ଖରା ଆସିଲାଣି ଖରା

ଭକ୍ତ ଚରଣ ସାହୁ, ଯାଜପୁର, ୬ ମାର୍ଚ୍ଚ ୨୦୨୩

ଖରା ଆସିଲାଣି ଖରା
ତତେଇ ଦେଲାଣି ଧରା ।
ତେଜରେ ତାହାର
ଗଛରୁ ପତର
ଝଡେଇ ଦେଲାଣି ପରା ।।

ତତେଇ ଦେଲାଣି ବାଲି
ବାଟ ତ ହେଉନି ଚାଲି ।।
ନଈ କୁଳ ପାଖ
ଆମ୍ବ ତୋଟା ତଳେ
ପଡିଲା ତାଆସ ପାଲି ।।

ତତଲା ଦୂରେଇ ନେଲା
ପଖାଳ ଭାତକୁ ଦେଲା ।
ଦେଖରେ ସଭିଏଁ
ଦହି ପଖାଳରୁ
ବାଢ଼ିଲେଣି ବେଲା ବେଲା ।।

ଶୁଖେଇ ଦେଲାଣି ଜଳ
ପଚେଇ ଦେଲାଣି ଫଳ ।
ପାପୁନ ବାପୁନ
ଖାଇବା ପାଇଁକି
ଚାହିଁଛନ୍ତି ଜଳ ଜଳ ।।

ଖୁସି ଉଠିଲାଣି ହସି
ଦେଖି ସରବତ ଲସି ।
ଦୋକାନୀ ଭାଇଟା
ଗିଲାସେ ଗିଲାସେ
ବଢ଼ାଇ ଦେଉଛି ବସି ।।

ଘୁରିଲାଣି ଘରେ ପଙ୍ଖା
ଗରମକୁ ନାହିଁ ଶଙ୍କା ।
ପଙ୍ଖା ତଳେ ଟିକେ
ବସିବା ପାଇଁକି
ହେଉଛନ୍ତି ସବୁ ରଙ୍କା ।।

ଖରା ରହି ମାସ ଚାରି
ଗରମରେ ଦେବ ଘାରି ।
ବରଷା ଛୁଇଁଲେ
ଆମ ଏ ଧରାରୁ
ହୋଇଯିବ ସିଏ ପାରି ।।