ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୨ ଜୁନ୍ ୨୦୨୩
କିଛି ଦିନ ପୂର୍ବରୁ ଭାରତୀୟ ଜନତାପାର୍ଟି ନେତୃତ୍ୱାଧୀନ ଏନଡିଏ ର ରଣନୀତି ପରିବର୍ତ୍ତନ ନେଇ ଆଭାସ ମିଳିଛି । ଆସନ୍ତା ୨୦୨୪ ସାଧାରଣ ନିର୍ବାଚନ ପୂର୍ବରୁ ବିଜେପି ନିଜର ଶକ୍ତି ହ୍ରାସ ହେଉଛି ବୋଲି ବଡ଼ ସଂକେତ ପାଇଥିଲା କର୍ଣ୍ଣାଟକ ନିର୍ବାଚନ ଫଳାଫଳରୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବହୁ ପ୍ରଚାର ପରେ ମଧ୍ୟ କର୍ଣ୍ଣାଟକରେ ବିଜେପିକୁ ସଫଳତା ମିଳିଲା ନାହିଁ । ଏପରିକି ଆଗକୁ ଆସୁଥିବା ରାଜ୍ୟ ଗୁଡ଼ିକର ନିର୍ବାଚନରେ ବିଜେପି ଆଶାମୁତାବକ ଫଳ କରିନପାରେ ବୋଲି ରାଜନୈତିକ ସମୀକ୍ଷକମାନେ ମଧ୍ୟ ଆକଳନ କରୁଛନ୍ତି । ବିଜେପି ନିଜର ସର୍ଭେ ଦ୍ୱାରା ମଧ୍ୟ ଆଗାମୀ ବିଧାନସଭା ନିର୍ବାଚନରେ ଭଲ ଫଳ ନକରିପାରେ ବୋଲି ଜାଣିପାରିଥିବା କଥା ଆଲୋଚନା ହେଉଛି ।
ଏଣୁ ଦରକାର ପଡ଼ିଲେ କେନ୍ଦ୍ରସରକାର ମଧ୍ୟ ଆଗୁଆ ନିର୍ବାଚନ ପାଇଁ ପ୍ରସ୍ତୁତ ହୋଇପାରନ୍ତି ବୋଲି ବିଭିନ୍ନ ମହଲରେ ଚର୍ଚ୍ଚା ଚାଲିଛି । ଅନ୍ୟପକ୍ଷରେ ରାହୁଲ ଗାନ୍ଧୀଙ୍କ ଭାରତ ଯୋଡ଼ ଯାତ୍ରା ମାଧ୍ୟମରେ କଂଗ୍ରେସ ପ୍ରତି ଜନ ସମର୍ଥନ ବଢ଼ିବା ସହ ସହଯୋଗୀ ଦଳ ଗୁଡ଼ିକ ମଧ୍ୟ କଂଗ୍ରେସ ଉପରେ ଆସ୍ଥା ସ୍ଥାପନ କରୁଛନ୍ତି । ନୂଆ ସଂସଦ ଭବନ ଉଦଘାଟନ ବେଳେ କଂଗ୍ରେସ ସହିତ ୧୮ ଟି ରାଜନୈତିକ ଦଳ ବିଜେପିକୁ ବିରୋଧ କରିବା ସହ ଏହି ଉଦଘାଟନ ଉତ୍ସବକୁ ବୟକଟ୍ କରିଥିଲେ । ଏଣୁ ବିରୋଧୀଙ୍କ ଏକତା ବିଜେପି ନେତୃତ୍ୱାଧୀନ ଏନଡିଏ ମେଣ୍ଟ ପାଇଁ ଏବେ ବିପଦ ହୋଇଛି । ଏହି ପରିପ୍ରେକ୍ଷୀରେ ଏନଡିଏ ଠାରୁ ଦୂରେଇ ରହିଥିବା ପୂର୍ବ ସହଯୋଗୀ ଦଳ ମାନଙ୍କୁ ନିଜ ପାଖକୁ ଆଣିବାର ଉଦ୍ୟମ ଆରମ୍ଭ କରିଛି ବିଜେପି ।
ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ହାମ୍ (ହିନ୍ଦୁସ୍ତାନ ଆୱାମ ମୋର୍ଚ୍ଚା) ମୁଖ୍ୟ ଜିତନ ରାମ ମାଂଝି କେନ୍ଦ୍ରମନ୍ତ୍ରୀ ଅମିତ ଶାହାଙ୍କୁ ଭେଟିଛନ୍ତି । ମିଳିଥିବା ସୂଚନା ଅନୁଯାୟୀ ଜିତନ ରାମ ମାଂଝି ଏନଡିଏ ସହ ମେଣ୍ଟ କରି ୨୦୨୪ ଲୋକସଭା ନିର୍ବାଚନ ଲଢ଼ିପାରନ୍ତି । ହାମ୍ ର ନେତା ତଥା ଜିତନ ରାମ ମାଂଝିଙ୍କ ପୁଅ ସନ୍ତୋଷ କୁମାର ସୁମନ ବିହାର ସରକାରଙ୍କର କ୍ୟାବିନେଟ୍ ମନ୍ତ୍ରୀ ପଦରୁ ଗତ ଜୁନ ୧୩ ତାରିଖରେ ଇସ୍ତଫା ଦେଇସାରିଛନ୍ତି । ଏପରିକି ହାମ୍ ର ମୁଖ୍ୟ ବିହାରର ରାଜ୍ୟପାଳଙ୍କୁ ଭେଟି ବିହାର ସରକାର ଠାରୁ ତାଙ୍କ ଦଳ ସମର୍ଥନ ପ୍ରତ୍ୟାହାର କରିଛି ବୋଲି ଜଣାଇଛନ୍ତି । ଏଣୁ ହାମ୍ ଏନଡିଏ ସହ ଯୋଗାଯୋଗରେ ଅଛି ଓ ଆଗାମୀ ସମୟରେ ଏହି ମେଣ୍ଟର ଅଂଶୀଦାର ହେବାର ପଥ ପରିଷ୍କାର ହୋଇଛି । ଏହା ପୂର୍ବରୁ ମଧ୍ୟ ତେଲୁଗୁ ଦେଶମ୍ ପାର୍ଟି ମୁଖ୍ୟ ଚନ୍ଦ୍ରବାବୁ ନାଇଡୁ ମଧ୍ୟ ବିଜେପି ନେତାଙ୍କୁ ଭେଟି ଏନଡିଏ ମେଣ୍ଟକୁ ଫେରିବା ପାଇଁ ନିଜର ସ୍ୱୀକୃତି ଦେଇସାରିଛନ୍ତି । ସେହିପରି ଅକାଳୀଦଳ ସମେତ ଅନେକ ଛୋଟ ଛୋଟ ଦଳ ବିଜେପି ସହ ମେଣ୍ଟ କରିବା ନେଇ ଆଲୋଚନା ଜାରୀ ରହିଛି ।
ଏଣୁ ୨୦୨୪ ପୂର୍ବରୁ ବିଜେପି ଏକାଧିକ ରାଜନୈତିକ ଦଳ ସହ ବୂଝାମଣା ପୂର୍ବକ ସେମାନଙ୍କୁ ନିଜ ମେଣ୍ଟରେ ସାମିଲ କରିବାର ସମ୍ଭାବନା ରହିଛି । ଯଦି ଏହି ଉଦ୍ୟମ ଜାରି ରହେ ତେବେ ୨୦୧୯ ପୂର୍ବରୁ ଏନଡିଏ ଛାଡ଼ିଥିବା ଦଳ ମଧ୍ୟରୁ ପ୍ରାୟ ୧୦ ଟି ଦଳ ପୂର୍ବର ଏନଡିଏ ମେଣ୍ଟକୁ ଫେରିବେ । ଆଗାମୀ ନିର୍ବାଚନ ବିଜେପି ପାଇଁ ସହଜ ହୋଇନଥିବାରୁ ବିଜେପି ଏବେ ପୂର୍ବ ସହଯୋଗୀ ମାନଙ୍କର ସାହାଯ୍ୟ ନେବାକୁ ବାଧ୍ୟ ହେବ । ଏପରିକି ବିଜେଡି, ୱାଇଏସଆର କଂଗ୍ରେସ ଆଦି ଦଳଗୁଡ଼ିକ ସହ ମଧ୍ୟ ଅଧିକ ସମ୍ପର୍କ ଖରାପ କରିବ ନାହିଁ । କାରଣ ଏମାନେ ଏନଡିଏ ମେଣ୍ଟରେ ନରହି ମଧ୍ୟ ବିଜେପିକୁ ସାହାଯ୍ୟ କରିବେ ଏ ବିଶ୍ୱାସ ବିଜେପିର ରହିଛି । ବିଜେପିର ଆବଶ୍ୟକତା ଏବେ ମେଣ୍ଟ ଭିତରକୁ ପୁରୁଣା ସାଥୀ ମାନଙ୍କୁ ଫେରାଇବା ଓ ମେଣ୍ଟ ବାହାରେ ମଧ୍ୟ ଅଘୋଷିତ ସାଥୀଭାବେ କିଛି ଦଳଙ୍କୁ ରଖିବା । ନଚେତ୍ ୨୦୨୪ ସାଧାରଣ ନିର୍ବାଚନ ଲଢ଼ିବା ଓ ୨୦୧୯ ର ଫଳାଫଳ ଦୋହରାଇବା କଷ୍ଟକର ହୋଇପାରେ ।
