ନବରାତ୍ର (ଶୈଳପୁତ୍ରୀ)

ସସ୍ମିତା ପଣ୍ଡା, ୨୮ ସେପ୍ଟେମ୍ବର ୨୦୨୨

ତୁମେ ନୈବେଦ୍ୟର ଶୁଭ୍ର ପବିତ୍ରତା
ମୁଁ ସ୍ପନ୍ଦନର ଉଚ୍ଚାରଣ ।
ତୁମେ ବୃଷାଋଢା ଦିବ୍ୟ ଦରବାରେ
ମୁଁ ଆପେକ୍ଷିକ ଆମନ୍ତ୍ରଣ ।।

ଅଭୟ ତ୍ରୀଶୂଳେ ଦୀର୍ଘଦର୍ଶୀ ତୁମେ
ମୁଁ ଆତ୍ମ ପ୍ରତ୍ୟୟର ବାସ୍ନା
ତୁମେ ହିମବାନ ତନୁଜା ପାର୍ବତୀ
ମୁଁ ପୁଷ୍ପାଞ୍ଜଳି ନିରାଜନା ।।

ତୁମେ କମଳର ସଦ୍ୟ ଅଳଙ୍କୃତା
ମୁଁ ପଦ୍ମପତ୍ର ଜଳ ବିନ୍ଦୁ
ତୁମେ ପ୍ରସନ୍ନତା ଚିନ୍ମୟୀର ସୁଧା
ମୁଁ ମହଣେ ମୋହର ସିନ୍ଧୁ ।।

ତୁମେ ଶୈଳପୁତ୍ରୀ ଆଦ୍ୟ ନବରାତ୍ରେ
ମୁଁ ଯେ ଜିଜ୍ଞାସାର ପୁଷ୍ପ ।
ତୁମେ ସିଦ୍ଧିପ୍ରଦା ଜ୍ଞାନମୟୀ ମନ୍ତ୍ର
ମୁଁ ଭକତିର ଅବଶେଷ ।

ତୁମେ ସୁଧାମୟୀ ଶଇଳ ନନ୍ଦିନୀ
ମୁଁ ବିଶ୍ବାସର ଆବରଣ ।
ତୁମେ ଶାରଦୀୟ ପୂଣ୍ୟ ଅବତୀର୍ଣ୍ଣା
ମୁଁ ଅଭିପ୍ସାର ପାରାୟଣ ।।