ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୧୧ ଜୁନ୍ ୨୦୨୪
ଚବିଶ ନିର୍ବାଚନ ରାଜ୍ୟକୁ ଦେଇଚି ହଲାଇ
ଚବିଶ ବର୍ଷର ସରକାର ହୋଇଚି ଧରାଶାୟୀ
ବୁଝିପାରିଲାନି ଶାସକ କ୍ଷମତାରେ ଥାଇ
ଅଚାନକ କେମିତି ଖସିଲା ପାଦ ତଳ ଭୂଇଁ ।। ୧ ।।
ବିପର୍ଯ୍ୟୟର କାରଣ ନିରେଖିବା ପାଇଁ
କସରତ କରିବ କମିଟି ଗଭୀରକୁ ଯାଇ
କମିଟି ରିପୋର୍ଟ ଦେବ ଗୋଡ଼ହାତ ଧୋଇ
ସେତେବେଳକୁ ଦଳ ପଡ଼ିଥିବ ଶୋଈ ।। ୨ ।।
ଗଣତନ୍ତ୍ର ଶାସନକୁ ସମାଧି ଚଢାଇ
ଜଣତନ୍ତ୍ର ବ୍ୟବସ୍ଥାକୁ ଦଳ ଆପଣେଇ
ବାବୁରାଜ ମାଧ୍ୟମରେ ଶାସନ ଚଳାଇ
ଭାବିଥିଲା ଲୋକଙ୍କର ମନ ଯିବ ଛୁଇଁ ।। ୩ ।।
ଅସ୍ମିତା ମୁଦ୍ଦାରେ ଏଠି ଲୋକଙ୍କୁ ଭିଜାଇ
ବେକାରୀ ପ୍ରସଂଗରେ ଯୁବବର୍ଗଙ୍କୁ ରଗାଇ
ରତ୍ନଭଣ୍ଡାର ସମ୍ପର୍କରେ ସନ୍ଦେହ ଘନେଇ
ବିରୋଧୀ ସର୍କାରଙ୍କୁ ପୁରା ଦେଲାରେ ଫସାଇ ।। ୪ ।।
କ୍ଷମତା ହାରିବା ବ୍ୟଥା ହୃଦୟେ ଲୁଚାଇ
ବିରୋଧୀ ଭୂମିକା ଏବେ ଭଲରେ ନିଭାଇ
କାମ କରିବାକୁ ପଡ଼ିବ ଦିନ ରାତି ଧାଇଁ
ତେବେ ଯାଇ ଭୋଟରଙ୍କ ମନ ପାରିବ ଭୁଲାଇ ।। ୫ ।।
ବିଚିତ୍ର ଏ ନିର୍ବାଚନ, ବିସ୍ମୟ ଏ ଭାରତ ଭୂଇଁ
ଜିତିବା ଦଳ ମୁହଁରେ ବିଷାଦର ଛାଇ
ହାରିବା ଦଳ ଉଲ୍ଲାସେ ନାଚେ ଗୀତ ଗାଇ
ନିର୍ବାଚନ ଫଳକୁ କେହି ବୁଝି ପାରେ ନାହିଁ ।। ୬ ।।
ସଶକ୍ତ ବିରୋଧୀ ଦଳ ରହିଛି ଅନାଇଁ
ଶାସକର ଅହଂକାର ଦେବାକୁ ହଜାଇ
ଭୋଟର ସର୍କାରକୁ ଏଥର ରଖିଛି ଝୁଲାଇ
ସଂଖ୍ୟା ଗରିଷ୍ଠତାର ଗର୍ବ ନେଇଛି ଛଡ଼ାଇ ।। ୭ ।।
