ମଧୁବାବୁ

ମଧୁବାବୁ ନାମେ ତୁମେ ରାଜ୍ୟେ ପରିଚିତ
ଏମ.ଏସ.ଦାସ ଭାବେ ଦେଶରେ ବିଦିତ
ପ୍ରକୃତରେ ତୁମେ ସାରା ପୃଥିବୀ ବିଖ୍ୟାତ
ତୁମକୁ ରଖିଛୁ ଆମେ ଉତ୍କଳେ ସୀମିତ॥୧॥

ଉତ୍କଳ ଭୂଇଁର ଆମ ଅନନ୍ୟ କୃତିତ୍ୱ
ବିଶ୍ଵ ଦରବାରେ ତାହା କରି ପ୍ରତିଭାତ
ଜାତିର ଗୌରବ କଲ ପୁଣି ଦିପ୍ତୀମନ୍ତ
ପୃଥିବୀବାସୀଙ୍କୁ ତାହା କରିଲା ଚକିତ॥୨॥

ଓଡ଼ିଆ ଜାତିର ପରା ତୁମେ ଐରାବତ
ସ୍ଵତନ୍ତ୍ର ପ୍ରଦେଶ ପାଇଁ ଲଢ଼ିଲ ଅକ୍ଲାନ୍ତ
ସୁପ୍ତ ଓଡ଼ିଆଭାଷୀଙ୍କୁ କରିଲ ଜାଗ୍ରତ
ସେଥିଲାଗି ହୋଇଗଲ ତୁମେ ସର୍ବସ୍ବାନ୍ତ॥୩॥

ବୀର ଉତ୍କଳ ଭୂଇଁକୁ କରି ବିଖଣ୍ଡିତ
ଫିରିଙ୍ଗି ରଚିଲା ଏଠି ବର୍ବର ରାଜତ୍ଵ
ଓଡ଼ିଆଙ୍କ ଦୁର୍ଦ୍ଦଶାରେ ହୋଇ ମର୍ମାହତ
ସ୍ଵତନ୍ତ୍ର ଓଡିଶା ପାଇଁ ନେଇଥିଲ ବ୍ରତ॥୪॥

ସ୍ଵତନ୍ତ୍ର ଓଡିଶା ଯେବେ ହୋଇଲା ଗଠିତ
ତାହା ଦେଖିବାକୁ ଆଉ ନ ଥିଲ ତୁମେ ତ
ଆମେ ପାଇଲୁ ଓଡ଼ିଶା ଯାହା ବିଖଣ୍ତିତ
ତାହା ଦେଖି ତୁମେ ହୋଇଥାଆନ୍ତ ବ୍ୟଥିତ॥୫॥

ଓଡ଼ିଆ ଅସ୍ମିତା ଆଜି ହେଉଛି ଲାଂଛିତ
ଓଡ଼ିଶାର ସ୍ୱାଭିମାନ ଏବେ ଉଲୁଣ୍ଠିତ
ଦୁର୍ନୀତି, ପ୍ରିୟାପ୍ରୀତିରେ ଲୋକ ପୁଲକିତ
ତୁମ ନୀତି, ଆଦର୍ଶରୁ ଆମେ ବିବର୍ଜିତ ॥୬॥

ରାଜନୀତି କ୍ଷେତ୍ରେ ଆଜି ହୋଇଛ ବିସ୍ମୃତ
ଦପ୍ତରେ ତୁମ ଫଟୋ ଶୋଭା ପାଉ ନାହିଁ ତ
‘ଭାରତ ରତ୍ନ’ ରେ କରି ପାରିନୁ ଭୂଷିତ
ରଖିପାରିନୁ ତୁମ ମାନ ଆଉ ମହତ॥୭॥