ଗାନ୍ଧୀ ସ୍ମୃତି

ଗାନ୍ଧୀ ପ୍ରଦର୍ଶିତ ସତ୍ୟାଗ୍ରହ ପରା
ଆମର ସାଜିଛି ଅମୋଘ ଅସ୍ତ୍ର,
ଶାସନେ ଅନ୍ୟାୟ, ଅନୀତି,ଦୁର୍ନୀତି
ଆମକୁ କରୁଛି ଭିଷଣ ତ୍ରସ୍ତ। ।।୧।।

ସରଳ ଜୀବନ ସୁଉଚ୍ଚ ଚିନ୍ତନ
ଥିଲା ପରା ତୁମ ମୂଳ ଦର୍ଶନ,
ଡାକ ଦେଇଥିଲ ଗ୍ରାମ ସ୍ଵରାଜର
ବିଦେଶୀ ସାମଗ୍ରୀ କରି ବର୍ଜନ ।।୨।।

ଅହିଂସା ଅସ୍ତ୍ରର ଉପଯୋଗ କରି
ସମସ୍ତଙ୍କୁ କଲ ହତ ଚକିତ,
ବିନା ରକ୍ତପାତେ ସ୍ବାଧିନତା ଲଭି
ଦେଖାଇଲ ଅଭିନବ ବୀରତ୍ୱ ।।୩।।

ତୁମରି ଖଦଡ଼ ଆଦର ଲଭିଛି
ପୃଥିବୀବାସୀଙ୍କ ନିକଟେ ଆଜି,
କମ୍ପାନୀମାନଙ୍କ ଖଦୀ ପ୍ରୀତି ପାଇଁ
ବୁଣାକାର ନିଦ ଯାଉଛି ହଜି ।।୪।।

ନାରୀକୁ ସମ୍ମାନ ନିଶାକୁ ବର୍ଜନ
ପାଇଁ ଦେଇଥିଲ ତୁମେ ଆହ୍ବାନ,
ମହିଳା ଦୁଷ୍କର୍ମ ଏବେ ଘନଘନ
ବଢି ଚାଲିଅଛି ମଦ ଦୋକାନ ।।୫।।

ସାମ୍ପ୍ରଦୟିକ ସଦ୍ଭାବ ଉପରେ
ତୁମେ ଦେଉଥିଲ ବେଶୀ ଗୁରୁତ୍ବ,
ହିଂସା,ଦ୍ୱେଷ ଆଉ ଘୃଣା ରାଜନୀତି
ଏବେ କରୁଅଛି ପୁରା ରାଜତ୍ଵ ।।୬।।

ବିଦେଶୀ ପୋଷାକ ପରଦେଶୀ ଚିଜ
ଆଜି ହୋଇଅଛି ଆମ ସଉକ,
ସ୍ୱଦେଶୀ ଦରବ ପରିହାର କରି
ଆମେ ପାଉଅଛୁ ଭାରି ପୁଲକ ।।୭।।

ତୁମରି ନାମକୁ ଉପଯୋଗ କରି
ଚାଲିଛି ଆଜି ହୀନ ରାଜନୀତି,
ସେଇଥି ପାଇଁକି ତୁମରି ସପନ
ରାମରାଜ୍ୟ ହେଉନି ଫଳବତୀ ।।୮।।