ଭକତେ ମୁଁ ଗଣା ନ ହେଲେ ନାହିଁ

ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୧୮ ନଭେମ୍ବର ୨୦୨୨

ଭକତେ ମୁଁ ଗଣା ନ ହେଲେ ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ସେବକ ରେ ଗଣା ନ ହେଲେ ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ନର କରି ଯେଣୁ ଜନମ ଦେଇଛ
ଡାକିବି ତୁମକୁ କଣ୍ଠ ଫଟାଇ
ପୂଜିବି ତୁମକୁ ହୃଦେ ବସାଇ.

ଦାସିଆ ଭଳିଆ ନ ହେଲି ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ବନ୍ଧୁଆ ଭଳିଆ ନ ହେଲି ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ଶ୍ରେଷ୍ଠ ଜୀବ କରି ଧରା କୁ ଆଣିଛ
ନାମ ମୁଁ ଗାଇବି ପାଗଳ ହୋଇ
ଉଦ୍ଦଣ୍ଡେ ନାଚିବି ହାତ ଉଠାଇ.

ବଳରାମ ଦାସ ନ ହେଲି ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ଭକ୍ତ କବି ମୁହିଁ ନ ହେଲି ନାହଁ
ଦୁଃଖ ନାହିଁ ମୋର ଦୁଃଖ ନାହିଁ
ବହୁ ଜନ୍ମ ପରେ ମଣିଷ ହୋଇଛି
ଧର୍ମ କରିବି ମୁଁ ହୃଦୟ ଦେଇ
କରିବି ମୁଁ କର୍ମ କୁଣ୍ଠିତ ନୋହି.

ସାଲବେଗ ମୁହିଁ ନ ହେଲେ ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ଜୟଦେବ କବି ନ ହେଲେ ନାହିଁ
ଦୁଃଖ ନାହିଁ ମୋର ଦୁଃଖ ନାହିଁ
ବିବେକ ମୋ ଠାରେ ଯେଣୁ ଦେଇଅଛ
ଚିହ୍ନି ବାରେ ତୋତେ ତ୍ରୁଟି ମୋ ନାହିଁ
ତୁହି ଜଗନ୍ନାଥ ଜାଣିଛି ମୁହିଁ.