦେଖିବା
ସିଏ ସର୍ବଂସହା ବୋଲି ଜାଣିବା
ତା ଯୋଗ୍ୟ ସନ୍ତାନ ହୋଇବା
ତା’ର ପୂଜା ଏହି ରଜ ପରବରେ
ଭାଇଚାରା ମଞ୍ଜି ବୁଣିବା ।
