ନିର୍ବାଚନ ପର୍ବ

ଆସିଗଲା ଦେଶରେ ଆମର
ଏବେ ନିର୍ବାଚନ ପର୍ବ,
କମିଶନଙ୍କ ଭାଷାରେ ତାହା
ଆମ ଦେଶର ଗର୍ବ ।। ୧ ।।

ବିଶ୍ୱରେ ସବୁଠୁଁ ବଡ଼ ଏହି
ଗଣତନ୍ତ୍ର ନିର୍ବାଚନ,
ଶତାନବେ କୋଟି ଭୋଟର
ତହିଁରେ କରିବେ ମତଦାନ ।। ୨ ।।

ବ୍ୟବସ୍ଥାକୁ ସ୍ୱଚ୍ଛ, ମୁକ୍ତ ଓ
ଅବାଧ କରିବା ପାଇଁ,
କେତେ ଝାଳ ବୋହିଅଛି
ହିସାବ କେହି ରଖିନାହିଁ ।। ୩ ।।

ଜଘନ୍ୟ ଅଭିଯୁକ୍ତ ବି ଏଠାରେ
ନିର୍ବାଚନ ଲଢୁଅଛି,
ଆମ ଦକ୍ଷ ବ୍ୟବସ୍ଥାକୁ ତାହା
ଉପହାସ କରୁଅଛି ।। ୪ ।।

କଳା ଟଙ୍କାର ପ୍ରାଦୁର୍ଭାବ
ଏଥିରେ ରୋକିବା ପାଇଁ,
ଯେତେ ଉଦ୍ୟମ କଲେ ମଧ୍ୟ
ଫଳ କିଛି ମିଳୁ ନାହିଁ ।। ୫ ।।

ଏବେ ହେବ କେତେ ସମାବେଶ
ପୁଣି ପଥପ୍ରାନ୍ତ ସଭା,
ସେଥିରେ ମିଳିବ ନେତାଙ୍କର
ପ୍ରତିଶୃତି ମନଲୋଭା ।। ୬ ।।

ତହିଁରେ ଭୋଟର ଦେଖିବେ
ରୋଚକ ଦୃଶ୍ୟ ଅସରନ୍ତି,
ଯୁଦ୍ଧ ପୂର୍ବରୁ ବଦଳି ଯିବେ
ସବୁ ପକ୍ଷର ସେନାପତି । ୭ ।।

ନେତାମାନେ ମଞ୍ଚକୁ ଆସିବେ
କେତେ ବହୁରୂପୀ ସାଜି,
କରେଇରେ ମାଛ ଭଳି
ଏବେ ଭୋଟର ହେବେ ଭାଜି ।। ୮ ।।

ଘର ଘର ବୁଲିବେ ପୁଣି
କେତେ ନେତା, କୁଜି ନେତା,
ଭୋଟ ନେବା ପାଇଁ କହିବେ
ଅନେକ କଅଁଳିଆ କଥା ।। ୯ ।।

ହାତୀ, ଘୋଡ଼ା ଦେବୁ କହି
ଭୁଲାଇବେ ମନ,
ଭୋଟ ସରିଯିବା ପରେ
ନେତା ହେବେ ଅନ୍ତର୍ଦ୍ଧାନ ।। ୧୦ ।।

କର୍ମୀ ଆଉ ନେତା ଏବେ
ହେବେ ମାଲାମାଲ,
ମଦ, ମାଂସ ସଂଗେ ଟଙ୍କା
ତାଙ୍କୁ କରିବ ବେହାଲ ।। ୧୧ ।।

ଅଦ୍ଭୁତ ଆମ ନିର୍ବାଚନ
ବିଚିତ୍ର ଏହି ଦୃଶ୍ୟ
ଧନୀ ପାଏ ଦରମା ଛୁଟି
ଆଉ ଗରିବ ରହେ ଓପାସ ।। ୧୨ ।।