ନବରାତ୍ରୀ (ସିଦ୍ଧିଦାତ୍ରୀ)

ସସ୍ମିତା ପଣ୍ଡା, ୪ ଅକ୍ଟୋବର ୨୦୨୨

ନବମ ବିଭାବେ ସିଦ୍ଧିଦାତ୍ରୀ ନାମେ
ଆବିର୍ଭୁତା ମହାମାୟା ।
ଶାନ୍ତ ଆଭରଣେ କମଳ ବାସିନୀ
ସଂସାରକୁ କରଦୟା ।।

ସତ୍ୟ ଚତନାର ପରମ ଐଶ୍ବର୍ଯ୍ୟ
ଚତୁର୍ଭୁଜା ମହାଶକ୍ତି ।
ଶଙ୍ଖ ଚକ୍ର ଗଦା କମଳ ଧାରଣେ
ଅପୂର୍ବ ସୌନ୍ଦର୍ଯ୍ୟ କାନ୍ତି ।।

ଆଜି କାଶତଣ୍ଡି ଚାରୁ ସୁଷମାରେ
ସବୁଜିମା ଛନ୍ଦନ୍ୟାସ ।
ଅନନ୍ତ ଆକାଶ ନିଳୀମା ରାଶିରୁ
ରଜନୀର ଜୋତ୍ସ୍ନାସ୍ନାତ ।।

ମୁଗ୍ଧ ମନୋହର ରୂପ ରୋଷଣୀରେ
ଧରଣୀ ସ୍ବାକ୍ଷର ତୋଳେ ।
ନବଦୂର୍ଗା ରୂପେ ନୈସର୍ଗିକ ଧାରା
ଆବିର୍ଭାବ ସେତେବେଳେ ।।

ମାଟି ମନସ୍କରେ ଛଳଛଳ ଗୀତି
କାଶତଣ୍ଡି ତନୁତୀର୍ଥ ।
ଲାବଣ୍ୟ ଲହର ବିଲ୍ବ ପଲ୍ଲବରେ
କୁମୁଦିନୀ ଆଶା ମାତ୍ର ।।

ଶ୍ରଦ୍ଧା ସକାଳରେ ନୈବେଦ୍ୟର ସଜ
ନଳିନୀ ପାଖୁଡା ସିକ୍ତ ।
ଗଙ୍ଗଶିଉଳୀର ମୁକ୍ତ ସଂଯୋଜନା
ତୁମ ଶ୍ରୀପୟରେ ବ୍ୟକ୍ତ ।।

ଅଭୟର ମୁଦ୍ରା ତୁମ ସଂଦର୍ଶନେ
ମେଘର ଗଜରା ସ୍ପର୍ଶ ।
କୋଟି ବ୍ରହ୍ମାଣ୍ଡର ବୀଜମନ୍ତ୍ରେ ମାଆ
ତୁମେହିଁ ଆରମ୍ଭ ଶେଷ ।।