ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୨୫ ନଭେମ୍ବର ୨୦୨୫
କିଛି କଥା କହି ହୁଏ ନିରବ ଆଖିରେ
ଆଉ କିଛି କଥା ପୁଣି ଥରିଲା ଓଠରେ
ଯେଉଁ କଥା ରହିଯାଏ ମନ ଗହୀରରେ
ହୃଦୟ ବିଦାରେ ତାହା ଭରା ବେଦନାରେ ।।୧।।
କିଛି କଥା କହିହୁଏ ଚୋରା ଚାହାଁଣିରେ
ଆଉ କିଛି କଥା ପୁଣି ମୁରୁକି ହସରେ
ବାକି କିଛି କଥାବାର୍ତ୍ତା ଆଖି ମିଳନରେ
ତା’ପରେ କଥା ଆସର ନିଶବ୍ଦ ଠାରରେ ।।୨।।
କଅଁଳ ଶିଶୁ କଥା କୁଆଁ କୁଆଁ କାନ୍ଦରେ
କିଶୋର ବୟସେ କଥା ଅଝଟ ପଣରେ
ଯୌବନରେ କଥା ଥାଏ ଆତ୍ମ ବିଶ୍ୱାସରେ
ବାର୍ଦ୍ଧକ୍ୟେ କଥା ସୀମିତ ଈଶ୍ୱର ଚର୍ଚ୍ଚାରେ ।।୩।।
