ଅଙ୍କା ବଙ୍କା ଏଇ ସଡ଼କରେ ପ୍ରିୟ

ଜୟଶ୍ରୀ ଦାସ, ବାଲେଶ୍ଵର, ୧୧ ମଇ ୨୦୨୩

ଅଙ୍କା ବଙ୍କା ଏଇ ସଡ଼କ ରେ ପ୍ରିୟ
ପାଦ ଥାପି ତୁମେ ଆସ
କି ଦେଇ ପ୍ରିୟ ହେ ତୋଷିବି ତୁମକୁ
ଅଛି ଖାଲି ଦୀର୍ଘଶ୍ବାସ।୦।

ନୂଆ ନୂଆ ସ୍ବପ୍ନ ଆଣିବ ସାଥିରେ
ନୂଆ ଜୀବନର ଗୀତି
ଦୁଃଖ ସୁଖ ଭରା ଜୀବନ ଜୀଉଁଛୁ
ତୁମେ ହେବ ଆମ ସାଥି
ଭିତରେ ବାହାରେ ଅସଂଖ୍ୟ ରାକ୍ଷସ
କରିବ ତାଙ୍କୁ ବିନାଶ ।୧।

ଇନ୍ଦ୍ରଧନୁରୁ ରଙ୍ଗ ଆଣିଣ
ଜୀବନ ରଙ୍ଗେଇ ଦେଵ
ବାଳୁଚର ମନ ଶୁଖି ଆସିଲାଣି
ଦେବ ନୂଆ ନୂଆ ଭାବ
ତୁମ ଆଗମନେ ବାଜିଉଠୁ ବଂଶୀ
ଜୀବନର ମଧୁରାସ ।୨।

ହଜିଯାଇଅଛି ପ୍ରୀତିର ମାଧୁରୀ
ସରାଗର ସବୁ ରାଗ
ତୁମ ଆଗମନେ ଲିଭିଯାଉ ପ୍ରିୟ
ଯନ୍ତ୍ରଣାର ଯେତେ ଦାଗ
ସବୁ ବିବଶତା କଟିଯାଉ ପ୍ରିୟ
ଜଡତାର ହେଉ ଶେଷ ।୩।