ନବରାତ୍ର(ଚନ୍ଦ୍ରଘଣ୍ଟା)

ସସ୍ମିତା ପଣ୍ଡା, ୨୮ ସେପ୍ଟେମ୍ବର ୨୦୨୨

ତୁମେ ଚନ୍ଦ୍ରଘଣ୍ଟା ତୃତୀୟ ବିଭାବ
ଶୀତଳତା ମହାପର୍ବ ।
ବିରୋଧାଭାସର ନିଦାଘ ତଟେ ମୁଁ
ମାଗୁଥିବା ଆଶିର୍ବାଦ ।।

ତୁମେ ଶ୍ରୀମସ୍ତକ ଧାରଣ ଘଣ୍ଟାରେ
ନାଦବ୍ରହ୍ମ ସ୍ବରୂପିଣୀ ।
ମୁଁ ତୁମ ଶ୍ରଦ୍ଧାର କରୁଣା ଶବ୍ଦରେ
ପାର୍ବଣର ପୂଜାରିଣୀ ।।

ତୁମେ ଦଶଭୁଜା ସ୍ବର୍ଣ୍ଣିମ ଆଭାରେ
ପଶୁପତି ବାହନରେ ।
ଝରିଆସୁଥିବା ଅଶ୍ରୁର ଅଳି ମୁଁ
ତୁମ ଚାରୁଚରଣରେ ।।

ତୁମେ ଶ୍ରୀ ସୌମ୍ୟା ସୌନ୍ଦର୍ଯ୍ୟ ସୁଷମା
ଜଗତ କଲ୍ୟାଣମୟୀ ।
ନୀଳ କୁମୁଦର ନିବିଷ୍ଟ ମୁଦ୍ରା ମୁଁ
ତୁମରି ଚରଣ ଧ୍ୟାୟୀ ।।

ତୁମେ ମହାବେଶ ବର୍ଣ୍ଣିଳ ଆୟୁଧେ
ବିଚିତ୍ର ବେଷ୍ଟିନୀ ଶୋଭା ।
ପ୍ରତି ନିଃଶ୍ବାସର ନିଃଶବ୍ଦ ଆୟୂ ମୁଁ
ତୁମ ଶ୍ରୀପୟରେ ବନ୍ଧା ।।

ତୁମେ ଅଖଣ୍ଡ ଜ୍ୟୋତିରେ ଜ୍ୟୋତିର୍ମୟୀ ମାଆ
ଅଭୟର ବରଦାନ ।
ଭୟ ସଂକୁଚିତ ସଂକୀର୍ଣ୍ଣ ପଥରେ
ଯାତ୍ରା ମୋର ଲକ୍ଷ୍ୟହୀନ ।।