ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୬ ସେପ୍ଟେମ୍ବର ୨୦୨୩
ତୁ ନାଥ ଧର୍ମ ରକ୍ଷାକାରି
ତୁ ନାଥ ସନ୍ଥ ହିତକାରି.
ଅଧର୍ମ ହେଲେ ବଳବାନ
ପାପୀ ପାଆନ୍ତି ଉଚ୍ଚସ୍ଥାନ.
ମାନନ୍ତି ନାହିଁ ନର ଧର୍ମ
କରନ୍ତି ନାନା ଅପକର୍ମ.
ସାଧୁଏ କରି ଏକସ୍ୱର
ତୋତେ ଡାକନ୍ତି ରମାବର.
ତୋ ବିଶ୍ୱ ତୁହି ରକ୍ଷା କର
ଏହାହିଁ ପ୍ରାର୍ଥନା ତାଙ୍କର.
ମାନବ ଦେହ ଧରି ତୁହି
ଜନମ ହେଉ ଭାବଗ୍ରାହୀ.
ପାପୀଙ୍କ ବିନାଶର ଅର୍ଥେ
ଲୀଳା ତୁ ରଚୁ ଏହି ମର୍ତ୍ତେ.
ଶ୍ରୀକୃଷ୍ଣ ରୂପେ ନେଲୁ ଜନ୍ମ
ପାଳିଲୁ ତୁହି ତୋର ଧର୍ମ.
ଦେଖାଇ ଅଲୌକିକ ଶକ୍ତି
ଅସୁରେ ଦେଲୁ ତୁ ନିପାତି.
ଗୋରୁ ବ୍ରାହ୍ମଣ କଲୁ ରକ୍ଷା
ଜଗତେ ଦେଲୁ ସାମ୍ୟ ଦୀକ୍ଷା.
ପ୍ରକୃତି ପୂଜା ଶିଖାଇଲୁ
ଗୋବର୍ଦ୍ଧନ କୁ ତୁ ପୂଜାକଲୁ.
ହେ କୃଷ୍ଣ ପ୍ରଭୁ ନନ୍ଦସୁତ
କରୁଛି ମୁହିଁ ପ୍ରଣିପାତ.
ଯଶୋଦା ନନ୍ଦନ ଗୋବିନ୍ଦ
ଶରଣ ତୋ ପଦାରବିନ୍ଦ.
ତୁ ନାଥ ଦୟାର ସାଗର
ଏ ଦୀନେ ବାରେ ଦୟାକର.
ହେଉ ମୋ ସଦଜ୍ଞାନ ଉଦେ
ନ ପଡେ କେବେ ମୁଁ ପ୍ରମାଦେ.
ତୋ ନାମ ତୁଣ୍ଡ ଘୋଷୁ ଥାଉ
ତୋ ପାଦେ ପ୍ରାଣ ଲୀନ ହେଉ.
