ପରିଚୟ

ପଦ୍ମାଳୟା ସାମଲ, ଭୁବନେଶ୍ୱର, ୭ ମାର୍ଚ ୨୦୨୩

ଘଡ଼ିକି ଘଡ଼ି ବଦଳୁଛି ସବୁକିଛି
ମିନିଟ କଣ୍ଟାଠୁ ଘଣ୍ଟାକଣ୍ଟା
ଦିନରୁ ରାତି, ବାରରୁ ସପ୍ତାହ
ସପ୍ତାହରୁ ମାସ, ମାସରୁ ବର୍ଷ
ସବୁକିଛି ବଦଳି ଯାଉଛି ଧୀରେଧୀରେ l
ଏଇ ବଦଳିବା ସାଥିରେ ବଦଳୁଛି
ମଣିଷର ଶରୀର, ମାନସିକତା
ଦୃଷ୍ଟିକୋଣ ଆଉ ଇଛା ସବୁ କିଛି l

ପ୍ରତିଦିନ କଟୁଥାଏ କିଛି କିଛି ଆୟୁଷ
ଅଥଚ ଜଣାପଡ଼େନି
ତାରି ଭିତରେ ବଦଳିଯାଏ କେତେ କ’ଣ
ନୂଆ ମିଶାଣ, ନୂଆ ଫେଡ଼ାଣ
ଚିହ୍ନା – ଅଚିହ୍ନା, ଅଚିହ୍ନା – ଚିହ୍ନା
ଏପରିକି ନୂଆ ଖରାବର୍ଷା ଶୀତ କାକର
ସବୁ ଘଟଣା ଅଘଟଣ ଓ ଅଘଟଣ ଘଟଣା
ଗୋଚ୍ଛା ଗୋଚ୍ଛା ସ୍ବପ୍ନ ସମାହାର l

କଣ୍ଢେଇ ଧରି ଖେଳୁଥିବା ହାତ
ଘର ସମ୍ଭାଳେ
କର୍ତ୍ତବ୍ୟ ଆଉ ଦାୟିତ୍ୱର ଆଭାସ ସାଥିରେ
ଝୁଣ୍ଟୁଥିବା ଦୁଇ ପାଦ ଧୀରେଧୀରେ ଦଉଡ଼େ
ଏ ଅଚିହ୍ନା ଦୁନିଆଁ ବାଟରେ l
ଭୋକ ଆଉ ଭେକ
ନେଇଯାଆନ୍ତି ସଞ୍ଚିତ ସମୟ ସାଥେ
ଅର୍ଥ ଆଉ କିଛି ଦୁଃଖ ସୁଖ l
ଥକିଗଲେ ପାଦ ଆସେନାହିଁ ନିଦ
ଅକାରଣେ ମିଳେ ପୁଣି କେତେ ଅପବାଦ
ଶେଷରେ ବି ବାକିଥାଏ ଭୟ
ଦେହ ଜଳେ ମଶାଣି ଭୂଇଁରେ
ରହିଯାଏ ଖାଲି ପରିଚୟ l