ଆସିଲା ଶରତ ହସିଲା ମରତ

ଭକ୍ତ ଚରଣ ସାହୁ, ଯାଜପୁର,୨୪ ସେପ୍ଟେମ୍ବର ୨୦୨୨

ଆସିଲା ଶରତ
ହସିଲା ମରତ
ଚଉଦିଗ ଶୋଭା ଦିଶିଲା ।
ନଈ ପଠା ମଣ୍ଡି
ଫୁଲ କାଶତଣ୍ଡି
ମୁରୁକି ମୁରୁକି ହସିଲା ।।
ଆକାଶରେ ନାହିଁ ବରଷା ।
ବାଟ ଘାଟ ସବୁ
ଶୁଖିତ ଗଲାଣି
ଗାଁ ଦାଣ୍ଡ ହେଲା ସରସା ।।

ନିରିମଳ ଶଶୀ
ଆକାଶେ ବିକଶି
ଧରା ଆଲୋକିତ କରିଲା ।
ଟପ ଟପ ଟପ
ଠପ ଠପ ଠପ
ଅକାଶୁ ଶିଶିର ଝରିଲା ।।
ଶୀତଳ ପବନ ବହିଲା ।
ଚୁପି ଚୁପି ଆସି
ସବୁରି କାନରେ
ଶୀତ ଆସୁଅଛି କହିଲା ।।

ଦେବୀ ଦଶଭୁଜା
ପାଇବାକୁ ପୂଜା
ଉଭା ହେଲେ ଆସି ଧରାରେ ।
ଆସ ରୁନା ମୁନା
କୁନା ସୁନା ଟୁନା
ଆଶିଷ ମାଗିବା ପରାରେ ।।
ଆମ ଏ ରାଇଜ ହସିବ ।
ମାଆ ଦୟା କଲେ
ଏଇ ମରତରୁ
ଦୁଃଖ ଓ ଦଇନ ଖସିବ ।।