ମୁହଁ ହୋଇଯାଏ ବଙ୍କା

ଭକ୍ତ ଚରଣ ସାହୁ, ଯାଜପୁର,୧୩ ଜାନୁଆରୀ ୨୦୨୩

ସରକାରଙ୍କର
ଅଧିକାରୀ ହୋଇ
ଆୟ ବହିର୍ଭୁତ ଅର୍ଥ ।
ଠୁଳ କରିଦେଲେ
ଭିଜିଲାନ୍ସ ବାଲା
ଯାଇ କରିଦିଏ ବ୍ୟର୍ଥ ।।
ଜବତ ହୁଅଇ ଟଙ୍କା ।
ଅଧିକାରୀ ଯାଏ
ଜେଏଲ ହାଜତ
ମୁହଁ ହୋଇଯାଏ ବଙ୍କା ।।

ଧରାଯିବା ପୂର୍ବୁ
କଥା ହେବା ବେଳେ
ପଡୁଥିଲା ହାତ ଯୋଡ ।
ଧରାଯିବା ପରେ
ସେ ଅଧିକାରୀଙ୍କ
ନ ଥାଏଟି ଆଉ ତୋଡ ।।
ବଦଳି ଯାଏରେ ମୋଡ଼ ।
ଜେଏଲ ହାଜତ
ଚାହିଁ ରହିଥାଏ
ପଶିବାକୁ ତାଙ୍କ ଗୋଡ ।।

ଲାଞ୍ଚ ନେଇ ଧରା
ପଡିବା ଘଟଣା
ଶୁଣି ବନ୍ଧୁ ପରିବାର ।
ଲାଜ ଅପମାନେ
ମୁହଁ ତଳ କରି
ସମୟ କରନ୍ତି ପାର ।।
ଖୁସି ଥିଲା ଯେଉଁ ଘରେ ।
ସେହି ଘରେ ଖାଲି
ନୈରାଶ୍ୟ ଖେଳିଲା
ଜେଏଲ ପଶିବା ପରେ ।।

ସରକାରଙ୍କର
ବିଭିନ୍ନ ବିଭାଗେ
ବଡ଼ ଚାକିରିଟେ କରି ।
ମୋଟା ଅଙ୍କର ତ
ଦରମା ପାଉଛ
ମନ ଯାଉଥିବ ଭରି ।।
ପୁଣି ଲୋଭ କର କାହିଁ ?
ଜେଏଲ ଯାଇକି
ଇଜ୍ଜତ ହରାଅ
ଲଜ୍ୟା ଟିକେ ଲାଗୁ ନାହିଁ ।।

ଏଇ ଲାଞ୍ଚ ନେଇ
ଜଣ ପରେ ଜଣେ
ଧରା ପଡୁଛନ୍ତି ଏବେ ।
ଏକଥା ଜାଣିକି
ତଥାପି ଚେତୁନ
ବୁଦ୍ଧି ହେବ ଆଉ କେବେ ?
କଥାଟେ କହୁଛି ଶୁଣ ।
ଏହି କାମ କଲେ
ତୁମ ଚରିତ୍ରରେ
ରହିଯିବ ଗୋଟେ ଖୁଣ ।।

ଯେତିକି ପାଉଛ
ସେତିକିରେ ତୁମେ
ସନ୍ତୁଷ୍ଟ ହୋଇକି ରୁହ ।
ସତ୍ୟ ପଥେ ରହି
ପିଲାଙ୍କୁ ତୁମର
ଏପଥେ ଯିବାକୁ କୁହ ।
ନ ହେଲେ ଭୋଗିବ ଦୁଃଖ ।
ଲାଞ୍ଚ ନେଇ ତୁମେ
ଯେତେ ଯାହା କଲେ
ମିଳିବ ନାହିଁଟି ସୁଖ ।।