ରଜ ପରବ

ଭକ୍ତ ଚରଣ ସାହୁ, ଯାଜପୁର, ୧୫ ଜୁନ୍ ୨୦୨୩

ପହିଲି ଆଷାଢ଼
ମଉସୁମୀ ଆସି
କହିଯାଏ କାନେ ହରଷେ ।
ଆଜି ସଜବାଜ
କାଲି ହେବ ରଜ
ଯାଇଥିଲା ବିତି ବରଷେ ।।
କିଶୋରୀ, ମୁଣ୍ଡରେ ରିବନ ବାନ୍ଧିବେ ।
ଘରେ ଘରେ ପରା
ମାଉଁସ ତିଅଣ
ଯତନରେ ମାଆ ରାନ୍ଧିବେ ।।

ଆଜି ରାତି ସାରା
ଆକାଶୁ ବରଷା
ଟୋପା ଟୋପା ହୋଇ ଗଡୁଛି ।
ପହିଲି ରଜରେ
କାଉଁଳିଆ ପାଗ
ହେବ ବୋଲି ଜଣା ପଡୁଛି ।।
ଟାଣ ଖରା ଯିବ ଦୂରେଇ ।
କାହିଁ କେତେ ଆଡେ
ବୁଲିବାରେ ଆମେ
ବାଇକ ଚକାକୁ ଘୁରେଇ ।।

ଗାଆଁ ପିଲା ସବୁ
ଏକାଠି ହୋଇବେ
ଲଟେଇରେ ସୂତା ଗୁଡେଇ ।
କେଡେ ଆନନ୍ଦରେ
ପଡିଆ ମଝିରେ
ଗୁଡିଟାକୁ ଦେବେ ଉଡେଇ ।।
ଉଡିଯିବ ଗୁଡି ଗଗନ ।
ରଜ ତିନି ଦିନ
ପାଳିବେ ପିଲାଏ
ଆନନ୍ଦରେ ହୋଇ ମଗନ ।।

ଗାଆଁ କୁଆଁରୀଏ
ମାଆ ହାତ ରନ୍ଧା
ଖୁସି ମନେ ସବୁ ଖାଇକି ।
ପୋଷାକ ନୂଆକୁ
ପାଦରେ ଅଳତା
ନାଇ ବୁଲିଯିବେ ସାହିକି ।।
ସାରା ଦିନ ହସି ହସିକି ।
ସମୟ ପାଇଲେ
ମିଳିମିଶି ସବୁ
ଖେଳିବେରେ ଲୁଡୁ ବସିକି ।।

କେତେ ରକମର
ଦୋଳି ଲାଗିବରେ
ଘୁରୁଥିବ ସାଇଁ ସାଇଁରେ ।
ଖେଳିବାକୁ ଇଛା
ହେବ ବୋଲି ପିଲେ
ସିଆଡକୁ ଯିବେ ଧାଇଁରେ ।।
ବାଗୁଡି ଖେଳେକେ ମାତିବେ ।
ଆଉ କିଏ ପୁଣି
ବୋହୁଚୋରି ଖେଳି
ତାତିବେ କେ’ ମଥା ପାତିବେ ।।

ଗାଆଁର ବୟସ୍କ
ଖାଇପିଇ ଦେଇ
ଘରୁ ଯିବେ ଚାଲି ଚାଲିକି ।
ତୋଟା ପଡ଼ିଆରେ
ସକାଳ ଠୁଁ ସଞ୍ଜ
ଖେଳିବେ ତାଆସ ପାଲିକି ।।
କାମ ନାହିଁ କିଛି ଯେହେତୁ ।
ରଜ ତିନି ଦିନ
ଖେଳିବେ ସେମାନେ
ମନଟାକୁ ଦେଇ ସେହେତୁ ।।

ସଂସ୍କୃତିର ବାର୍ତ୍ତା-
ବହ ବୋଲି ଆମେ
ଜାଣିଛେରେ ରଜ ପରବ ।
ତେଣୁ ସବୁ ଆସ
ପାଳିବା ଏ ରଜ
ମନରେ ଭରିକି ଗରବ ।।
ଲୟ ରଖି ବିଭୁ ପାଦରେ ।
ହିଂସା ଈର୍ଷା ଠାରୁ
ଦୂରେଇ ରହିଲେ
ଭୋଗିବାନି ଅବସାଦରେ ।।