ସସ୍ମିତା ପଣ୍ଡା, କଟକ, ୨୯ ଅଗଷ୍ଟ ୨୦୨୩
ମୀରା ପାପୁଲି ରେଖାରେ
ନୈବେଦ୍ୟର ସଜଫୁଟା ଫୁଲ
ମହମହ ବାସୁଥିବା ତୁମେମୟ ପୃଥିବୀ ।।
ରାସ କୁଞ୍ଜରୁ କୁଞ୍ଚିକୁଞ୍ଚି ହୋଇ
ଫିଟିପଡ଼ୁଥିବା ମାନିନୀର ଅଭିମାନ
ଚନ୍ଦ୍ରାବଳୀର ଉଆସରୁ
ଚନ୍ଦ୍ରସେଣାର ସିନ୍ଦୂର ଯାଏ ପାହୁନଥିବା ରାତି
ଗୋପରୁ ମଥୁରା ପର୍ଯ୍ୟନ୍ତ
ନୀଳବଂଶୀ ର ମଧୁର ସ୍ବନ ।।
ଶ୍ରମଣାର ଜୀବନ ସଞ୍ଜରେ
ଧୈର୍ଯ୍ୟର ମାତଙ୍ଗବନ
ଅଇଁଠା କୋଳିର ଭାବପ୍ରବଣ ରେ
ମୋକ୍ଷର ଖୋଲା ବାଟ ।।
ପାଷାଣ ଦେହର ପାଦସ୍ପର୍ଶ
ଶାପଯୁକ୍ତା ଗୌତମ ପତ୍ନୀଙ୍କ
ଶାପମୁକ୍ତିର ଶେଷ ଇସ୍ତାହାର ।।
ମାଣିକ ଗଉଡୁଣୀର ଅଙ୍ଗୀକାର ପାଖରେ
ପୋଷେ ଦହିର ପାଉଣା
ଚିହ୍ନଦିଆ ରତ୍ନମୁଦ୍ରିକାର କିମ୍ବଦନ୍ତି ।।
ଶ୍ରୀଜୟଦେବଙ୍କ ଭିତରେ ଉଠୁଥିବା ପ୍ରଶ୍ନ
ଶ୍ରୀଗୀତଗୋବିନ୍ଦ ମହାକାବ୍ୟର
ଦେହୀ ମୁଦାରମ୍ ପ୍ରୀତି ଲେଖନୀରେ
ସ୍ବହସ୍ତ ହସ୍ତାକ୍ଷର
ପଦ୍ମାବତୀଙ୍କ ସହଭାଗୀତାରେ
ପ୍ରତୀକ୍ଷାର ଶେଷପଂକ୍ତି ।।
